SAMUEL 1 21 - Alkitab Singog In Mongondow Masa In Tanaa

Ki Daud noḷagui kon i Saul

¹ Dá minayádon in ki Daud kon i Imang Ahimelek kon Nob. Noitaḻikokog in ki Ahimelek iḻumuai nokipodungkuḷ kon i Daud bo noḻibó kon inia, “Nongonu sin iko in namangoi tongábí iko-iko mita?”

² Ki Daud in notubag, “Akuoi ain pinopoabatan i Tuang Datu in oaidan bo diánea ogoi potaau kon i ineka in oaidan tatua. Tuamai intauku ain pinoki oḷatanku kon tampat tobatú.

³ Ampungdon, moḻibó in akuoi in tanaa, onu degá in kaanon nion kon i Amá? Ogoiaipa in akuoi in roti ḻima nobatú andeka onukadon in oyúon kon naa.”

⁴ Bo imang tatua noguman, “Diá in roti biasa in kon inakó, tongá roti sosumba in oyúon; motaaubí in iko mogamá kon tua, asaḷ bo intaumu mita in diá nosiug takin bobay in nobagumai naa.”

⁵ Ki Daud in notubag, “Notantú bidon kon diábí inaidan monia intua. Tantúbí aka kami mayá moparang, intauku mita in umuranbí moḷukad sinbá mosia in umuran modarit podudui in agama, bokaka biasamai tua in tongábí oaidan mita biasa; apa doman oaidan inta ain sinantú ná tanaa!”

⁶ Bo ki imang tatua in nobogoi in roti sosumba kon i Daud, sin inta oyúon kon inia in tongádon roti inta pinosumba kon i Allah, bo ain ginamá nongkon mezbah sin baḷuiandon in roti inta mobagu. (

⁷ Noitongkaná, in ki Doëg intau in Edom, itoi in gombala in bobiagon i Saul kon tua in singgai tua sin momaḷut kon onu inta sinantú kon agama.)

⁸ Onda intua ki Daud noḻibó kon i Ahimelek, “Degá notagú in ki Amá kon pandong andeka kedang inta motaauku pakéon? Parenta i Tuang nodaḻin-daḻí totok dá akuoi nobuat iḻimika-ḻikat totok bo diádon nokopogamá kon kedang andeka abit ibanea.”

⁹ Bo tubag i Ahimelek, “Akuoi in notagú kon kedang i Goliat, intau in Pilistin inta iḻimodmu kon Ḷopá in Ela tatua; kedang tatua in sinagúku kon tumimai in Epod, binakut in ketek. Aka moibog in iko, dá gamádon, sin tongádon tua in abit in oyúon kon naa.” Guman i Daud, “Kedang tatua in kedang inta totok in mopia kon bayongan in butá kon naa, ogoidon kon inakó intua!”

¹⁰ Kon singgai domandon tatua ki Daud noḷagui kon i Saul, bo noyaputdon in sia kon i Akhis datu in kotá in Gat.

¹¹ Pogawai mita i Akhis in noguman nanaa kon i Akhis, “Siabí nion in ki Daud, datu kon butá tanaa! Bo kon iniabí nion kon dodai intua in bobay mita notayok sindaḷan nodondong nanaa, ‘Ki Saul in noḻimod kon ribuan in musung, táe i Daud in puḷúan ribu!’ ”

¹² Tosingogon mita tatua monuyayow kon raian i Daud, bo inagían totok in ondok in sia kon i Datu Akhis.

¹³ Tuamai, kon tayowon in intau mobayong ki Daud ki ubo-uboḷmai nobundai. Naonda in mosia monungkuḷ modomok kon inia, sia naonda bo diá noratakmai; nongamburung in sia kon ngara in kotá bo nopomayádon mako in ibognea ḷumoḷayat kon kuminea.

¹⁴ Bo ki Akhis in noguman kon pogawainea mita, “Eta degá diábí inontong monimu in intau nobundai tanion? Nongonu sin diniabí monimu namangoi?

¹⁵ Degá diápa tugat in intau nobundai in kon diugkumai naa, dá podiaanpa bui monimu kon intau nobundai mamangoi in baḷoiku naa?”