SAMUEL 1 29 - Alkitab Singog In Mongondow Masa In Tanaa

Ki Daud pinotabádon in intau in Pilistin nobui

¹ Intau in Pilistin nosipundon kon bayongan in tontaranea kon Apek, bo intau in Israel in nononḷoḷaigan kon diug in bokaká kon Ḷopá in Yizreel.

² Datu in Pilistin taya ḻima minayá nopipid takin pinonobatúan-pinonobatúannea inta kon batúannea oyúon in tumogogatut bo oyúon in tumongoribu in intau; ki Daud bo intaunea in nopipid kon tumi noyotakin i Datu Akhis.

³ Tongguḷu totokan mita in tontara intau in Pilistin nokoontong kon i monia bodongka noḻibó, “Mongonu kon naa in intau mita in Ibrani tatua?” Ki Akhis in notubag, “Naa in ki Daud, inta koḻipod in nobaḻí pogawai i Datu Saul nongkon Israel. Sia in noḻin onggotdon in nogutun kon inakó. Pinangkoipa kon namangoi in sia kon inakó nodapot in singgai naa, diápabí kon dodai in onda in sia kinokadapatanku in nomia kon noitaḷá.”

⁴ Táe sinumorú in tongguḷu totokan mita in Pilistin tatua kon i Akhis poḷat noguman kon inia, “Potabádon in intau mita tatua kon kotá inta ain inogoimu kon inia. Diábí motaau in sia in moparang moyotakin naton; dika-dika bo momangkangdon in sia kon inaton naonda in koyogot moparang. Sin tanaa in kasampatannea inta totok in mopia modondouḷug kon i datunea pongin moḻimod kon intau mita naton?

⁵ Ki Daud in sia naa? Kon iniadon naa inta koḻipod bobay mita notayok bo sindaḷan nodondong nanaa, ‘Ki Saul ain noḻimod kon ribuan in musung, táe i Daud in puḷúandon ribu.’ ”

⁶ Bo inoinídon i Akhis in ki Daud bo noguman kon inia, “Akuoi naa in mopirisaya podoyon kon i Tuhan inta nobiag, kon iko nion in mosatiabí kon inakó. Mopiabí in ginaku aka iko motaau moyotakinku kon poparangan tanaa. Sin pinangkoipamai in iko namangoi kon inakó nodapot in tanaa mako, diábí kinokadapatanku in iko kon taḷámu. Táe datu mita ibanea in doí kon inimu.

⁷ Tuamai in pobuidon takin saḷamat, bo dikadon momia kon onuka inta mokopomuká kon torú monia.”

⁸ Ki Daud in notubag, “Taḷábí onu degá inta ain inaidan in bobantung naa, Tuang datu? Aka ná kain tosingogon i Tuang datu, ki Tuang datu in diábí kon dodai onda in nokouḻí kon taḷá in bobantung naa pinangkoi kon akuoi in nobantung kon i Tuang datu nodapot in tanaa, yo nongonu sin bobantung naa in diábí ogoi moparang monayow kon musung i Tuang datu?”

⁹ Tubag i Akhis, “Kinotaauanmubí kon iko in inanggapkudon mosatia naonda bo malaekat i Allah. Táe tongguḷu totokan mita in tontara tatua ain nonatú kon singog kon iko in diábí motaau in dumudui moparang moyotakin nami.

¹⁰ Manangka intua Daud, ikoḷom in moiko komintan inta ain nonaḷámai kon i Saul bo namangoi kon inakó, musti mobangon doḷo-doḷom bo ḷagi mobuat naonda in momuká in mata in singgai.”

¹¹ Tuamai in nobangon monik doḷo-doḷom, nobuatdon in ki Daud takin intaunea mita nobui kon butá in Pilistin, bo tontara in Pilistin in nobuat minayá in Yizreel.