SAMUEL 2 13 - Alkitab Singog In Mongondow Masa In Tanaa

Ki Amnon bo ki Tamar

¹ Ki Absalom adí ḷoḷaki i Daud kogai-gai kon mongodeaga inta moḷunat totok, ki Tamar in tangoinea. Ki Amnon ki adí ḷoḷaki i Daud kon bobay ibanea, noibog kon i Tamar

² bo moibog mosiug takinnea. Táe diábí kumaan kon akaḷ intua sin ki Tamar in diápa kobuḷoi bo diábí motaau in moyobayat in ḷoḷaki. Ki Amnon in umuranbí mopomiki-mikirmai kon tua nodapot in notakit in sia.

³ Oyúon in yobayat i Amnon inta mopandoi bo mobarong in akaḷ, tangoinea ki Yonadab ki adí i Simea ki guya-guyang i Daud.

⁴ Ki Yonadab in noguman kon i Amnon, “Adí i Datu, nongonu sin pomuḷoi in singgai iko koontongan umuranbí molamurú mako? Eta nongonu degá?” Tubag i Amnon, “Akuoi in moibogdon kon i Tamar, ki ai-ai Absalom ginaḷumku tua.”

⁵ Bo ki Yonadab in noguman kon inia, “Mogampangbí intua! Posiugdon mako kon tosiuganmu, bo ki ubo-uboḷmaidon naonda bo notakit. Aka ki amámu mamangoi moindoi kon inimu, pogumandon kon inia, ‘Amá, potabápa mangoi in naa in ki Tamar sinbá ogoianneapa in kaanon in akuoi. Aka mokoontong in akuoi kon inia modungú kon naa, yo mokopongaanbí in akuoi.’ ”

⁶ Onda intua nosiug in ki Amnon kon tosiugan naonda bo notakit. Naonda in ki Datu Daud namangoi noindoi kon inia, ki Amnon in noguman kon inia, “Amá, poangoipa in ki Tamar mamangoi sin momia kon kukis kon tayowonku kon naa; bá moibog in akuoi mongaan.”

⁷ Onda intua nokidia in koyow in ki Daud kon i Tamar kon komaḻig, kainia, “bayápa kon baḷoi i guya-guyangmu ki Amnon, bo podungúaipa in sia.”

⁸ Bo minayá domandon intua in ki Tamar bo kinobayáanneamai in ki Amnon nosiug mako kon tosiugannea. Ki Tamar in nogamá kon topong topiḻik, bo kon tayowon i Amnon nomiadon in sia kon kukis sin angagon.

⁹ Nopaḷut mako kon tua pinoḷuaineadon in kukis tatua nongkon pansi bo inoḷudnea. Táe doí in ki Amnon nongaan. Sia in noguman, “Pokiḷuaiaidon in mosia komintan nongkon naa!”

¹⁰ Naonda in komintandon iḻumuai in intau nongkon gopot tatua, nogumandon in ki Amnon kon i Tamar, “Diadon mangoi kon naa in kukis mita tanion, kon tosiuganku, bo yoyokaipa in akuoi!” Dinuduian doman i Tamar.

¹¹ Táe naonda in pinoyoyok i Tamar in kukis tatua kon inia, kinadaian i Amnon in mongodeaga tatua poḷat noguman, “Ai-aiku, koḻigai mosiug takinku!”

¹² “Ah, dika, guya-guyang!” tubag in mongodeaga tatua. “Dika pakisaanmu in akuoi momia kon inta mokooyá totok tatua! Aid natua in diábí kon dodai in onda in inaidan kon Israel.

¹³ Aka mobaḻí intua, yo pobayákudon in onda in pogotku naa? Bo iko in singkuḻeonbí doman in intau in Israel. Mopia-piabí kon yosingogonmu takin i datu, pasti moibogbí in ki datu aka akuoi mobaḻí ki buḷoimu.”

¹⁴ Táe doí in ki Amnon mokidongog kon singognea tua, bo popisí in sia in moropo-ropot, dá dinomokneadon in ki ai-ainea tatua, bo pinakisanea siniugan.

¹⁵ Táe nopaḷut mako kon tua ki Amnon totokdon in mobú kon i Tamar, yaatdon in ginanea tatua in moḷobe-ḷoben nongkon ibognea muna. Bo sia in noguman kon i ai-ainea tatua, “Ḷuaidon!”

¹⁶ Ki Tamar in noguman, “Ah, nongonu sin natuabí in guya-guyang? Aka poguntunonmu in akuoi, yo aid moraat tatua in modugangdon in koraatnea nongkon onu inta ain inaidanmu koina!” Táe doí in ki Amnon nokidongog.

¹⁷ Nogoiní in sia kon bobantungnea bo noguman, “Dia poḷuai in bobay tanaa, bo kunsíai in ḷoḻingkop!”

¹⁸ Bobantung tatua nogaid kon onu in pinoki aid kon inia tua. Ḷambung i Tamar in jubah mobanat inta noḷanggó in ḻimanea. Kon tungkuḷ intua adí mita bobay i datu inta diápa kobuḷoi in biasamai mogiḷambung ná tatua.

¹⁹ Bo nopoinggú in ki Tamar in ḷobud kon uḷunea, nomerak kon jubahnea, bo minayá takin nopogoḻingoi in ḻimanea kon pogotnea bo sindaḷan nongombaḷ totok.

