SAMUEL 1 14 - Alkitab Singog In Mongondow Masa In Tanaa

Ki Yonatan nobaḻí pahlawan

¹ Kon singgai tobatú ki Yonatan noguman kon tayowmobiag inta nodia kon ḷoḷutamnea, “Igaidon mayá in kita kon poḷoḷukadan in intau in Pilistin kon ḷoḷanmai tatua!” Táe diábí in sia noguman muna kon i amánea.

² Kon dodai intua ki Saul in kon siungon in pangkoi in delima kon Migron, diá noyayú nongkon Gibea. Rayat inta dinumudui kon inia in degá 600 in kobayongnea.

³ (Imang inta nodia kon epod in ki Ahiya adí i Ahitub, inta ki utat i Ikabod adí i Pinehas, bo ki Pinehas ki adí i Eli, in imang i Tuhan kon Silo.) Kinotaauan domandon in rayat kon ki Yonatan in minayá domandon nongkon tua.

⁴ Mopobayá ná kon poḷoḷukadan in intau in Pilistin tatua, ki Yonatan musti mongin sigad in batu karang inta tumpaḷa notonggoruit, tangoinea in Bozes bo Sene.

⁵ Batu karang inta kon dotá in utuan noitayow kon Mikhmas, bo inta kon dotá in toḷatan noitayow kon Geba.

⁶ Dá nogumandon in ki Yonatan kon tayowmobiag tatua, “Igai mayá in kita kon poḷoḷukadan in intau in Pilistin inta kaper tatua. Dika-dika ki Tuhan moibogpabí motuḷung kon inaton. Sin ki Tuhan in motaaubí mobogoi in kauntungan pinomayá momaké in intau mobayong andeka intau moyakag.”

⁷ Tayowmobiag tatua in notubag, “Onukabí in pomiaan i Tuang, moibogbí in bobantung.”

⁸ “Mopia,” guman i Yonatan. “Kon wakutu in iḷumoḷan, mokipogontong in kita kon intau mita in Pilistin tatua.

⁹ Aka pokigogaian monia in kita bo mogoḷat modapot in mosia mamangoi kon inaton, dá kita in umurandon kon tua bo dikadon ḷumoḷan.

¹⁰ Táe aka pokiangoian monia in kita kon i monia, dá mayá intua in kita, sin tuadon in nobaḻí tomponuot kon mosia in inogoidon i Tuhan kon inaton.”

¹¹ Naonda in taya dua nokipogontong kon intau in Pilistin kon poḷoḷukadan tatua, dá intau mita in Pilistin tatua noguman, “Indoiaika, oyúon in intau mita in Ibrani in iḻumuai nongkon bubú mita tampat pinogadopan monia!”

¹² Onda intua mosia nomaḷú kon i Yonatan bo bobantungnea, “Potakodon mangoi kon naa sinbá oyúon in poontong nami kon inimu!” Bo ki Yonatan in noguman kon tayowmobiag tatua, “Duduidon kon inakó, sin mosia in inogoidon i Tuhan kon Israel.”

¹³ Kotaki-takin in tayowmobiag tatua in ki Yonatan kinumuá in notakod. Naonda in ki Yonatan noitukat, mongoobatdon in intau mita in Pilistin in bongkugonnea, bo nongkon tumi, tayowmobiag tatua in moḻimod kon i monia.

¹⁴ Kon pinonubuan dungkuḷ tatua, ki Yonatan bo tayowmobiag tatua in noḻimod kon degá doyowamai nopuḷú in intau kon butá inta degá tonggopatmai in hitare.

¹⁵ Onu inta nobaḻí tatua nokodoḻiok kon intau in Pilistin kon pinononḷoḷaigan bo kon popokaanan mita in bobiagon. Bayongan rayat in Pilistin takin tampat mita poḷoḷukadan bo paanan mita in mogogagow noondokdon; nodapot in butá nodandú, bo totokdon in nodowawá.

Intau in Pilistin sinaḷow

¹⁶ Bo kon dodai intua tontara i Saul inta noḷukad kon Gibea kon butá in Benyamin, nokoontong kon intau in Pilistin noḷagui moiagí-ako totokdon in motoboḻingo.

¹⁷ Dá nogumandon in ki Saul kon intaunea, “Iapdon in tontara mita bo taridiaidon mongo ki ine in diá.” Inaidandon monia intua bo kinotaauandon kon ki Yonatan bo tayowmobiag mododia kon ḷoḷutamnea in diá onda.

¹⁸ “Podiadon kon epod tatua mangoi,” guman i Saul kon i Imang Ahia. (Kon singgai tua ki Ahia in nodia kon epod tatua kon tayowon intau in Israel.)

