SAMUEL 1 5 - Alkitab Singog In Mongondow Masa In Tanaa

Poti Dodandian kon yua-yuak in intau in Pilistin

¹ Naonda in intau in Pilistin nogagow kon Poti Dodandian i Allah, dinia monia nongkon Eben Haezer pinobayá in kotá monia, Asdod.

² Kon tua poti tatua dinia monia pinotuot kon kuil in dewa monia, ki Dagon, bo inukat kon símai in patong in dewa tatua.

³ Naonda in nobangon monik doḷo-doḷom intau mita in Asdod namangoi in kuil tatua, inontong monia in patong i Dagon noumpagdon moitongkob kon butá, kon tayowon in Poti Dodandian i Tuhan! Binuat monia in patong tatua bo inukat bui kon tampatnea.

⁴ Táe nopoikoḷomai kon singgai, doḷo-doḷom, bui inontong monia kon patong tatua in noumpagdon bui kon tayowonmai in Poti Dodandian tatua. Yo tanaa uḷu bo kokaḷ in patong tatua noputoḷ bo noigambat kon tayowon in ḷoḻingkop; tongádon awak in patong tatua in notompiapa. (

⁵ Tuamai, nodapot in singgai naa imang mita in dewa Dagon bo bayongan intau inta morosumba kon dewa tatua kon Asdod ḷumampang kon muna in ḷoḻingkop in kuil Dagon tatua bo diá rimitak.)

⁶ Onda intua ki Tuhan nohukum kon intau mita in Asdod bo kon butá mita inta kon diugneamai pinopoumaan-Nea in bobentuḷ mita kon awak monia.

⁷ Naonda in inontong monia onu inta yogot mobaḻí kon i monia tatua, mosia noguman, “Ki Allah in Israel nohukum kon inaton bo kon i Dagon dewa naton. Diábí motaau in pomayá mako naton kon naa in Poti Dodandian-Nea tantú kon naa koonggotonpa.”

⁸ Tuamai in nogoiní in mosia kon datu in Pilistin taya ḻima sin moyosipun, bo noḻibó, “Onuon naton in Poti Dodandian i Allah in Israel tatua?” Tubag in datu mita tatua, “Pampingdon kon kotá in Gat.” Dá, poti tatua pinampingdon kon kotá in Gat, kotá tobatú ibanea kon Pilistin.

⁹ Táe naonda in poti tatua noidapot kon tatua, ki Tuhan nohukum kon kotá tatua doman bo nopomuká in inta mokodoḻiok totok. Intau mita inta kon kotá tatua, pinomayá inta nongobagupa andeka inta ain noguyang ihukum takin pinopoumaan in bobentuḷ mita kon awak monia.

¹⁰ Bo Poti Dodandian tatua inatod kon Ekron, kotá in Pilistin ibanea doman. Naonda in yaput in kotá tatua in poti tatua, intau mita kon tua nomaḷú kai monia, “Poti Dodandian i Allah in Israel dinia mangoi kon naa sin moḻimod kon i naton komintan.”

¹¹ Tuamai mosia nogoiní kon bayongan datu in Pilistin sinbá moyosipun, bo noguman, “Pobuidon in Poti Dodandian i Allah in Israel tatua kon tampatnea inta muna sinbá diá ḻimodonnea in kita bo motoḷuadí naton.” Kon bayongan in kotá tatua nodoḻiokdon sin ki Allah nohukum nobogat totok kon intau mita inta nogutun kon tua.

¹² Intau mita inta diá minatoi, kinotugatan in bobentuḷ mita tatua, dá intau mita kon kotá tatua nomaḷú kon dewa mita monia, mokituḷung.