²⁰ Naonda in inontong i Absalom, noḻibó in sia, “Eta ki Amnon nopoyagi-yagimaidon kon inimu? Natuadon ai-aiku, dikadon raionmai bui. Sia tua in ki guya-guyangmubí, dá dikadon oumanon kon i ineka.” Bo ki Tamar in minayádon nogadop kon baḷoi i Absalom, bo totokdon moajar in ginanea bo moingongowdon.

²¹ Kinodongogandon i Datu Daud onu in nobaḻí tatua, bo sinumorúdon totok in sia.

²² Sinagú totok i Absalom kon gina in yaat in ginanea kon i Amnon bo doídon in sia mongonguman takinnea popisí in sia ain nodomok kon i Tamar inta ki ai-ainea.

Ki Absalom noḻimod kon i Amnon

²³ Doyowa notaong noiduduimai kon tua ki Absalom nomia kon bobutungan pinonggonsingan kon bubuḷ in domba kon Baal-Hazor, kon diug in kotá in Epraim, bo nogoiní in sia kon bayongan adí ḷoḷaki i datu.

²⁴ Minayá in sia kon tayowon i Datu Daud bo noguman, “Amá, akuoi in momia kon bobutungan ponggonsingan kon bubuḷ in domba. Igumon mako in ki amá mamangoi doman kon bobutungan tatua takin intau mita moḷoben kon komaḻig.”

²⁵ Táe ki datu in notubag, “Dika, adíku, sin aka kami mamangoi komintan yo kami in mokoposusamaidon kon inimu.” Tongá umuran in ki Absalom momakisa, táe ki amánea in tantúbí doman doí mamangoi. Tongábí inogoinea in sia nomia kon tua.

²⁶ Bo ki Absalom in noguman, “Aka natua, dá ogoidon in ki utatku ki Amnon dumudui takin inami.” Guman i datu, “Dikadon in sia dumudui.”

²⁷ Táe popisí in ki Absalom umuran doman momakisa, dá imbuitnea ki Daud nobogoidon kon i Amnon bo bayongan in adínea ḷoḷaki ibanea dinumudui kon i Absalom. [Bo ki Absalom nokioḷudon in kaanon inta totok in mongopia.]

²⁸ Nomarenta in sia kon bobantungnea mita, “tarukira kopia, aka ki Amnon ain noḷoḷangu popisí in nonginum kon anggur, akuoi in mobogoidon in topotundú, bo ḻimodon in sia. Dika moondok. Akuoi in mobaba kon bayongan tua. Pokobaranibí in mogaid kon tua bo dika moondo-ondok!”

²⁹ Bobantung mita tatua nogaid kon onu in pinoki aid i Absalom, bo iḻimodon monia in ki Amnon. Nokoontongmai kon natua in ki adí mita ḷoḷaki i Daud ibanea baḷúdon sinumakoi kon bagal monia kon batúannea bo noḷagui.

³⁰ Kon daḷanpa in mosia nobui, oyúondon in intau nopotaau intua kon i Daud, “Ki Absalom ain noḻimod kon bayongan in adí ḷoḷaki i Tuang Datu – diádon in tobatúmai in nobiag!”

³¹ Sinimindog in ki Datu, bo nomerak kon ḷambungnea sin nokuyangdon totok in ginanea, bo inumuḻidon kon taḷog. Bayongan in pogawainea dinumudui domandon nomerak kon ḷambung monia.

³² Táe ki Yonadab adí i Simea inta ki guya-guyang i Daud in noguman, “Tuang Datu, dika mokuyang in gina bo dikapa morai kon bayongan in adí ḷoḷaki i Tuang Datu in minatoidon komintan. Tongábí ki Amnon in minatoi, sin nosimantagdon totok kon tuabí in kinoibog i Absalom pinangkoimai kon ki Tamar ki ai-ainea dinomok i Amnon.

³³ Dá dikadon mopirisaya kon ki adí mita ḷoḷaki i Tuang Datu in minatoi komintan, tongábí ki Amnon in minatoi.”

³⁴ Kon dodai intua ki Absalom ain noḷagui. Moḷoḷukad kon komaḻig i Daud nokoontong kon nobayong in intau in namangoi nosiḻig kon buḷud nongkon dotá in Horonaim. Dá minayádon in sia kon i datu bo nopotaau intua.

³⁵ Bo ki Yonadab noguman kon i Daud, “Tuata in ki adí mita ḷoḷaki i Tuang Datu! Totuu ná inta ain pinogumanku koina.”

³⁶ Bagupa in sia nopaḷut nosingog, sinumuotdon mangoi in ki adí mita ḷoḷaki i Daud kon bonu in yuang. Mosia in nomangkoidon nongombaḷ, bo ki Daud takin bobantungnea mita in nongombaḷ doman takin kuyang in gina.

^37-38 Ki Absalom in noḷagui minayá in komaḻig in datu in butá in Gezur, inta ki Talmai adí i Amihur. Nogutun in sia kon tua toḷu notaong in koonggotnea. Noonggot in pinonogumatoian i Daud kon kinopatoian i Amnon,

³⁹ táe naonda in diádon nokuyang in gina i Daud, totokdon in nokotanob in sia kon i Absalom.