¹⁹ Naonda in ki Saul mongongumanmai takin i imang tatua, kodoḻiokan kon bonu in pinononḷoḷaigan in intau in Pilistin modugangdon totok, dá ki Saul in noguman kon i imang tatua, “Diádon in kasampatan naton mopoigum in totundú nongkon i Tuhan!”

²⁰ Bo ki Saul takin intaunea mita in noyododaidon minayá in tampat pinoparangan. Kon tua inontongdon monia in tombauk kon sigad in intau in Pilistin; mosia moropatoi bo mosiḻimodandon.

²¹ Intau mita in Ibrani inta noonggotdon in nogutun kon butá in intau in Pilistin, bo inta sinumakin kon tontara monia, nomurow bo dinumugangdon kon i Saul bo kon i Yonatan.

²² Ná doman tua in intau mita in Israel inta nogadop kon buḷud mita in Epraim, inta nokodongog kon intau in Pilistin ain noḷagui, dinumugangdon bo nonubu kon intau in Pilistin tatua.

²³ Mosia in noparang kinoouput in daḷan nodapot in noitaḻib kon Bet-Awen. Ki Tuhan noposaḷamat kon Israel in singgai tua.

Bayongan inta nobaḻí nopaḷut mako noparang

²⁴ Kon singgai tatua intau mita in israel moḻemédon popisí in gogoyon, sin ki Saul in nongibotdon nanaa, “Kutukondon in intau inta mokaan kon onuka kon singgai in naa kon dodai in akuoi diápa motuḻí kon musungku.” Tuamai in diá tobatúmai in intau in nongaan in tosinggai tua.

²⁵ Onda intua nodapotdon in mosia komintan kon kayuon tobatú bo nokouḻí kon biluk mobayong totok,

²⁶ táe diábí in tobatúmai in nokaan kon biluk tatua, sin moondok in kotugatan in kutuk inta siningog i Saul.

²⁷ Táe ki Yonatan in diábí nonotaau kon ki amánea ain nonontot kon rayat takin kutuk tatua; tuamai in tungkudnea pinotundúneadon, bo pinopoturaknea kon pugad in biluk tatua, bodongka ginamánea in biluk tatua bo poḷat kinaan. Dá baḷúdon kinorasaannea kon mosehat bo nodugangdon noropot.

²⁸ Onda intua tontara tobatú inta kon sigad mita in tontara tatua noguman kon inia, “Kami komintan in diádon kodaya sin gogoyon. Táe ki amá i Tuang ain nonontot kon inami takin ibot, kainia, ‘Kutukondon in intau inta nongaan kon singgai in naa.’ ”

²⁹ Ki Yonatan in notubag, “Moiḻiudon totok in dodia i amáku tatua kon bangusa naton! Indoiai, kaadaanku tanaa in mopia-piadon naonda in akuoi nokaan kon biluk topiḻik.

³⁰ Aka kuma rayat kon singgai in naa ogoidon mokaan kon kaanon inta ain inagownea kon dodai in nonaḷow kon musung, yo notantúbí kon mobayongbí totok in intau in Pilistin in iḻimod naton!”

³¹ Kon singgai tua intau in Israel nonaḷow kon intau in Pilistin naonda in noparang kino ouput in daḷan nongkon Mikhmas dapot in Ayalon. Táe nopaḷut mako kon tua noḷopídon totok in mosia,

³² dá nogogagowandon in mosia in nogamá kon onu inta inagow nongkon musung; mosia in nogamá kon domba bo sapi bodongka iratá monia kon tua doman, bo bayá-bayádon nokaan kon ponoyá inta oyúonpa in dugúnea.

³³ Bo pinotaau kon i Saul nanaa, “Tuang datu, rayat aindon nomia kon dosa kon i Tuhan sin nokaandon kon ponoyá inta oyúonpa in dugúnea.” “Moiko in moḷoḷawang!” guman i Saul noropot. “Ḻitoidon mangoi in batu moḷoben tobatú.”

³⁴ Guman doman i Saul kon intau mita inta nodia kon habar tatua, “Baya-bayádon magí mako in moiko kon sigad in rayat bo potabádon in mosia modia mangoi kon sapi bo domba monia, sinbá ratáan kon tudu in batu tanaa bo kaanon kon naa; sinbá diádon in mosia mokaan kon ponoyá takin dugúnea bo diádon baradosaan bui kon i Tuhan.” Doḷom doman tua bayongan in rayat nodia kon bobiagon inta inagow bo iratá monia kon tua.

³⁵ Bo ki Saul noposindog in mezbah kon i Tuhan; tuata in mezbah inta dungkuḷ totok pinosindognea.

³⁶ Onda intua ki Saul noguman kon intaunea mita, “Koḻigai mayá in kita monubu kon intau in Pilistin doḷom naa bo mogagow kon i monia modapot in doḷo-doḷom bo moḻimod kon i monia komintan.” Mosia in notubag, “Mopia Tuang Datu aidaidon onu inta mopia kon mata i Tuang datu.” Táe ki imang in noguman, “Koḻigai munapa in kita mopoigum in totundú nongkon i Allah.”

