SAMUEL 1 30 - Alkitab Singog In Mongondow Masa In Tanaa

Parang noḷawang kon intau in Amalek

^1-5 Doyowa nosinggai noiduduimai, ki Daud bo intaunea nobui kon kotá in Ziklag. Naonda in noiyaputmai kon tua, kinotambakanmai monia kon intau in Amalek ain nonubu kon dotá i toḷatan butá in Yohuda bo nonubu kon Ziklag. Mosia in diábí noḻimod kon tobatúmai in intau. Táe sinurub monia komintan in kotá tatua bo nongingguput kon bobayáan monia takin nodia kon bobay mita, adí mita bo intau mita ibanea inta nogutun kon tua. Mosia in nodomok domandon kon motoḷuadí i Daud bo motoḷuadí in intaunea mita, noitakin doman in ki buḷoi Daud taya dua, ki Ahinoam bo ki Abigail. Noajar totok in gina i Daud takin gina in intaunea mita, dá mosia in nongombaḷdon diá nodona-doná nodapot in noḻemédon in mosia.

⁶ Noajar totok in gina in intau mita i Daud sin mosia in kinobuḻiandon in adí bo buḷoi monia. Tuamai in mosia moibogdon mogandur in batu kon i Daud. Dá noyogintayowdon in roriga moḷoben in ki Daud, táe ginanea in inirigonan bui i Tuhan Allahnea.

⁷ Bo ki Daud in noguman kon i Imang Abyatar adí i Ahimelek, “Diadon mangoi in epod tatua!” Dá dinia i Abyatar in epod tatua kon inia.

⁸ Onda intua noḻibódon in ki Daud kon i Tuhan, “Musti degá batukonku in banselang mononubu tatua? Mokobatuk degá in akuoi kon i monia?” Ki Tuhan notubag, “Oo, batukdon; kobatukanmubí in mosia bo poḷuatonmu in intau mita inta sinoko domok tua.”

^9-10 Bo nobuatdon in ki Daud takin intaunea inta onom nogatut tua. Naonda in mosia nodapot kon Ongkag in Besor, ki Daud in nongingguput kon bobayáannea noyotakin in intau 400; táe inta 200 ibanea in nogutunpa kon tua. Popisí in noḷopídon totok bo diádon mokoḷoḷan kon Ongkag in Besor.

¹¹ Kon binayáan tatua intau i Daud in noyodungkuḷ in ḷoḷaki tobatú intau in Mesir kon dogami, bo dinia in sia kon i Daud. Inogoian in sia in kaanon bo inumon,

¹² bo kukis bungai in ara, bo doyowa nobogot in anggur noingkag. Naonda in nopaḷut mako in sia nongaan, noguḻídon bui in ropotnea; noniata magí yo ain toḷu nosinggai in sia in diá nopongaa-ngaan bo diá noponginu-nginum!

¹³ Onda intua ki Daud noḻibó kon inia, “Ki ine in ki Tuangmu, bo nongkon onda in iko?” Tubag in adí tatua, “Akuoi intau in Mesir, ata in intau in Amalek. Akuoi in sinaḷáan i tuangku toḷudon nosinggai naa popisí in notakit in akuoi.

¹⁴ Kami ain nonubu kon butá in intau in Kreti kon dotá in toḷatan in Yohuda bo butá in inanakan i Kaleb, bo kami ain nonurub kon bayongan kotá in Ziklag.”

¹⁵ Bo ki Daud in noḻibó kon inia, “Moibog degá in iko mogatod kon inakó mayá in tampat in banselang tatua?” Tubagnea, “Moibog in akuoi, asaḷ bo ki Tuang in modandi kon inakó podoyon kon tangoi i Allah, kon akuoi in diábí ḻimodon i Tuang andeka ogoi i Tuang kon i tuangku.”

¹⁶ Bo inatodnea in mosia kon tampat in banselang mita tatua. Kon dodai intua banselang mita tatua noyotontaní kon bayongan in tampat tatua, yogot in nongaan, nonginum bo norame totok sin nobayong totok in barang inagow inta ain dinia monia nongkon butá in Pilistin bo Yohuda.

¹⁷ Kon dodai in mata in singgai nobayagdon nobangon monik, mosia in sinubu i Daud, bo nobaḻídon in parang nodapot in doḷom. Koḻikud in opat nogatut in tayowmobiag inta noḷagui takin sinumakoi kon unta, diábí tobatúmai in musung in nokoḷagui.

¹⁸ Ki Daud in nokoagowdon bui kon bayongan inta ain inagow in intau mita in Amalek, noitakin doman in ki buḷoinea doyowa;

¹⁹ diábí in tobatúmai in nobuḻi. Bayongan in adí ḷoḷaki bo bobay takin bayongan barang inta inagow inta ain ginamá in intau in Amalek, ginamá bui i Daud.

²⁰ Koḻikud intua ki Daud nogagow doman kon bayongan in domba bo bobiagon. Biag mita tatua dinia in intau i Daud kon muna, noitondí kon bayongan in barang inta inagow ibanea, bo noguman in mosia, “Naa in tonsilai kon i Daud!”

²¹ Nopaḷut mako kon tua buidon in ki Daud minayá kon intaunea inta doyowa nogatut inta diádon notaau sinumakin sin noḷopídon totok, bo inta sinaḷáanneadon kon bingkí in Ongkag in Besor. Nonontomu in mosia kon i Daud bo intaunea, bo dinimiug in ki Daud poḷat nodati kon i monia.

²² Táe kon sigad in intau mita i Daud inta noyotakinnea, oyúon in moraat bo motamaa. Mosia in noguman, “Intau mita tanaa in diá dinumudui; dá mosia in diábí motaau in silaian in barang mita inta inagow tatua. Mosia in tongábí motaau mogamá kon i buḷoi bo adí monia, bo mayá.”

²³ Táe ki Daud in notubag, “Utatku mita, dikabí pomiaan monimu natua in onu inta ain inogoi i Tuhan kon inaton! Diábí degá kinotaauan monimu kon kita in iḷukadan-Nea bo pinopountung-Neadon nongkon banselang mogogagow tatua?

²⁴ Dá dikabí tobatúmai in intau in moibog kon onu in pinoigum tatua! Komintanbí mokouḻí kon tonsilai inta motongkai in kobayongnea: intau inta diá minayá sin noḷukad kon pakakat mita in mustibí doman mokouḻí kon tonsilai motongkai i monia inta minayá noparang.”

²⁵ Onda intua soaḷ tatua binaḻí i Daud atorang tobatú, bo dinuduian kon Israel dapot in tanaaya.

²⁶ Naonda in ki Daud nobui kon Ziklag, nokidia in sia in tongo tonsilai nongkon barang mita inta inagow tatua kon itoi mita in kotá in Yohuda inta ain notuḷung kon inia, gumannea, “Naadon in tombuinag kon inimu nongkon barang inta inagow inta ginamá nami nongkon musung i Tuhan.”

^27-31 Kotá mita tatua in Betel bo Rama kon dotá in toḷatan Yohuda, Yatir, Aroër, Sipmot, Estemoa, Rakhal, bo kotá doman mita in intau in Yerahmeel, kotá mita in intau in Keni, Horma, Bor-Asan, Atakh bo Hebron. Bayongan in kotá inta ain kinobayáan i Daud bo intaunea, in pinoki diaannea in tombuinag tatua.