SURAT I PAULUS KON JAMAAT RUM 8 - Alkitab Singog In Mongondow Masa In Tanaa

Mobiag podudui ibog in Roho i Allah

¹ Tanaa in diá bidon in hukuman kon i monia inta nobiag notobatú i Kristus Yesus.

² Sin Roho inta nobogoi in kobiagan ain nopoḷuat kon inakó inta ain notobatú i Kristus nongkon hukum in dosa bo hukum in popatoi.

³ Onu inta diá koaidan in hukum agama, sin kita intau ilo-ilow, yo tua ain inaidan i Allah. Ki Allah ain nonaḷow kon kawasa in dosa nongkon tabiat in intau takin aid nopotabá mangoi kon i Adí-Nea tontaní, inta namangoi ná kaadaan in intau baradosa, sin momopat kon dosa.

⁴ Pinomia i Allah intua sinbá onu inta sinuntut kon hukum in agama Yahudi mobaḻídon kon i naton inta diá nobiag podudui kon ibog in awak, táe pinoduduibí kon ibog in Roho i Allah.

⁵ Intau mita inta nobiag podudui in tabiat intau, umuran morai kon onu inta kinoibog in awak naa. Táe intau mita inta nobiag podudui ibog in Roho i Allah, umuran morai kon onu inta kinoibog in Roho i Allah.

⁶ Aka raian monimu kinawasa in ibog in awak naa, dá popatoibí in mouḻí. Táe aka raianmu bo kinawasa in ibog in Roho i Allah dá mouḻímubí in kobiagan bo iko mobiag motompia takin i Allah.

⁷ Sin intau inta raiannea kinawasa ibog in awak, yo intau tatua mosisaturuanbí i Allah; sin intau tatua in doí dumudui kon hukum i Allah; bo totuu kon sia tua in diábí mokomampu dumudui kon hukum i Allah.

⁸ Intau mita inta nobiag podudui in tabiat intau, diá mokomampu in moposanang kon gina i Allah.

⁹ Táe moiko in diábí nobiag podudui in ibog in awak naa, moiko in nobiagbí podudui in ibog in Roho i Allah, aka totuu Rohodon i Allah in nongawasa kon i monimu. Táe aka kon intau tatua bo diá in Roho i Kristus, yo sia tua in deemanbí kapunyaan i Kristus.

¹⁰ Aka ki Kristus bo nobiagdon kon bonu in gina monimu, dá umpakabí awakmu matoi popisí in dosa, táe Roho i Allah mobogoibí in kobiagan kon inimu, sin hubunganmu takin i Allah in notompiadon.

¹¹ Bo aka Roho i Allah inta ain nomiag bui kon i Kristus nongkon kinopatoian, bo nobiagdon kon ginamu, dá Sia inta ain nomiag bui kon i Kristus tua nongkon kinopatoian tatua, in momiagbí doman kon awakmu inta diá mononoi nion. Sia in mogaid kon tua takin Roho-Nea inta nobiag kon bonu in gina monimu.

¹² Manangka intua utat mita, oyúon in tanggung jawab naton; táe deemanbí tanggung jawab kon ibog in awak naa. Donaaidon in kita dumudui kon ibog in awak naa.

¹³ Sin aka moiko bo mobiag dumudui kon ibog in awak naa, dá matoibí; táe aka moiko bo momaké in kawasa in Roho i Allah bo umuran monginggamá kon aid mita inta mokobaradosa, yo mobiagbí in moiko.

¹⁴ Intau mita inta kinawasa in Roho i Allah, mosia tua in ki adí mita i Allah.

¹⁵ Sin Roho, inta inogoi i Allah kon i monimu, diábí mopobaḻí kon i monimu ata, sahingga moiko in mobiagdon kon bonu in porasaan moondok. Táe Roho i Allah in mopobaḻíbí kon i monimu ki adí mita i Allah. Bo takin kawasa in Roho tatua kita komintan in monangoi kon i Allah, “Amá, o Amáku!”

¹⁶ Roho i Allah tatua in noyotakin in roho naton in moguman kon kita naa in ki adí mita i Allah.

¹⁷ Dá, aka kita ki adí mita i Allah, yo kita naa in intaubí mita inta mogogabat-Nea bo inta motarima kon barakat mita inta ain sinadia i Allah kon i adí-Nea mita. Kita in noyotakin i Kristus motarima kon onu inta ain sinadia i Allah kon i-Nia; sin aka kita bo mokorasa kon roriga takin i Kristus, yo kita in pomuliaanbí doman moyotakin-Nea.

Kamuliaan inta mononoi

¹⁸ Podudui in raianku, bayongan in roriga inta korasaan naton tanaa mako, diábí tugat in poyobandingonmai in kamuliaan inta poponiata kon i naton.

¹⁹ Bayongan in mahaḷuk mogoḷat bo moibogdon totok mokoontong kon wakutu i Allah moponiata kon i adí-Nea mita.

