SAMUEL 1 12 - Alkitab Singog In Mongondow Masa In Tanaa

Koyow i Samuel

¹ Bo ki Samuel nogumandon kon bangusa Israel, “Dinuduiankudon komintan in bayongan inta pinoigummu bo ain noduí kon datu tobatú kon i monimu.

² Nongkon tanaadon mako siadon in mobaḻí itoi monimu. Indoiaidon, akuoi naa in nogoguyangdon bo inubanandon. Noonggotdon totok in akuoi in nobaḻí itoi monimu – pinangkoipa kon akuoi nobagupa nodapot in tanaa mako. Nobaḻí bukti kon tua in ki adíku mita in komintandon nongoḷantud.

³ Tanaa in akuoi sinimindogdon kon tayowon monimu! Aka akuoi in nogaidon kon taḷá, yo potaaudon kon tayowon i Tuhan bo kon tayowon i datu inta piniḻí-Nea. Degá nokoimontandon in akuoi nogamá kon sapi andeka keledai in intau ibanea? Degá nokoimontandon in akuoi nonguboḷ andeka noposikisa andeka notarima kon doit poguboḻi kon taḷá? Pogumandon, sinbá onukabí inta ain ginamáku yo pobuionkudon bui.”

⁴ Intau mita tatua notubag, “Diá, diábí kon dodai in onda ki Amá nonguboḷ andeka noposikisa kon inami; diábí nokoimontanmai in ki Amá in nogamá kon kapunyaan i ineka.”

⁵ Bo nogumandon in ki Samuel, “Kon singgai in naa ki Tuhan bo datu inta piniḻí-Nea in nobaḻí sakusi kon akuoi in noniatadon kon diábí kotaḷá topiḻikmai.” “Oo totuu, ki Tuhan in nobaḻí sakusi naton,” tubag monia.

⁶ Bo ki Samuel in noguman bui, “Ki Tuhanbí inta ain nomiḻí kon i Musa bo kon i Harun, bo inta nodia kon mogoguyang monimu iḻumuai nongkon Mesir.

⁷ Tanaa, in dikapa mayá. Akuoi in mopotaaudon in taḷá monimu kon tayowon i Tuhan. Toropdon kon bayongan totabi Tuhan inta ain pinoontong-Nea kon inimu bo kon mogoguyangmu.

⁸ Kon dodai in ki Yakub bo motoḷuadínea namangoi in Mesir, bo intau in Mesir nopororiga kon i monia, mogoguyangmu in nopoigum in totuḷung kon i Tuhan, bo ki Tuhan in nopotabá kon i Musa bo kon i Harun. Taya dua tua in nodia kon mogoguyang monimu iḻumuai nongkon Mesir bo notuḷung kon i monia nogutun notantú kon butá tanaa.

⁹ Táe noiduduimai kon tua mosia in nokoḻiongdon kon i Tuhan, Allah monia, tuamai in pinomayáneadon in mosia sinubu bo sinaḷow i Sisera, panglima in tontara kon Hazor, bo in intau mita in Pilistin takin datu in Moab.

¹⁰ Onda intua mosia nosambayang kon i Tuhan nongaku kon dosa monia; guman monia, ‘Kami aindon binaradosa sin nonoḻikudon kon ini-Mu, oo Tuhan, bo nosumba kon patong mita i Dewa Baal bo i Asytoret. Táe, tanaa in posaḷamatdon in kami nongkon musung nami, dá kami in mogundoidon kon ini-Mu!’

¹¹ Onda intua ki Tuhan nopotabá kon i Gideon, onda intua ki Barak, nopaḷut mako kon tua ki Yepta, bo pangabisannea in akuoi. Kon batúan nami ain nopoḷuat kon i monimu nongkon musungmu, dá moiko in notaaudon nobiag noaman.

¹² Tongá naonda in moiko nokoontong kon moiko in tubuondon i Nahas datu in Amon, moiko in nondoídon kon i Tuhan saḷaku datumu bo noguman kon inakó, ‘Kami in moibog parentaan in datu tobatú.’ ”

¹³ “Tanaa, indoiai, naadon in sia, datu inta piniḻí monimu. Ain inigum monimu in sia, bo inogoidon i Tuhan in sia kon inimu.

¹⁴ Mosanangdon totok in moiko aka mohoromat kon i Tuhan, bo mogundoi kon i-Nia, bo mokidongog poḷat dumudui kon parenta-Nea, apa doman aka moiko bo datumu tua in umuran mosatia kon i Tuhan Allahmu.

¹⁵ Tongá, aka moiko diá mokidongog kon i Tuhan, bo modapotdon in moḷawang kon parenta-Nea, yo notantú bidon kon moiko bo datumu in ḷawangon bidon i Tuhan.

¹⁶ Tanaa, indongogaipa bui! Tarukiradon in mokoherang moḷoben inta bain pomiaan i Tuhan kon tayowonmu.

¹⁷ Akuoi in mokuani kon i Tuhan, bo umpaka tanaa sempo in poninggai, ki Tuhan in mopoangoibí in gotup bo uyan saḷaku tubag kon sambayangku. Bain tua bo kotaauandon monimu kon totuubí moḷoben in dosamu kon i Tuhan sin noigum kon datu tobatú.”

¹⁸ Bo nosambayangdon in ki Samuel, bo kon singgai domandon tuata ki Tuhan nopoangoi in gotup bo uyan. Bayongan in bangusa tatua nobaḻí noondok kon i Tuhan bo kon i Samuel.

¹⁹ Bo nogumandon in mosia kon i Samuel, “Tuḷungaipa, Amá, posambayangaipa in kami kon i Tuhan Allahmu, sinbá diá in kami matoi. Tanaa in kinotaauandon nami kon koḻikud in dosa nami koḻipod, kami in dinosadon bui sin kami ain noigum kon datu tobatú.”

²⁰ Ki Samuel in notubag domandon, “Dika moondok, umpakabí moiko ain nomia kon inta moraat tatua táe dikadon monoḻikud kon i Tuhan, táe umurandon pogundoi kon i-Nia takin ḻimbatú in ginamu.

²¹ Dikadon dumudui kon dewa mita inta diá mokotuḷung bo moposaḷamat kon i monimu, sin mosia tua in sabanarnea in diábí.

²² Ki Tuhan ain nongibot, kon Sia in diábí monaḷámai kon i monimu sin Sia ain nonantú kon umat-Nea tontaní.

²³ Soaḷ akuoi, poigumon mako akuoi in diá modapot in mogaid kon dosa kon i Tuhan sin diádon nosambayang kon kopontingan monimu. Táe akuoi in umuranbí motundú kon inimu kon soaḷ mita inta mopia bo inta noitutui.

²⁴ Horomatdon in ki Tuhan bo pogundoidon kon i-Nia takin satia takin ḻimbatú in ginamu. Toropdon in aid-Nea mita inta moḷoben inta ain inaidan-Nea kon inimu.

²⁵ Táe aka moiko umuran doman momia kon dosa, dá moiko bo datumu in moyopúbí.”