SAMUEL 1 3 - Alkitab Singog In Mongondow Masa In Tanaa

Ki Tuhan nokipogontong kon i Samuel

¹ Kon dodai intua, ki Samuel inta mongoadípa tua nogundoi kon i Tuhan kon bonu in totundú i Eli. Kon tungkuḷ intua moḷawádon totok in oyúon in koyow bo oontongon nongkon i Tuhan.

² Kon doḷom tobatú, ki Eli inta totokdon in nogoguyang bo gogiódon nobilog, nosiug mako kon gopotnea,

³ bo ki Samuel in nosiug kon diug in Poti Dodandian i Tuhan, kon bonu in Ḷoḷaigan Motusi. Kon dodai in diápa nobayag bo togá koyongki-yongkitpa,

⁴ ki Tuhan nogoiní kon i Samuel, bo ki Samuel notubag, “Ya, Amá!”

⁵ Onda intua noribatuk in sia minayá kon i Eli bo noḻibó, “Nongonu Amá? Nongonu sin mogoiní in ki Amá kon inakó?” Táe ki Eli notubag, “Diábí in akuoi nogoiní kon inimu, posiugdon bui uḻe.” Bo buidon minayá nosiug in ki Samuel.

^6-7 Onda intua ki Tuhan bui nogoiní kon i Samuel, táe diábí kinotaauan i Samuel kon ki Tuhanbí in nogoiní kon inia tua, sin diápabí kon dodai in onda in ki Tuhan noyosingog takinnea. Tuamai in nobangon in sia, bo bui minayá kon i Eli bo noḻibó, “Nongonu Amá? Nongonu sin mogoiníbí in ki Amá kon inakó?” Ki Eli notubag, “Diábí in akuoi nogoiní kon inimu, adíku; posiugdon bui.”

⁸ Kon intoḷuneadon ki Tuhan nogoiní kon i Samuel; bo nobangondon in ki Samuel bo minayá nokipodungkuḷ kon i Eli poḷat noḻibó, “Nongonu Amá? Nongonu sin mogoiní in ki Amá kon inakó?” Kon dodaidon intuata kinotaauandon i Eli kon ki Tuhanbí in nogoiní kon adí tatua.

⁹ Tuamai noguman in sia kon i Samuel, “Posiugdon bui uḻe, bo aka iko bui oiníon yo pogumandon nanaa, ‘Pogumandon, Tuhan, indongoganbí in mogogundoimu naa.’ ” Bo buidon minayá in ki Samuel kon tampat pinosiugannea.

¹⁰ Onda intua namangoidon in ki Tuhan, bo sinimindog kon tampat tatua poḷat nogoiní bui, “Samuel, Samuel!” Bo ki Samuel in notubag, “Pogumandon, Tuhan, indongoganbí in mogogundoi-Mu naa.”

¹¹ Bo nogumandon in ki Tuhan kon inia, “Mogaidon in Akuoi kon inta totok in motoyang kon intau in Israel, dá bayongan in intau inta mokodongog kon tua in motoboḻingodon.

¹² Kon singgai tatua mogaidon in Akuoi kon bayongan inta ain pinotaau-Ku kon motoḷuadí i Eli nongkon pinomangkoianmai nodapot in pangabisan.

¹³ Aindon pinotaau-Ku kon inia kon motoḷuadínea in umuran hukumon-Ku popisí in ki adínea mita ain nokopoonagmai kon i-Nakó. Kinotaauanbí i Eli in dosa mita monia tua, táe diábí sinorúannea.

¹⁴ Tuamai in Akuoi mongibot soaḷ motoḷuadí i Eli, kon dosa monia inta totok in moḷoben tua diábí kopopatan in kuruban andeka sosumba onuka kinoouputbí in kobiagan monia.”

¹⁵ Nopaḷut mako kon tua ki Samuel nosiugdon bui, bo naonda in doḷo-doḷom nobangon in sia bo nomukat kon ḷoḻingkop mita in Baḷoi i Tuhan. Moondok in sia in mopotaau kon i Eli kon onu inta inontongnea tatua,

¹⁶ táe ki Eli in nogoiní kon inia, kainia, “Samuel, adíku.” Tubag i Samuel, “Ya, Amá.”

¹⁷ Ki Eli noḻibó, “Onu in pinotaau i Tuhan kon inimu? Oumandon komintan kon inakó. Aka oyúon in bunionmu, yo hukumon i Allah in iko.”

¹⁸ Dá pinotaaudon komintan i Samuel kon i Eli intua. Diábí tobatúmai in binuninea. Onda intua ki Eli nogumandon, “Sia in ki Tuhan, pomayádon mako in Sia mogaid kon onu inta inanggap-Nea mopia.”

¹⁹ Ki Samuel nodugangdon nointoi. Ki Tuhan umuran koyota-yotakinnea bo noponiatadon kon bayongan in onu inta siningog i Samuel.

^20-21 Tuamai in bayongan umat in Israel nongkon bayongan butá tatua nongaku kon ki Samuel tua in nabi i Tuhan. Pomuḷoi in ki Samuel mosingog, bayongan in bangusa Israel in mokidongogdon. Ki Tuhan umuranpabí mokipogontong kon Silo, kon tampat inta pinoki pogontongan-Nea muna kon i Samuel bo moyosingognea.