SAMUEL 2 16 - Alkitab Singog In Mongondow Masa In Tanaa

Ki Daud bo ki Ziba

¹ Naonda in ki Daud bagupa noitaḻib kon tudu in buḷud, daḻídon noiangoi in ki Ziba ata i Mepiboset, namangoi nokipodungkuḷ kon inia kodia-dia in keledai doyowa inta dinatogan in roti doyowa nogatut nobatú, mogatut in kukis kismis, mogatut nobogot in bungai in ayop inta bagupa sinipú bo tobotutu in tubig in anggur.

² Ki Datu Daud in noḻibó kon inia, “Pongonu in naa komintan?” Tubag i Ziba, “Keledai mita tanaa in biag inta baḻíon totakoian in motoḷuadí i Tuang datu, roti bo bungai mita in ayop tanaa in ogoi kon bobantung mita i Tuang datu, bo tubig in anggur tanaa in ogoi kon i monia inta ain noḷopí kon padang gurun.”

³ Bo noḻibó in ki datu kon inia, “Kon onda in ki Mepiboset ki ompu i tuangmu ki Saul?” “Tuapabí in sia kon Yerusalem,” tubag i Ziba, “sin noyakinbí in sia kon tanaa intau in Israel mopobuidon in dodatuan i Saul ki akinea kon inia.”

⁴ Bo nogumandon in ki datu kon i Ziba, “Pinangkoidon kon tanaa bayongan kapunyaan i Mepiboset in mobaḻídon kapunyaanmu.” “Sukur moantó Tuang,” tubag i Ziba. “Igumon mako ki Tuang umuran mopia in gina kon inakó!”

Ki Daud bo ki Simei

⁵ Naonda in ki Daud nodapot kon Bahurim, namangoidon in intau tobatú nongkon tampat tatua, bo kodiug-kodiug kon paanan i datu, nogodi-godimai in sia kon i Daud. Tangoinea in intau tatua in ki Simei adí i Gera, nongkon inanakan i Saul.

⁶ Ki Simei in nogandur in batu kon i Daud bo kon pogawainea mita, umpakabí ki Daud iḷukadan in intaunea mita bo porwiranea mita.

⁷ Nanaa in tosingogon odi-odi i Simei kon i Daud, “Bayádon! Bayádon! Moḷoḻimod! Intau moraat!

⁸ Iko ain nogagow kon dodatuan i Saul! Tanaa in iko in ihukumbí i Tuhan sin noḻimod kon nobayong totok in inanakan i Saul. Ki Tuhan ain nobogoi in dodatuanmu kon i Absalom ki adímu. Tanaa in kopatoidon in iko, ei moḷoḻimod!”

⁹ Ki Abisai ki ai-ai i Yoab adí i Zeruya, in noguman kon i datu, “Nongonu sin pomayábí mako i Tuang in mononuyayow tatua mogodi-godimai kon i Tuang? Pomayádon mako in bobantung naa mongingguḷu kon inia!”

¹⁰ Táe noguman in ki datu kon i Abisai bo kon i Yoab ki guya-guyangnea, “Dikadon hirauonmai. Pomayádon mako in sia mogodi-godimai kon inakó. Sin aka ki Tuhan in nopotabá kon inia, yo ki inebí in kohak moḻibó kon inia nongonu sin momiabí natua in sia?”

¹¹ Bo ki Daud in noguman bui kon i Abisai bo kon bayongan in bobantungnea, “Ki adíkupa tontaní in moḷongasidon moḻimod kon inakó; yo nongonu sin moiko in moherangbí in mokoontong kon dodia in intau in Benyamin tanaa? Ki Tuhanbí in nopotabá kon inia mogodi-godimai kon inakó; tuamai in dikadon onuon monimu in sia bo pomayádon mako in sia mogodi-godimai.

¹² Degá bo umuranbí indoian mako i Tuhan in roriga tanaa bo momarakat kon inakó nobaḻí toḻiu in odi-odi tatua.”

¹³ Bo nongingguputdon kon bobayáan in ki Daud takin tumotakinnea, táe ki Simei in iḻimikat in nogaḷow kon i monia kon aḻet in buḷud sindaḷan mogodi-godi bo mopogandur in batu bo butá.

¹⁴ Totokdon in noḷopí in ki datu bo intaunea mita naonda in nodapot kon Ongkag in Yordan, bo nogogai in mosia kon tua.

Ki Absalom kon Yerusalem

¹⁵ Kon dodai intua ki Absalom bo bayongan intau in Israel inta sinumakin kon inia sinumuotdon in kotá in Yerusalem, bo ki Ahitopel in sinumakin doman.

¹⁶ Naonda in ki Husai yobayat i Daud inta mosatia tua noyodungkuḷ i Absalom, ki Husai in nomaḷú, “Kobiag datu! Kobiag datu!”

¹⁷ Táe ki Absalom in noḻibó kon inia, “Kon onda in satiamu kon yobayatmu ki Daud? Nongonu sin iko in diábí dinumudui kon inia?”

¹⁸ Ki Husai in notubag, “Naondabí! Akuoi naa in momihakbí kon intau inta piniḻí i Tuhan, piniḻí in intau mita tanaa, bo in bayongan intau in Israel. Intaubí tatua in duduianku.

¹⁹ Apadoman, ki inepabí in bantunganku? Tantú adíbí ḷoḷaki i tuangku! Ná pinobobantungku kon i amá i Tuang, yo natuabí doman in pobobantungku kon i Tuang in tanaa.”

²⁰ Onda intua noguman in ki Absalom kon i Ahitopel, “Pogumandon mongo onu in pomiaan naton.”

²¹ Tubag i Ahitopel, “Bayádon kon buḷoi mita i amá i Tuangku inta sinaḷáan sin moḷukad kon komaḻig, bo posiug takin i monia. Bayongan in Israel in monotaaudon kon pongin oaid i Tuangku natua, dá ki Tuangku in inanggapdon musung i amá i Tuangku. Dá bayongan dumodudui i Tuangku in modugangdon mobarani.”

²² Dá, pinomiaandon in ki Absalom kon ḷoḷaigan kon tudu in atop in komaḻig inta notondodai tatua. Bo koonto-ontongbí in bayongan intau ki Absalom in sinumuot kon bonu in ḷoḷaigan tatua bo nosiug takin i buḷoi mita i amánea.

²³ Kon tungkuḷ intua bayongan tonggina i Ahitopel sinarima naonda bo tosingogon i Allah tontaní in tosingogonnea tua; pinomayá ki Daud andeka ki Absalom dumudui kon tongginanea mita.