SAMUEL 1 11 - Alkitab Singog In Mongondow Masa In Tanaa

Ki Saul nonaḷow kon intau in Amon

¹ Noiduduimai kon tua ki Nahas, datu in Amon, nopotabádon in tontaranea bo nongopung kon kotá in Yabesh kon butá in Gilead. Intau mita in Yabesh noguman nanaa kon i Nahas, “Pomiadon kon dodandian takin nami, dá kami in tumungkudon kon inimu.”

² Ki Nahas in notubag, “Takin sarat tanaa akuoi in momia kon dodandian, ‘Mata koḷananmu kon batúannea in turakonku saḷaku singkuḻe kon bayongan in Israel!’ ”

³ Onda intua itoi mita kon kotá in Yabesh notubag, “Kami in mopoigum in wakutu pitu nosinggai in koonggotnea sinbá kami in motaau mopotabá in totabá kon bayongan butá in Israel. Aka diá in moibog motuḷung kon inami, dá kami in tumungkudon kon inimu.”

⁴ Natuata in totabá mita tatua nodapot in Gibea, tampat pinogutunan i Saul. Naonda in mosia nopotaau in habar tatua, nongombaḷdon in rayat popisí in kinobuḻiandon in kamang.

⁵ Kon dodai intua ki Saul bagupa nobui nongkon gobánea takin kodia-dia in sapinea. Dá noḻibó in sia, “Onu in nobaḻí? Nongonu sin bayongan in intau in mongombaḷbí?” Bo pinotaaudon kon inia in habar inta pinotaau in totabá nongkon Yabesh tatua.

⁶ Nokodongogmai kon tua, ki Saul kinawasa in Roho i Allah.

⁷ Takin sinumorú totok nogamá in sia kon sapi doyowa bo iratánea poḷat pinogko-pongkónea kino bayong. Onda intua pongkóan mita tatua pinoki dianea kon bayongan butá in Israel takin parenta nanaa, “Ki ine in doí mayá moparang dumudui kon i Saul bo kon i Samuel, yo sapinea mita in pongko-pongkóon doman nanaa!” Bangusa Israel noondok kon onu in pomiaan i Tuhan moiduduimai, dá bayongan in intau, diábí in sinaḻiban, moibogdon mayá moparang moyotakin.

⁸ Mosia in sinipun bo iniap kon Bezek: Kobayong monia tua in 300.000 intau in Israel, bo 30.000 in intau in Yohuda.

⁹ Nopaḷut mako kon tua pinotaaudon nanaa kon totabá nongkon Yabesh: “Potaaudon kon bayongan in intau kon Yabesh, kon ikoḷom doḷo-doḷom kon dodai in diápa moutu in singgai, mosia in mokouḻíbí kon totuḷung.” Naonda in intau mita in Yabesh notarima kon koyow tatua, nopiadon totok in gina monia.

¹⁰ Guman monia kon i Nahas, “Ikoḷom kami in tumungkudon, bo motaaudon pomiaanmu ibo-ibog.”

¹¹ Nobangon monik, doḷo-doḷompa, ki Saul nosilaidon kon intau mita nobaḻí toḷu nopaanan. Bo naonda in nomukádon in singgai mosia nonubu kon yua-yuak in pinononḷoḷaigan in intau in Amon tatua bo nomarang kon i monia. Diápa noutu in singgai, tontara i Saul in nonaḷowdon kon musung. Intau mita in Amon inta nokoḷagui, nongoirangkap nodapot in diádon in tododoyowa mako in noḷagui noyotakin.

¹² Onda intua noḻibódon in intau in Israel kon i Samuel, “Kon ondadon degá in intau mita inta noguman kon ki Saul in diábí patus mobaḻí datu naton? Igumon nami posarakandon i amá kon inami, sinbá ḻimodon nami.”

¹³ Táe ki Saul noguman, “Tobatúmai in diábí motaau ḻimodon singgai in naa, sin kon singgai in naa ki Tuhan ain noposaḷamat kon Israel.”

¹⁴ Bo nogumandon in ki Samuel kon i monia, “Koḻigai in kita komintan mayá in Gilgal bo baḻíondon in Saul datu naton.”

¹⁵ Bo minayádon in mosia komintan kon Gilgal, bo kon tampat pooibadaan tatua ki Saul binaḻídon datu. Mosia in noposumba in kuruban dodamean, bo ki Saul takin bayongan bangusa Israel in noramedon kon onu inta nobaḻí tatua.