SAMUEL 1 8 - Alkitab Singog In Mongondow Masa In Tanaa

Umat in israel mopoigum in datu tobatú

¹ Naonda in ki Samuel nogoguyangdon, binaḻíneadon in ki adínea hakim kon Israel.

² Adínea guya-guyang tangoinea in ki Yoël bo inta nogindua in ki Abia. Mosia in nobaḻí hakim kon Bersyeba.

³ Táe mosia in diá dinumudui kon dodia i amá monia, táe tongábí motayak kon kauntungan monia tontaní. Mosia in moibog uboḻian kon pelekara bo diá moadil in mohakim kon rayat.

⁴ Tuamai in bayongan itoi kon Israel noyosipun, bo minayá kon tayowon i Samuel kon Rama,

⁵ bo noguman kon inia, “Indongogaipa kaasí Amá, ki Amá aindon nogoguyang bo ki adí mita i Amá in diábí dinumudui kon aid i Amá. Dá maníka ki Amá moduídon kon datu tobatú bá oyúondon in datu nami ná doman bangusa mita ibanea.”

⁶ Táe diábí nosanang in gina i Samuel in nokodongog kon onu inta pinoigum monia tua. Bo nosambayang in sia kon i Tuhan,

⁷ bo ki Tuhan in noguman, “Duduiaidon in bayongan inta pinoigum in bangusa tatua kon inimu. Sin deemanbí iko in kinodoí monia, táe Akuoibí. Doídon in mosia aka Akuoi in mobaḻí datu monia.

⁸ Pinangkoimai Akuoi nodia kon i monia iḻumuai nongkon Mesir, mosia in nonoḻikudon kon i-Nakó bo nosumba kon dewa mita, bo onu in tanaa aidan monia kon inimu, tuata inta ain inaidan monia kon i-Nakó.

⁹ Tuamai in duduiaidon onu inta pinoigum monia; táe ogoiaidon in mosia in tompoingat totu-totuu, bo potaau kon i monia naonda in popoaid i datu kon i monia.”

¹⁰ Bayongan in tosingogon i Tuhan tua pinotaaudon i Samuel kon intau mita inta nopoigum in datu kon i monia, kainia,

¹¹ “Nanaa in bain popoaid i datumu kon i monimu,” natuata in pinogoginsilang i Samuel. “Pakisaanneadon in ki adímu mita tumuot in tontara; tongosilai nongkon i monia mobaḻí tontara inta tumakoi kon kereta, tongosilai doman in kon kabaḷo, bo ibanea mako in tontara inta maya-mayá in sioḷ.

¹² Ibanea in binaḻínea porwira inta mobaḻí itoi kon intau toribu, bo ibanea in mobaḻí itoi kon intau ḻima nopuḷú. Datu tatua in momakisa kon i adímu mita momajeko kon gobánea, monoinut kon bungai in boyónea, momia kon ḷoḷutamnea mita bo pakakat mita in kereta parangnea.

¹³ Ki adí mita monimu inta bobay pokiaidannea in ḷana mobondu pakéonnea bo mobaḻí mododungúnea bo mogogaid kon rotinea.

¹⁴ Gamáannea in gobámu tudunea, gobá in anggurmu, bo gobá in zaitunmu bo inta totok in mopia bo ogoinea kon pogawainea mita.

¹⁵ Gobá in tudunea bo gobá in anggurmu poigumanneadon kon pajak mopuḷú noporosen nongkon bungai in boyó, bodongka ogoinea kon porwira mita bo pogawainea mita.

¹⁶ Gamáannea in atamu, bobiagonmu inta totok in mopia bo keledaimu bo pakéonnea kon oaidannea.

¹⁷ Mopuḷú noporsen nongkon paanan in bembé dombamu in gamáannea. Bo moiko doman in baḻíonnea ki atanea.

¹⁸ Aka moiangoidon in wakutu tatua, moiko in mogamuibí totok popisí in datu inta piniḻí monimu tatua, táe ki Tuhan in doíbí mokidongog kon amui monimu tatua.”

¹⁹ Táe bangusa tatua in doíbí mokidongogmai kon tosingogon i Samuel tua, nodapotdon in mosia noguman, “Biódon mako! Kami naa in moibog bidon in datu tobatú.

²⁰ Kami in moibogdon motongkai in bangusa mita ibanea, datu nami in mustibí momarenta kon inami bo mobaḻí itoi nami kon poparangan.”

²¹ Naonda in ki Samuel nokodongog kon bayongan in tosingogon monia tatua, pinotaauneadon kon i Tuhan.

²² Ki Tuhan in notubag, “Duduiaidon mako in ibog monia tua bo duídon in datu tobatú kon i monia.” Onda intua ki Samuel nopotabá kon intau mita in Israel tatua nobui kon baḷoinea-baḷoinea.