²⁰ Sin bayongan in mahaḷuk pinomayádon mako mogoguyaat, deemanbí popisí in ibognea tontaní, táe popisíbí in pinomayádon mako i Allah natua. Umpaka natua táe oyúonbí in harapan tanaa:

²¹ komintanmai bayongan in mahaḷuk pilatan bidon nongkon kawasa inta mokogoguyaat bo potakin dayowon takin i adí mita i Allah.

²² Kinotaauanbí naton kon umaaipabí in tanaa bayongan in mahaḷuk modaitpabí mogamui kon roriga, naonda bo roriga in bobay kon tungkuḷ in mononggadí.

²³ Bo deemanbí tongá mosia in mogamui; táe kitabí doman inta ain notarima kon Roho i Allah. Tua in oogoi i Allah inta muna, tongá kita in umuranpabí doman mogoḷat mako kon i Allah mopoḷuat kon bayongan in awak naton bo baḻíon-Nea in kita ki adí-Nea mita.

²⁴ Popisí in umuran moharap mako, dá posaḷamatonbí in kita. Táe aka onu inta iharap mako naton tua bo ontongondon naton, dá tua in deeman bidon harapon. Sin diábí in intau in moharap mako kon onu inta ain inontongnea mako?

²⁵ Táe aka kita in moharap mako kon onu inta diá inontong naton, dá mosabarbí in kita mogoḷat.

²⁶ Tongá Roho i Allah in mamangoibí motuḷung kon i naton aka kita in moyangkódon. Sin diábí kotaauan naton naonda in pososambayang naton. Rohobí tatua in mayá tumayow kon i Allah bo mopoigum kon bayongan inta inamuimai naton.

²⁷ Dá ki Allah, inta nonotaau kon bonu in gina intau, nonotaaubí kon makusud in Roho tatua; sin Roho tatua mopoigum kon i Allah sin kopontingan in umat-Nea, bo tua in pinoduduibí kon ibog i Allah.

²⁸ Kinotaauanbí naton kon ki Allahbí in nonoinut kon bayongan yagi-yagi, sahingga in mokopoangoi kon onu inta mopia kon intau mita inta motabi kon i-Nia bo inta inoiní-Nea podudui in tomayá-Nea.

²⁹ Mosia inta ain piniḻí i Allah, aindon sinantú-Nea nongkon pinomangkoianmai sinbá mobaḻí motombatangan i Adí-Nea ki Yesus Kristus. Sahingga in Adí tatua mobaḻí Adí guya-guyang kon sigad in bayongan utat.

³⁰ Natuadon in pinogogoiní i Allah kon i monia inta aindon sinantú-Nea muna. Mosia inta inoiní-Nea tua, inogoi-Nea mopopiaan bui takin-Nea. Mosia inta sinarima-Nea mopopiaan bui takin i Allah, nogamá kon silai kon bonu in kobiagan i Allah tontaní.

Ki Yesus Kristus Pinoponiataan in Tabi i Allah

³¹ Onu in motaau naton singogon kon soaḷ mita tatua? Aka ki Allah bo noyotakin naton yo ki ine in mokoḷawang kon i naton?

³² Ki Adí-Nea tontaní in diá bidon irekeng-Neamai, táe pinosarakan-Neadon sin kopontingan naton komintan; yo diábí kumaan kon akaḷ aka kita diá ogoian in bayongan yagi-yagi?

³³ Ki ine in motaau mogugat kon i naton umat inta piniḻí i Allah, aka ki Allah tontaní in nonantú kon kita in diábí kotaḷá?

³⁴ Oyúon degá in intau moibog mopotaḷá kon i naton? Bain ki Kristus in mobela kon i naton! Siabí tua inta ain minatoi, táe Siabí doman tua inta ain biniag bui nongkon kinopatoian bo kon tampatdon i Allah inta mokawasa.

³⁵ Oyúon degá in mokomampu moḷamboi kon i Kristus aka Sia in motabi kon i naton? Kasusahan, roriga, pomogutúan, malarat, kobiagan mobogá, anib ande popatoi, tua mita degá in mokoḷamboi kon tua?

³⁶ Kon bonu in Buk Motusi in pinais nanaa, “Tumongo singgai in kami moyogintayow mako in popatoi popisí in Iko. Kami in pinomiadon naonda bo domba inta diaandon sin ratáan.”

³⁷ Táe! Kon bayongan tua mokouḻí in kita kon kauntungan inta mosompurna nongkon i-Nia inta motabi kon i naton!

³⁸ Sin akuoi in moyakinbí totok, kon dunia naa, popatoi andeka kobiagan, malaekat mita andeka pomarenta mita, inta oyúondon tanaa mako andeka bain oyúon kon singgai moiduduimai;

³⁹ kawasa mita inta kon ḷangit, ande inta kon butá, ande bayongan yagi-yagi. Tua komintan in diábí mobaḻí ḷabot kon i Allah mobogoi in tabi-Nea kon i naton, inta ná inta ain pinoniata-Nea pinongin i Yesus Kristus, Tuhan naton.