RUT 3 - Alkitab Singog In Mongondow Masa In Tanaa

Ki Rut pinobuḷoi

¹ Diá noonggot kon tua, ki Naomi noguman kon i Rut, “Adíku ramujionkudon kon bá iko in buidon pobuḷoion bo mosanangdon in kobiaganmu.

² Iko in nogaid noyotakin in bobay mita kon gobá i Boas, ki Boas tua in ginaḷum naton. Dá, indongogaipa! Doḷom naa sia in mayá moḻintog kon gandum kon gobánea.

³ Yo poinggúdon in tanaa, pomakédon in ḷana mobondu bo pogiḷambungdon in ḷambung inta totok in mopia. Bo bayádon in tampat inta poḷoḻintogan i Boas kon gandumnea. Oḷatdon kon tua modapot in sia mopaḷut mongaan bo monginum, táe ramuji bá diápa kotaauannea kon iko in kon tuadon.

⁴ Indoiaidon kopia mongo kon onda in bayáannea posiugan. Aka moḷoḷotdon in sia, yo bayádon intua bo sikatdon in daingnea, bo posiugdon kon diug in sioḷnea. Bain sia in moguman kon inimu mongo onu in musti pomiaanmu.”

⁵ “Mopia, Iná,” tubag i Rut, “Aidankubí in bayongan inta pinoki aid i Iná.”

⁶ Dá minayádon in ki Rut kon tampat poḷoḻintogan in intau kon gandum. Kon tua inaidannea in bayongan inta pinoki aid i guyánea.

⁷ Naonda in ki Boas nopaḷut nongaan bo nonginum, noguḻídon in ibognea bo nopia domandon in ginanea. Bo minayádon in sia nosiug kon diug in pinosipunan kon gandum. Takin inumado-adop in ki Rut namangoi bo nonikat kon daing i Boas, bodongka inumuḻid kon sioḷannea.

⁸ Noonggotmai kon doḷom, ki Boas daḻí noibangon bo momuyow kon awaknea. Noitaḻikokog in sia sin nokoontong kon oyúonbí in bobay nosiug kon sioḷannea.

⁹ “Ki ine in iko?” iḻibónea. “Akuoi naa in ki Rut, Amá!” tubag i Rut. “Ki Amá in ginaḷum nami inta modagin inta musti moindoi kon kobiaganku. Aka motaau yo baḻídon in akuoi ki buḷoi i Amá.”

¹⁰ “Poigumon mako ki Tuhan in momarakat kon inimu, adíku,” guman i Boas. “Potongkaiondon kon ná onu inta ain pinomiamu kon i guyámu, dá aidmu tanaa in moponiatadon in tabi inta moiḻiu kon tua bui. Iko in motaaubí in motayak kon buḷoi inta mongobagupa kon sigad in intau mita inta nooyúon bo inta nobogá, táe diábí inaidanmu intua.

¹¹ Tuamai, in dikadon moḻia-ḻiaw in ginamu Rut. Bayongan inta pinoigummu tua in daitonkubí pomiaan; sin bayongan in intau kon kotá tanaa ain nonotaau kon iko nion in bobaybí inta mopia in gina bo aid.

¹² Totuubí, kon mustibí in akuoi moindoi kon kobiaganmu, sin akuoi naa in ginaḷummu inta modagin. Táe oyúonpabí in intau ibanea inta musti moindoi kon kobiaganmu. Bo sia tua in ginaḷum inta modagi-dagin nongkon inakó naa.

¹³ Doḷom naa in posiugpa in iko kon naa. Ikoḷom doḷo-doḷom bain bayáanku ḻibóon mongo moibog in sia mopobayá in oaidannea tatua kon inimu andeka doí. Aka moibog in sia, dá mopia; táe aka doí in sia, dá modandi in akuoi podoyon kon i Allah inta nobiag, aidanku in onu inta mustiku aidan tatua. Tanaa in posiugdon iko kon naa dapot in doḷo-doḷom.”

¹⁴ Dá nosiugdon in ki Rut kon sioḷan i Boas. Nobangon monik subupa totok, ki Rut nobangondon sinbá diá ontongon in intau. Sin doíbí in ki Boas aka oyúon in intau mokotaau kon ki Rut namangoi in tampat tatua.

¹⁵ Ki Boas in nogumandon kon i Rut, “Ḷuatdon in aḷuangmu bo popoompatdon kon naa. Dá pinoompat domandon i Rut in aḷuangnea. Bo ki Boas nopoaḻin in gandum kon aḷuang tatua doyowamai nopuḷú nokilo in gandum. Bodongka binuatnea pinopopotaan kon i Rut. Nopaḷut mako kon tua ki Boas minayá in kotá.

¹⁶ Noiyaputmai in ki Rut kon baḷoi, ki guyánea noḻibó, “Naonda in baḻínea, adíku?” Dá inoumandon i Rut in bayongan inta inaidan i Boas kon inia.

¹⁷ “Bo”. guman i Rut noiduduimai, “bo siabí tontaní in nobogoi in bayongan gandum tanaa kon inakó, sin sia in noguman kon akuoi in diábí motaau in mobui kon i iná takin diá modia kon onu bo onu.”

¹⁸ Bo ki Naomi noguman, “Oḷatdon mako, adíku, modapot in koontonganmudon naonda in kopaḷutannea. Diábí in ki Boas ki bio-biómai aka diápa mopaḷutnea toḻisíon in pelekara tanaa kon singgai doman tanaa.”