SAMUEL 2 12 - Alkitab Singog In Mongondow Masa In Tanaa

Tompoingat i Natan kon i Daud

¹ Nopaḷut mako kon tua ki Tuhan in nopotabá kon i Nabi Natan minayá nokipodungkuḷ kon i Daud. Minayá in ki Natan kon inia bo noguman, “Oyúon in intau doyowa in nogutun kon kotá tobatú; Tobatú in nobiag nooyúon bo inta tobatú doman in nobiag nobogá.

² Ki inta nobiag nooyúon kobobiagon inta moantó bo kodomba,

³ bo ki inta nobiag nobogá in tongá oyúon in ki adí in domba tobatú, inta sinaḷuinea. Ki adí in domba tatua biniagnea nodapot in noḷoben kon bonu in baḷoinea noyotakin i adínea mita. Ki adí in domba tatua pinokaannea in kaanon in intau tatua, nodapot in nonginum kon palonea, bo mosiug kokoyo-koyotnea; impoḷok mako in tosingogon, pinomianea naonda bo ki adínea bobay tontaní.

⁴ Kon singgai tobatú ki intau inta nooyúon naa kinoangoian in mokokiangoi. Ki intau inta nooyúon naa in doíbí moratá kon domba andeka sapinea tontaní sin dungúon kon mokokiangoinea tatua. Táe sia in nogamábi kon ki adí in domba in intau inta nobogá tatua, bodongka dinungúnea kon mokokiangoinea.”

^5-6 Nokodongogmai kon tua in ki Daud sinumorúdon totok sin aid in intau nooyúon tatua bo poḷat in sia noguman, “Totokbí in moraat in intau nooyúon tatua! Podoyon kon tangoi i Tuhan inta nobiag, intau tatua in mustibí monoḻiu kon ki adí in domba koopat noguntuḷ in kobayongnea bo sia in mustibí hukumon matoi!”

⁷ Guman i Natan kon Daud, “Ki Tuangbí in intau tatua! Bo naadon in pinoguman i Tuhan, Allah in Israel, ‘Iko in dinuí-Kudon nobaḻí datu kon Israel bo pinosaḷamat-Ku nongkon i Saul.

⁸ Dodatuan i Saul bo ki buḷoinea mita in inogoi-Kudon kon inimu, nodapotdon in dinuí-Kudon in iko nobaḻí datu kon Israel bo kon Yohuda. Aka tua bo diápa doman tugat, yo notantú bidon kon ogoi-Kudon kon inimu podudui in ibogmu tua.

⁹ Nongonu sin iko in diábí noindoimai kon parenta-Ku mita? Nongonu sin inaidanmubí in moraat ná tatua? Ki Uria in pinoki ḻimodmubí kon bonu in parang; pinomayámudon mako in sia iḻimod in intau in Amon, bo ginamámu in ki buḷoinea!

¹⁰ Popisí in iko diá dinumudui kon i-Nakó bo ginamámu in ki buḷoi i Uria, dá kon bonu in buímu monag in oyúonbí in matoi koḻimodan.

¹¹ Akuoi in mongibot kon mopoumabí in bodito kon inimu inta mamangoi nongkon motoḷuadímu tontaní. Gamáan-Kubí in ki buḷoimu mita koonto-ontongmu mako bo ogoi-Ku kon intau ibanea inta mosiug takin monia kon dodai in singgaipa.

¹² Inumado-adopdon in iko bo nogaid kon dosa, táe poniata-Kubí in tosingogon-Ku tatua koonto-ontong in bayongan intau in Israel.’ ”

¹³ Bo noguman in ki Daud kon i Natan, “Binaradosadon in akuoi kon i Tuhan.” Tubag i Natan, “Ki Tuhan in nongampungdon kon i Tuang; dá ki Tuang in diábí matoi.

¹⁴ Tongá popisí in ki Tuang ain nopoompámai kon i Tuhan pinongin oaid tatua, dá ki adí ḷoḷaki i Tuang inta bagupa pinononggadí tatua in matoibí.”

¹⁵ Nopaḷut mako kon tua nobuidon in ki Natan kon baḷoinea. Ki adí ḷoḷaki i Daud inta pinononggadí i Batsyeba ki baḷú i Uria, kinotugatan in takit podudui in ibog i Tuhan.

Ki adí ḷoḷaki i Daud minatoi

¹⁶ Bo nosambayang in ki Daud kon i Tuhan sinbá mopia in adí tatua. Nopuasa in sia bo pomuḷoi in doḷom tumonggobii monag sia in umuḻid mako kon taḷog in gopotnea.