³⁷ Bo noḻibódon in ki Saul kon i Allah, “Motaau degá in akuoi monubu kon intau in Pilistin? Degá ogoi-Mudon in mosia kon bonu in kawasa in intau in Israel?” Táe diábí sinubagan i Allah in sia kon singgai tua.

³⁸ Manangka intua ki Saul noguman kon bayongan itoi in rayat, “Koḻigaipa kon naa komintan bo taridipa mongo dosa onu in ain inaidan kon singgai in naa.

³⁹ Akuoi in modandi podoyon kon i Tuhan inta nobiag, inta ain nobogoi in kauntungan kon Israel, kon intau inta ain nogaid kon noitaḷá in hukumonbí matoi, umpakabí ki Yonatan adíku in sia.” Táe diá tobatúmai in mokobaḻí motubag kon inia.

⁴⁰ Bo nogumandon in ki Saul kon bayongan rayat in Israel, “Moiko komintan sindog kon dotá in naa.” Tubag monia, “Pomiadon Tuang Datu in onu inta inanggapmu mopia.”

⁴¹ Onda intua nosambayangdon in ki Saul, “Tuhan, Allah in Israel, nongonu sin singgai in naa in diábí sinubagan-Mu in akuoi? Tuhan, tubagaipa in akuoi pongin batu mita inta motusi naa. Aka taḷá tatua bo noiḻitú kon inakó andeka kon i Yonatan, tubagaidon pongin batu Urim, táe aka taḷá tatua bo noiḻitú kon umat-Mu Israel, tubagaidon pongin batu Tumim.” Dá tubag i Tuhan noitundú kon i Yonatan bo kon i Saul; dá rayat pinoniatadon kon diá kotaḷá.

⁴² Bo ki Saul nosingogdon, “Oo Tuhan, tantúdon kon sigad naminda i Yonatan.” Dá ki Yonatandon in pinoniata kon kotaḷá.

⁴³ Bo ki Saul in noguman kon i Yonatan, “Onu in inaidanmu?” Ki Yonatan notubag, “Akuoi in nokaandon kon biluk topiḻik inta kinuilku in tungkudku; diábí nongonu aka matoi in akuoi.”

⁴⁴ Guman i Saul kon inia, “Poigumon mako akuoi hukumon i Allah aka iko diá hukumon matoi, Yonatan!”

⁴⁵ Táe rayat in noguman kon i Saul, “Musti hukumon matoi degá in ki Yonatan? Bokaka siabí in inta nodia kon kauntungan moḷoben tanaa? Diá! Kami in modandi podoyon kon i Tuhan inta nobiag, kon ki Yonatan in diábí motaau koinggamáan in tongáka buok tougat kon uḷunea. Sin tongábí popisí in totuḷung i Tuhan, sia in nokouḻí kon kauntungan kon singgai in naa.” Natuata in nobaḻí, ki Yonatan pinosaḷamat in rayat nongkon hukuman matoi.

⁴⁶ Nopaḷut mako kon tua intau in Pilistin nobuidon kon butá monia tontaní sin ki Saul diádon nogaḷow kon i monia bui.

Pinomarentaan i Saul bo motoḷuadínea

⁴⁷ Naonda in ki Saul nobaḻí datu in Israel, sia in noparang kon bayongan tampat noḷawang kon bayongan musung in Israel, tuata in intau in Moab, intau in Amon, bo intau in Edom, datu mita in butá in Zoba, bo intau in Pilistin. Kon ondaka in poparangannea, umuran in sia mokountung.

⁴⁸ Sia in moparang moḷoḷaki bo mobarani bo nonaḷow kon intau in Amalek, poḷat nopoḷuat kon intau in Israel nongkon kawasa in intau mita inta mogogagow.

⁴⁹ Ki adí mita ḷoḷaki i Saul in ki Yonatan, ki Yiswi, bo ki Malkisua. Ki adínea bobay inta guya-guyang tangoinea in ki Merab, bo inta nogindua tangoinea in ki Mikhal.

⁵⁰ Tangoi buḷoi Saul in ki Ahinoam, i adí i Ahimaas; Itoi in tontaranea in ki Abner adí i Ner, inta pokuamáan i Saul.

⁵¹ Ki Kish, amá i Saul, bo ki Ner amá i Abner, in ki adí mita i Abiel.

⁵² Kon bonu in kinobiagannea ki Saul tantú moparang totok moḷawang kon intau in Pilistin. Tuamai, aka mokoontong in ki Saul kon intau moropot bo mobarani, yo baḷunea baḻíon tontaranea.