SAMUEL 1 18 - Alkitab Singog In Mongondow Masa In Tanaa

^1-2 Naonda in ki Saul bo ki Daud nopaḷut nongonguman, ki Daud binaḻí i Saul pogawainea bo pinangkoidon kon singgai tatua sia in diádon inogoi nobui kon baḷoi in guyanganea. Ki Yonatan adí ḷoḷaki i Saul, ain nokodongog kon pinongonguman monia tua. Nopia doman in ginanea kon i Daud, bo kinotabinea in ki Daud ná kinototabinea kon awaknea tontaní.

³ Tuamai in nongibot in ki Yonatan kon umuranbí moyobayat i Daud kinoouput in kinobiagannea.

⁴ Ki Yonatan noḷongkut kon jubahnea bo inogoinea kon i Daud, ná doman tua in ḷambung in parangnea takin kedangnea, piotnea bo bogot in ogotan.

⁵ Mopia komintan in pinogogai i Daud kon bayongan inta pinoki aid i Saul kon inia. Tuamai in binaḻí i Saul in sia porwira kon bonu in tontaranea, bo ki Daud in kinoibog in bayongan tontara bo bobantung mita i Saul.

Ki Saul nointoi kon i Daud

⁶ Kon dodai in ki Daud nobui naonda in nonaḷow mako kon i Goliat intau in Pilistin tatua, bo tontara mita nopipid in sinumuot kon bonu in kotá, bobay mita iḻumuai nongkon bayongan in kotá kon Israel sin motomu kon i Datu Saul. Mosia in nopodondong in dondong ḷunganga in gina, mosia notayok takin nopogogitog in rebana bo kecapi.

⁷ Koyogot in notayok bobay mita nodondong nanaa, “Ki Saul noḻimod kon ribuan in musung, táe i Daud in puḷúan ribu.”

⁸ Nokodongogmai kon natua, sinumorú totok in ki Saul. Sin irainea, “Ki Daud in inanggap ain noyopú kon puḷúan ribu, bo akuoi in tongábí ribu. Diádon moonggot bo baḻíon monia in sia datu!”

⁹ Pinangkoidon kon singgai tua mointoi in sia kon i Daud.

¹⁰ Nopoikoḷomai kon singgai ki Saul kon bonu in baḷoinea kokada-kadai in pandongnea bo daḻídon in sia kinawasaan in dimukud moraat inta pinotabá i Allah, nodapot in sia irumobut naonda bo intau nobundai. Kon dodai intua ki Daud mopogogitogmai in kecapi ná biasamai.

¹¹ “Ponakuḷku in pandong tanaa kon i Daud dapot in moidapot kon dinding!” tua in kon raian i Saul, bo pinonampoknea in pandong tatua kon i Daud kodua, táe ki Daud sinimí.

¹² Kinomangaḻeandon i Saul kon iḷukadandon i Tuhan in ki Daud táe sia in sinaḷáandon i Tuhan. Tuamai inagíandon in ondok in sia kon i Daud.

¹³ Dá pinampingneadon in ki Daud kon komaḻig, bo binaḻíneadon itoi kon tontara toribu. Dá ki Daud in mobaḻí itoi kon tontara mita tatua kon pomuḷoi in poparangan.

¹⁴ Umuran in sia mokoḷapat kon bayongan in oaidannea, sin ki Tuhan in notuḷung kon inia.

¹⁵ Naonda in inontong i Saul kon ki Daud umuran mokoḷapat kon oaidannea, nodugangdon in ondoknea kon i Daud.

¹⁶ Táe bayongan intau in Israel bo Yohuda motabi kon i Daud sin sia in nobaḻí itoi inta mobayong in inaidannea inta mopia.

Ki Daud notonibuḷoi i adí bobay i Saul

¹⁷ Ki Saul nonomayá kon bá ki Daud ḻimodon in intau in Pilistin kon bonu in parang sinbá deemandon sia tontaní in moḻimod kon inia. Dá kon singgai tobatú noguman in ki Saul kon i Daud, “Ki Merab ki adíku bobay guya-guyang, potonibuḷoiku takinmu, asaḷ bo poontongmupa in koḷoḷakimu kon bonu in parang sin kopontingan i Tuhan.”

¹⁸ Ki Daud in notubag, “Ki inebí in bobantung naa, bo ki inedon in kami motoḷuadí i amáku kon Israel, modapot in mobaḻí mototaka i Datu?”

¹⁹ Táe naonda in wakutuneadon ki Merab popobuḷoi kon i Daud, indoianmai adí bobay tatua in pinopotonibuḷoibí kon i Adriel nongkon Mehola.

²⁰ Ki Mikhal adí bobay i Saul inta ibanea noibogdon kon i Daud. Naonda in ki Saul nokodongog kon tua, noibog doman in sia.

²¹ Kainia, “Tungkuḷanku ḻibóon kon i Daud mongo moibog in sia kon i Mikhal, sinbá ki Daud moaḷapku bo koḻimodan in intau in Pilistin.” Dá kon induaneadon in ki Saul noguman kon i Daud, “Tanaa iko in motaaudon mobaḻí mototakaku.”

²² Bo nopotabá in sia kon pogawainea mopotaau intua kon i Daud takin umuni-uni, nanaa, “Ki Tuang Datu motabi kon inimu bo natua doman in bayongan in pogawainea; dá naadon in wakutunea inta mopia kon inimu mononibuḷoi kon i adínea.”

²³ Táe naonda in mosia nopotaau intua kon i Daud, sia in notubag, “Kai monimu kamai yo mogampangbí in mobaḻí mototaka in datu? Akuoi naa in intau nobogá bo diá in mangaḻenea!”

²⁴ Pogawai mita tatua nopotaau in tubag i Daud tatua kon i Saul,

²⁵ bo ki Saul in nopotabá kon i monia noguman kon i Daud, nanaa, “Inta kinoibog i Tuang inta baḻíon buḷawan tontogot in tonibuḷoi in tongábí mogatut in kuḻit ponoitan kon intau in Pilistin, saḷaku tontuḻí kon musung i Tuang.” (Naa in nobaḻí tomayá i Saul sin moḻimod kon i Daud pongin ḻima in intau in Pilistin.)

^26-27 Pogawai mita i Saul nopotaau in koyow tatua kon i Daud, bo sinarima i Daud in tosingogon i datu. Tuamai, kon dodai in wakutunea inta sinantú modait, minayá in sia noyotakin intaunea mita kon butá in Pilistin. Iḻimodnea in 200 in intau in Pilistin, bo ginamánea in kuḻit inta pinonoitan kon i monia, bo inogoinea kon i Saul takin diábí nogaat tobatúmai. Onda intua ki Saul nopotonibuḷoidon kon i Mikhal takin i Daud.

²⁸ Natua in nobaḻí dá kinotaauandon i Saul kon ki Tuhan in noḷukadon bo kinotabi i Mikhal; adínea bobay.

²⁹ Dá nodugangdon in ondoknea kon i Daud bo kinodoíneadon in ki Daud kinoouputbí in kobiagannea.

³⁰ Pomuḷoi in aka tontara in Pilistin mamangoi monubu, i Daud in mobayo-bayong in ḻimodon nongkon porwira mita i Saul inta ibanea. Dá totokdon in ponango-nangoian in ki i Daud.