¹⁷ Bo intau mita moḷoben kon komaḻig mayá kon inia sin modondouḷug sinbá simindogdon in sia, táe diá tarimaannea in mosia bo doí doman in sia mongaan moyotakin monia.

¹⁸ Todiminggu noiduduimai kon tua adí tatua minatoi, bo bobantung mita i Daud in diá mokobaḻí in mopotaau intua kon i Daud. Guman monia, “Kon dodai in adí tatua nobiagpa, ki datu in doíbí mokidongog kon onu in poguman naton kon inia. Apapa doman tanaa naonda in ki adínea ḷoḷaki minatoidon! Dika bo simindodokdon in sia!”

¹⁹ Naonda inontong i Daud in bobantungnea mita tatua noyogombong, kinotaauanneadon kon minatoidon in adí tatua. Bo iḻibóneadon kon i monia, “Minatoidon degá in adí tatua?” “Minatoidon, Tuang Datu,” tubag monia.

²⁰ Dá sinimindogdon in ki Daud nongkon taḷog, bo noinggú poḷat nonaid kon buoknea, bo nomaḷuidon kon ḷambung. Onda intua minayá in sia noibada kon Baḷoi Tuhan. Nopaḷut mako kon tua minayádon bui in sia kon komaḻig, bo nokioḷud in kaanon pongaanannea, bo nongaandon in sia.

²¹ Nokoontongmai kon natua, bobantungnea mita noguman kon inia, “Diádon komangaḻean nami in ki Tuang Datu. Kon dodai in adí tatua nobiagpa, ki Tuang Datu in nopuasa bo mongombaḷmai kon inia, táe naonda in minatoi in sia, ki Tuang in sinimindogdon bo nongaan!”

²² “Oo,” tubag i Daud, “totuubí kon akuoi in nopuasa bo nongombaḷ kon dodai in adí tatua nobiagpa sin akuoi in norai: degá bo totabionpabí i Tuhan in akuoi bo ogoi-Neapa in adí tatua mobiag.

²³ Táe tanaa, naonda in sia minatoi, onupabí in mangaḻenea umuran in akuoi mopuasa? Degá mokobiag bui in akuoi kon inia? Kon singgai moiduduimai akuoibí in mayá in tampat inta binayáannea, táe tanaa in diábí in sia mamangoi bui kon inakó.”

Ki Salomo pinononggadí

²⁴ Onda intua ki Daud noḻipoi kon i Batsyeba ki buḷoinea, bo nosiugdon noyotakinnea. Ki Batsyeba nopononggadí in adí ḷoḷaki tobatú bo sinangoian i Daud ki Salomo. Sinotabi i Tuhan in adí tatua

²⁵ bo pinoki tontangoi kon i Nabi Natan in adí tatua ki Yedija, sin ki Tuhan notabi kon inia.

Ki Daud nogagow kon Raba

²⁶ Kon dodai intua ki Yoab umuranpa noparang nonayow kon Raba ibukotá in Amon, bo motoyongdon mokoagow kon tua.

²⁷ Bo nopotabá in sia in totabá minayá kon i Daud bo nopotaau, “Akuoi ain nonubu kon Raba, bo nogagow kon kotá inta nobarong in tubig.

²⁸ Tanaa, in mokituḷungpa kon i Tuang bo sipunonpa in ki agat in tontara naton, bo modia kon i monia mayá moparang mogagow kon kotá tatua. Sinbá diá tangoion in intau kon akuoi in nogagow kon kotá tatua.”

²⁹ Bo sinipundon i Daud in bayongan tontaranea, bo minayá nonubu kon Raba, sinubunea bo poḷat nonaḷow.

³⁰ Ki Daud nogamá kon mahkota in datu nongkon uḷu i datu monia bo pinoḷutudnea kon uḷunea. Mahkota tatua kobogatnea in degá bo 35 nokilo bo iḷambáan in permata inta totok in mogaga. Nodia doman in ki Daud kon nobayong totok in pakakat mita inta inagow nongkon kotá tatua.

³¹ Koḻikud intua intau mita inta nogutun kon tua dinia, bo pinoki diaan in garagaji, pasoḷ uatoi, bo boḻiung uatoi bo mosia in pinoki aidan kon tampat pogogaidan kon tela. Soaḷ tatua pinomianea doman kon intau mita inta nogutun kon kotá mita in Amon ibanea. Nopaḷut mako kon tua ki Daud takin tontaranea mita nobuidon kon Yerusalem.