SAMUEL 1 13 - Alkitab Singog In Mongondow Masa In Tanaa

Parang nonayow kon intau in Pilistin

¹ Kon singgai tobatú kon tungkuḷ in ki Saul nobaḻídon datu,

² nomiḻí in sia kon intau in Israel 3.000; kon sigad monia tua, 2.000 in nogutun takinnea kon Mikhmas bo kon buḷud in Betel, bo 1.000 doman ibanea in minayá noyotakin i Yonatan ki adínea ḷoḷaki kon Gibea kon butá in suku Benyamin. Rayat mita ibanea in inogoidon nobui kon baḷoinea-baḷoinea.

³ Onda intua ki Yonatan nonaḷow kon itoi in tontara in Pilistin inta kon Geba, bo kinodongogandon in bangusa Pilistin intua. Bo ki Saul nogirup in torompet kon bayongan in butá tatua sin mogoiní kon intau mita in Ibrani mayá moparang.

⁴ Pinotaaudon kon bayongan in bangusa in Israel kon ki Saul ain noḻimod kon itoi in tontara in Pilistin tatua bo intau in Pilistin totokdon in moyaat in gina kon intau in Israel. Tuamai rayat in dinumuduidon kon tongganut kon moyotakindon i Saul kon Gilgal.

⁵ Bo kon dodai intua intau in Pilistin noyosipun domandon sin monubu kon intau in Israel; kon dotá monia oyúon in 30.000 in kereta in parang, 6.000 in intau sinumakoi kon kabaḷo, bo prajurit mita ná kobayong in bungaion kon pintad. Mosia in noyosipun kon Mikhmas kon dotá in pomukaan kon Bet-Awen.

⁶ Onda intua mosia in nonubudon totok kon intau in Israel, nodapot intau in Israel totokdon in moigupit. Tongonumai in intau mita in Israel nogadopdon kon bonu in angob bo kon bubú mita in buḷud andeka tumuot kon sigad mita in batu karang, andeka kon bonu in parigí bo bubú in butá,

⁷ oyúon doman in iḷumoḷan kon Ongkag in Yordan bo minayá in butá in Gad bo Gilead. Ki Saul in kon Gilgalpa, bo rayat inta dinumudui kon inia in urotdon mako sin moondok.

⁸ Ki Saul nogoḷat kon i Samuel pitudon nosinggai in koonggotnea, podudui in koyow i Samuel kon inia, táe umuranpa doman diá noidapot mangoi kon Gilgal in ki Samuel, bo rayat in momangkoidon monaḷámai kon i Saul.

⁹ Tuamai noguman in sia kon i monia, “Diadon mangoi in kuruban payongon bo kuruban dodamean tatua.” Bo siadon tontaní in noposumba in kuruban payongon tatua.

¹⁰ Táe bagupa in sia nopaḷut nomia kon tua, noiangoidon in ki Samuel. Ki Saul nonontomu kon inia sin mohoromat kon inia,

¹¹ táe ki Samuel in noḻibó, “Onudon degá in inaidan i Tuang?” Tubag i Saul, “Inontongku rayat in momangkoidon monaḷámai kon inakó, bo ki Amá in diápa doman noiangoi podudui in wakutu inta ain sinantú i Amá. Apa doman intau in Pilistin ain noyosipun kon Mikhmas.

¹² Dá iraiku, dika-dika tontara in Pilistin daḻídon mamangoi monubu kon inakó kon naa kon Gilgal, bokaka akuoi in diápa nopoigum in totabi i Tuhan. Tuamai nokopobaranidon in akuoi bo noposumba in kuruban tatua.”

¹³ Nokodongogmai kon natua, ki Samuel in noguman kon i Saul, “Mobodok totok in aid i Tuang tatua. Aka kuma bo ki Tuang in dinumudui kon parenta i Tuhan Allah kon i Tuang Datu, yo tantúon bidon i Tuhan kon mononoi in Tuang Datu bo buí i Tuang Datu in momarenta mobaḻí datu kon Israel naa.

¹⁴ Táe tanaa kawasa i Tuang Datu saḷaku pomarenta in diá bidon mononoi. Popisí in ki Tuang Datu in diá dinumudui kon parenta i Tuhan, dá ki Tuhan in nomiḻídon kon intau ibanea inta kinoibog-Nea sin duíon mobaḻí datu kon umat-Nea.”

¹⁵ Onda intua ki Samuel nonaḷámai kon Gilgal bo nopobayádon in Gibea kon butá in Benyamin. Kon dodai intua ki Saul nonarididon kon tontaranea mita, kobayongnea in degá 600 in intau.

¹⁶ Ki Saul bo ki Yonatan adínea ḷoḷaki, bo intau mita monia nononḷoḷaigan kon Geba kon butá in Benyamin; bo intau in Pilistin nononḷoḷaigan kon Mikhmas.

¹⁷ Kon dodai intua toḷu nopaanan in mogogagow intau in Pilistin in nobuat nongkon pinononḷoḷaigan in Pilistin sin mayá mogagow; paanan inta tobatú in minayá ná Opra kon butá in Syual,

¹⁸ paanan nogindua in nopobayá in Bet-Horon, bo paanan nogintoḷu in nopobayá ná pinosigadan inta noitayow kon Ḷopá in Zeboin bo padang gurun.

¹⁹ Kon Israel diábí in mononontaḷ, sin intau in Pilistin diá mobogoi kon intau in Ibrani monontaḷ kon pitow bo pandong.

²⁰ Dá intau in Israel musti mayá kon intau in Pilistin aka mogatá kon mata in pajekonea, pasoḷnea, boḻiungnea bo sabitnea;

²¹ Tondannea in doit mointok tobatú sin pogatáan kon boḻiung bo mopoyotutui in sambok in sapi, bo doit mointok doyowa in pogatáan kon mata in pajeko andeka pasoḷ.

²² Tuamai, kon singgai pinoparangan kon Mikhmas tatua, diábí in tobatúmai in rayat Israel in kopitow ande kopandong, koḻikudbí in ki Saul bo ki Yonatan adínea ḷoḷaki tatua.

²³ Intau in Pilistin nomiadon kon tobatú tampat poḷoḷukadan kon daḷan ḷumuai kon buḷud in Mikhmas.