SAMUEL 1 4 - Alkitab Singog In Mongondow Masa In Tanaa

Poti Dodandian inagow in intau in Pilistin

¹ Kon dodai intua intau in Pilistin nopotabádon in bayongan in tontaranea sin moḻibut kon Israel; tuamai tontara in Israel minayá in tampat pinoparangan; mosia nononḷoḷaigan kon diug in Eben-Haezer, bo tontara in Pilistin nononḷoḷaigan kon Apek.

² Tontara in Pilistin nomangkoidon nonubu, bo naonda in nomangkoidon noparang totok, tontara in Israel sinaḷow bo degá opatmai noribu in minatoi kon pinoparangan tatua.

³ Naonda in kiagat in tontara inta sinaḷow tatua nobui kon pinononḷoḷaigan, itoi mita in Israel noguman, “Nongonu degá sin pinomayá bidon mako i Tuhan in kita sinaḷow in intau in Pilistin kon singgai in naa? Igai gamáan naton in Poti Dodandian i Tuhan nongkon Silo, bo diaan naton mangoi, sinbá ki Tuhan motuḷung kon inaton bo moposaḷamat kon inaton nongkon musung.”

⁴ Bo nopotabádon in mosia kon intau minayá in Silo sin mogamá kon Poti Dodandian i Tuhan inta nobaḻí tampat pomomarentaan i Tuhan Inta Totok in Mokawasa. Ki adí i Eli doyowa, ki Hopni bo ki Pinehas, dinumudui doman kon Poti Dodandian tatua.

⁵ Naonda in Poti Dodandian tatua nodapot kon pinononḷoḷaigan, norogiowdon noropot in intau in Israel, nodapot in nodandú in butá.

⁶ Intau in Pilistin nokodongog doman kon giow tatua bo mosia in noguman, “Nongonu sin intau mita in Ibrani tatua in norogiowbí?” Táe naonda in kinotaauan monia kon Poti Dodandian i Tuhan aindon dinia kon pinononḷoḷaigan in intau in Ibrani,

⁷ inagían in ondok in mosia, bo poḷat noguman, “Oyúon in dewa in namangoi kon pinononḷoḷaigan monia! Mobodito in kita! Diápa kon dodai in onda in kita noiyitak kon ná tanaa!

⁸ Moboditodon totuu! Ki ine in mokoposaḷamat kon inaton nongkon dewa mita inta moropot tatua? Degá dewabí mita tatua inta noḻimod kon intau mita in Mesir kon padang gurun koḻipod?

⁹ Korigon in ginamu, ei intau mita in Pilistin! Poparangdon ná ḷoḷaki, aka diá yo moiko in mobaḻídon ata in intau mita in Ibrani tatua, ná koḻipod mosia nobaḻí ki ata monimu. Tuamai in poparangdon takin kotorindog bo kobarani!”

¹⁰ Onda intua noparangdon totok in intau in Pilistin bo poḷat nonaḷow kon intau in Israel. Intau in Israel noḷagui minayá in ḷoḷaigannea-ḷoḷaigannea. Totuu moḷoben in kinotaḷowan tatua: aindon 30.000 in tontara in Israel in minatoi.

¹¹ Poti Dodandian i Allah inagow in musung in Israel, bo ki adí i Eli doyowa, ki Hopni bo ki Pinehas, minatoi.

Ki Eli minatoi

¹² Intau tobatú nongkon suku Benyamin noḷagui nongkon tampat pinoparangan kon Silo, bo noidapot intua kon singgaipa doman tatua. Nobaḻí tomponuot kon nonogumatoi, binerakneadon in pakeangnea bo nopongipúdon in sia in butá kon uḷu.

¹³ Ki Eli, inta totokdon in moḻia-ḻiaw in gina momikirmai kon kasaḷamatan in Poti Dodandian i Tuhan, ḻimitú mako kon kadera kon bingkí in daḷan, koyogot in momikirmai. Naonda in intau tatua nopotaaudon in habar kino taḷowan in Israel, bayongan in intau kon kotá tatua noguang totok.

¹⁴ Kinodongogan i Eli in ombaḷ monia tatua, bo noḻibó in sia, “Onu in mokodowawá tatua?” Kon dodai intua intau koina noribatuk minayá kon i Eli; naonda in noyaput, pinotaauneadon in habar inta diá mopia tatua.

¹⁵ Kon dodai intua ki Eli umurdon siow nopuḷú bo waḷu notaong bo matanea in diádon mosilang.

¹⁶ Intau tatua noguman kon i Eli, “Akuoi noḷagui in singgai naa nongkon tampat pinoparangan bo bagupa nodapot.” Ki Eli noḻibó kon inia, “Naonda in habar, adíku?”

¹⁷ Intau inta nodia kon habar tatua notubag, “Israel noḷagui kon intau in Pilistin. Kita in sinaḷow totok. Nobayong in intau in minatoi, ki adí doman i amá inta doyowa, ki Hopni bo ki Pinehas. Bo Poti Dodandian i Allah inagow in musung!”

¹⁸ Naonda in intau tatua nopotaau in soaḷ Poti Dodandian tatua, ki Eli noḷabú noiboḻingkayang nongkon kaderanea kon ḻimako in ngara moḷoben. Nogoguyangdon totok in sia bo noḷongó dá naonda in noḷabú sigogownea noputoḷ, bo poḷat minatoi in sia. Sia in nobaḻí itoi kon Israel opat nopuḷú notaong in koonggotnea.

Ki Baḷú i Pinehas minatoi

¹⁹ Kon dodai intua ki buḷoi i Pinehas inta ki adí i Eli, sidiadon moḷoben, bo diádon moonggot in mononggadí. Naonda in dinongognea kon Poti Dodandian i Allah ain inagow, bo ki nunutonnea takin ki buḷoinea in minatoidon, daḻídon in sia nokorasa kon nakit sin mononggadí, bo diá noonggot kon tua nononggadídon in sia.

²⁰ Naonda in sia gogiódon matoi, bobay mita inta notuḷung kon inia noguman, “Mokoposabarbí! Ḷoḷaki in ki adímu naa!” Tongá diábí in sia notubag ande nonarukiramai kon i monia.

^21-22 Adí tatua sinangoiannea ki Ikabod, kainia, “Koangoian i Allah Inta Momulia nobuḻidon nongkon Israel.” – Inta imakusudnea tua in Poti Dodandian aindon inagow bo ki nunutonnea takin ki buḷoinea minatoi domandon. Tuamai sia noguman, “Koangoian i Allah Inta Momulia nobuḻidon nongkon Israel, sin Poti Dodandian i Allah inagowdon.”