RUT 1 - Alkitab Singog In Mongondow Masa In Tanaa

Ki Elimelekh takin mosia motoḷuadí nomamping kon Moab

^1-2 Kon tungkuḷ in Israel diápa in datu, butá in Kanaan kino antugan in roriga moḷoben nodapot in kinodaitan in kaanon. Kon dodai intua oyúon in ḷoḷaki tobatú tangoinea in ki Elimelekh. Sia in nongkon inanakan in Eprata, bo nogutun kon Betlehem kon butá in Yohuda. Popisí in kinoantugan roriga dapot in diádon in kaanon tatua, dá minayádon in sia kon butá in Moab takin i buḷoinea inta ki Naomi in tangoinea, bo ki adínea ḷoḷaki doyowa: ki Mahlon bo ki Kilyon. Bo nogutun in mosia kon Moab. Kon tungkuḷ in kon tuapa in mosia,

³ ki Elimelekh in minatoi. Dá dongkadon ki Naomi bo ki adínea doyowa.

⁴ Ki adínea doyowa tatua notonibuḷoi takin mongodeaga mita in Moab, ki Orpa bo ki Rut in tangoi nayadua. Mopuḷú notaong noiduduimai kon tua,

⁵ ki adí i Naomi ḷoḷaki doyowa tatua, minatoi domandon, dá ki Naomi in kinopatoiandon i buḷoinea bo adínea doyowa.

Ki Naomi bo ki Rut nobui kon Betlehem

⁶ Diá noonggot kon kinopatoian mako in buḷoi bo adínea inta doyowa tua kino dongogandon i Naomi kon ki Tuhan in nomarakatdon kon umat in Israel takin nobogoi in bungai in boyó inta mopia. Tuamai in ki Naomi bo mototakanea doyowa in nonoḻisídon sin monaḷámaidon kon Moab.

⁷ Nobuat in mosia noyotakin mobui kon Yohuda. Kon yuak in daḷan

⁸ ki Naomi noguman kon i mototakanea doyowa tua, “Pobuidon in kamunda kon baḷoi i iná monimu. Poigumon mako ki Tuhan in mobogoi kon onu inta mopia kon i monimu ná doman kopopia monimu kon inakó bo kon i monia inta ain minatoi tua.

⁹ Igumon mako ogoianpa doman bui i Tuhan in ḷoḷaki inta motaau mononibuḷoi kon i namunda.” Naonda in noguman mako natua, ki Naomi nopoigum kon mayádon in sia bo nongayokdon kon i nayadua. Tongá nongombaḷdon totok in ki Orpa bo ki Rut,

¹⁰ bo poḷat noguman kon i Naomi, “Diábí, Iná! Kami in dumuduibí kon i iná mobui kon bangusa i Iná.”

¹¹ “Dika, uḻeku!” tubag i Naomi, “mopia-piabí kon mobui in moiko. Onubí in mangaḻenea in moiko dumudui kon inakó? Akuoi naa in kinotaauandon monimu kon diá bidon mokouḻí kon adí inta motaau popobuḷoi bui kon i monimu?

¹² Pobuidon, uḻeku, sin akuoi naa in noiḻiudon in guyang aka mokipobuḷoipa. Bo aka kuma oyúonpa doman in ukur kon pobuḷoionpa bui in doḷom doman naa bo mokouḻípa bui kon adí ḷoḷaki,

¹³ yo umpaka moiko in mogoḷatpa doman modapot in mosia moitoi? Umpaka yo tongá soaḷ tatua bo moiko in diádon motonibuḷoi in intau ibanea? Naai, uḻe adíku, dikabí natua! Moajar totok in ginaku mokoontong kon onu inta noiantug kon i monimu popisí in hukuman i Tuhan kon inakó.”

¹⁴ Ki Rut bo ki Orpa bui nongombaḷ totok onda intua ki Orpa nopoigumdon mobui poḷat nongayok kon i guyánea bodongka nobui in sia. Táe ki Rut in doíbí monaḷámai kon i guyánea tatua.

¹⁵ Nogumandon in ki Naomi kon inia, “Rut, indoiaika! Ki utatmu tumpaḷa pobobuḷoion ain nobui kon bangusanea bo kon dewanea mita. Bayádon doman in iko, uḻeku, duduidon kon inia mobui!”

¹⁶ Táe ki Rut in notubag, “Iná, Dikadon in ki Iná mopotabá kon inakó mobui bo monaḷámai kon i Iná! Akuoi naa in moibogbí dumudui kon i Iná. Kon ondakabí in bayáan i iná yo kon tuabí doman in bayáanku. Kon onda in pogutunan i Iná, yo kon tuabí doman in pogutunanku. Bangusa i Iná tua in bangusakubí doman. Ki Allah inta sinumba i Iná, in sumbaankubí doman.

¹⁷ Kon ondakabí in kopatoian i Iná, yo kon tua doman in kopatoianku bo poḷobongan kon inakó. Igumon mako ki Tuhan mohukum kon inakó kobogaton totok, aka akuoi moibog moyoguat i Iná, koḻikudbí in popatoi in mopoyoguat kon i naton!”

¹⁸ Inontong i Naomi kon noḻimbatúbi in gina i Rut in tumakin, dá, dongkadon kibio-biómai in sia.

¹⁹ Dá nongingguputdon in mosia kon bobayáan noidapot in Betlehem. Naonda in yaput monia kon tua, bayongan in intau kon ḻipú tatua nodowawá. Bayongan in bobay kon tua noḻibó, “Totuu degá kon ki Naomi in sia tua?”

²⁰ “Dika oiníon ki Naomi in akuoi,” guman i Naomi, “Oinídon in akuoi ki Mara, sin ki Allah Inta Totok in Mokawasa ain nopomayá mako kon inakó nobiag nopuḻing in paitnea.

²¹ Kon dodai in akuoi nobuat nongkon naa yagi-yagi in oyúonpabí kon inakó, táe naa in ki Tuhan in nodiadon mangoi in naa kon inakó takin diádon koonu bo onu. Tuamai in dikadon moiko monangoi kon inakó ki Naomi, sin ki Tuhan Inta Totok in Mokawasa ain nohukum kon inakó takin roriga mobarong!”

²² Natuata in ouman soaḷ ki Naomi nobui mangoi kon Moab takin i Rut intau in Moab tua inta ki buḷoi i adínea. Mosia in noidapot kon Betlehem kon dodai in pomangkoiandon ponoḻisían kon bungai in gandum.