SAMUEL 1 1 - Alkitab Singog In Mongondow Masa In Tanaa

Ki Elkana takin motoḷuadínea kon Silo

¹ Oyúon ḷoḷaki tobatú, tangoinea in ki Elkana, nongkon suku Epraim. Sia in nogutun kon kotá in Rama, kon butá inta kon buḷud in Epraim. Ki Elkana naa in ki adí i Yeroham bo ki ompu i Elihu. Sia in noituot kon motoḷuadí i Tohu, uputpa in inanakan i Zup.

² Ki Elkana naa in kobuḷoi kon doyowa, ki Hana bo ki Penina. Ki Penina in kogadí, táe ki Hana in diá kogadí.

³ Pomuḷoi in taong in ki Elkana mayá nongkon Rama sin moibada kon Silo bo moposumba in kuruban kon i Tuhan Inta Totok in Mokawasa. Imang i Tuhan kon dodai intua kon Silo in ki Hopni bo ki Pinehas, adí mita i Eli.

⁴ Pomuḷoi in ki Elkana moposumba in kuruban, ki Penina bo bayongan in adínea tukidannea in tumongo silai in ponoyá inta pinokuruban tatua.

⁵ Táe ki Hana in tongá ogoiannea in tongosilai doman sin Ki Tuhan diá nobogoi in adí kon inia. Umpaka natua táe ki Elkana in motabibí totok kon i Hana.

⁶ Ki Hana naa in umuran i Penina inta buḷoi toḻindua tatua popoyaaton in ginanea bo singkuḻeon, sin ki Tuhan in diá nobogoi in adí kon inia.

⁷ Tua in nobaḻí pomuḷoi in taong; aka mosia mayá in Baḷoi Tuhan, umuranbí i Penina popoyaat in ginanea. Mokakit in ki Hana mongombaḷ bo doí mongaan popisí in siningkuḻe in sia.

⁸ Bo pomuḷoi doman mako ki Elkana, ki buḷoinea, moḻibó “Nongonu sin mongombaḷbí in iko Hana? Nongonu sin iko in doíbí mongaan bo umuran molamurú mako? Degá diábí kinotaauanmu kon akuoibí naa in moponti-ponting kon inimu nongkon adí mita ḷoḷaki mopuḷú?”

Ki Hana bo ki Eli

^9-10 Kon singgai tobatú kon dodai in mosia nopaḷutdon nongaan kon Baḷoi i Tuhan kon Silo, ki Hana nobuatdon nongkon meja pongongaanan. Kon dodai intua ki Imang Eli inta kon Baḷoi doman i Tuhan, ḻimitú mako kon kaderanea kon diug in ḷoḻingkop. Takin kuyang in gina ki Hana nosambayang kon i Tuhan poḷat doman nongombaḷ mopoina-inak.

¹¹ Onda intua ki Hana nodandi, kainia, “O Tuhan Inta Totok in Mokawasa, indoiaipa kaasí in mogogundoi-Mu naa! Indoiaipa in rorigaku. Toropdon in mogogundoi-Mu bo dikapa koḻiongan! Aka ogoian-Mu in adí ḷoḷaki in mogogundoi-Mu naa, yo ogoikubí in sia kon ini-Mu kinoouputbí in kinobiagannea. Dandionku doman kon buoknea in diábí gonsi-gonsingan.”

¹² Noonggot totok in ki Hana nosambayang, bo ki Eli nonaridi mako kon bibig in bobay tatua.

¹³ Ki Hana in nosambayang kon bonu in gina, dá tongábí bibignea in mongumi-ngumit, táe diábí kodongogan in singognea. Tuamai kai Eli kamai noḷoḷangubí in sia.

¹⁴ Dá ki Eli nogumandon kon inia, “Nongonu sin iko in moḷoḷangubí kon naa? Dikadon monginum bui kon anggur!”

¹⁵ Táe ki Hana in notubag, “Akuoi in diábí noḷoḷangu, Amá, akuoi in beresibí diá nonginum kon anggur! Akuoi in kinodaitandon kamang, bo mosambayangmai mongonguman kon bayongan in rorigaku kon i Tuhan.

¹⁶ Dikabí anggapon kon akuoi in bobay inta diá mopia. Akuoi in nosambayang ná tanaa sin monakitdon totok in ginaku.”

¹⁷ Bo ki Eli in noguman, “Aka natua yo pobuidon takin saḷamat. Igumon mako ki Allah in Israel mokidongog kon onu in pinoigummu.”

¹⁸ Tubag i Hana, “Igumon mako in akuoi mokouḻí kon totabi i Amá.” Onda intua minayá in sia, bo nongaan; bo diádon noajar in ginanea.

Ki Samuel pinononggadí bo pinosarakan kon i Tuhan

¹⁹ Nopoikoḷomai kon singgai ki Elkana takin motoḷuadínea nobangon doḷo-doḷom, bo naonda in noibada kon i Tuhan, nobuidon in mosia kon Rama. Dá ki Elkana in nosiugdon noyotakin i Hana, ki buḷoinea tatua, bo sinubagan i Tuhan in sambayang i Hana.

²⁰ Bobay tatua in nonogusian bo nopononggadí in adí ḷoḷaki tobatú. Sinangoiannea ki Samuel, gumannea, “Sia in pinoigumkudon kon i Tuhan.”

²¹ Nodapotdon in wakutunea ki Elkana takin motoḷuadínea mayá in Silo bui sin moposumba in kuruban taongan kon i Tuhan. Koḻikud intua ki Elkana ain nodandi kon moposumba in kuruban inta ain sinantúnea.

²² Táe kon tanaa ki Hana in diá sinumakin. Gumannea kon i buḷoinea, “Bain naonda in guaton kon teté, ki Samuel in atodonku kon Baḷoi Tuhan, bo sia in mogutundon kon tua kinoouputbí in kinobiagannea.”

²³ Tubag i Elkana, “Mopia, aidaidon onu inta inanggapmu mopia; kon baḷoipa modapot in motompodon in wakutunea pongguatanmu kon i adí natonda. Bo igumon mako ki Tuhan in mopotuoi in dandimu mobaḻí moniata.” Dá, ki Hana kon baḷoipa nodapot in adí tatua ginuatdon kon teté.

²⁴ Naonda in ki Samuel ginuatdon kon teté, inatod i inánea in sia kon Baḷoi i Tuhan kon Silo. Kon dodai intua nointokpa totok in sia. Ki Hana in nodia domandon kon sapi koḷakian tobatú inta umurdon toḷu notaong, gandum mopuḷú nokilo, bo botutu kuḻit tobatú inta nopuḻing in anggur.

²⁵ Sapi tatua in iratá, bo ki Samuel in inatod kon i Eli.

²⁶ Ki Hana in noguman kon i Eli, “Ampung, Amá. Kinotoropanpa i Amá in akuoi? Akuoi naa in bobay inta koḻipod inontong i Amá sinimindog kon naa, nosambayangmai kon i Tuhan.

²⁷ Adí tanaa inta inigumku kon i Tuhan. Sambayangku in sinubagandon,

²⁸ tuamai in adí tanaa in posarakankudon mobaḻí kapunyaan i Tuhan kon bonu in kobiagannea.” Nopaḷut mako kon tua mosia noibada kon i Tuhan.