SURAT I PAULUS KON JAMAAT RUM 5 - Alkitab Singog In Mongondow Masa In Tanaa

Moyodame bui takin i Allah

¹ Tanaa kita in noyodamedon bui takin i Allah, sin kita in mopirisaya. Tuamai in koḻigai bá mobiag in kita kon bonu in dodamean takin i Allah inta podoyon kon pirisaya naton kon i Tuhan naton ki Yesus Kristus.

² Popisí in kita mopirisaya kon i Yesus, dá inogoian-Nea in kasampatan in kita motarima kon tabi i Allah, bo totabi tatua in mokobiag kon i naton tanaa mako. Tuamai moḷunganga totok in gina naton sin oyúon in harapan naton mokoalami kon kobiagan mopia inta inogoi i Allah!

³ Deemanbí doman tongá tua, moḷungangabí doman in gina naton aka kita bo koantugan in roriga, sin kotaauan bidon naton kon roriga tatua in mokopomukábí kon ibog mogaid totu-totuu.

⁴ Ibog mogaid totu-totuu tua in mokopobaḻí kon intau monahang kon totungkuḷ; bo soaḷ tanaa inta mokopomuká kon harapan.

⁵ Bo harapan ná tanaa in diábí mokokecewa kon i naton, sin gina naton ain notarima kon totabi i Allah. Tua in inaidan i Allah pinongin Roho-Nea, inta ain inogoi kon i naton.

⁶ Wakutu in kita diádon kodaya, ki Kristus in pinokurubandon sin kopontingan naton pinotombubung kon wakutu inta ain sinantú i Allah; bokaka kita in intau mita inta noyayú nongkon i Allah.

⁷ Sin diábí mogampang in motayak kon intau inta moibog matoi umpakabí kopontingan in intau inta mobanar. Tongá degá aka kon intau inta mopia, dá oyúon in intau mobarani matoi.

⁸ Táe ki Allah in noponiatadon in tabi-Nea kon i naton, kon dodai in ki Kristus pinokuruban sin kopontingan naton, kon dodai in kita binaradosapa.

⁹ Masa in naa kita in noyodamedon bui takin i Allah inta pinongin kinopatoian i Kristus; manangka intua nopastibí kon posaḷamatonbí i Kristus in kita nongkon hukuman i Allah.

¹⁰ Sin tungkuḷpa in nobaḻí saturu i Allah in kita, kita pinoyodamedon takin-Nea inta pinodoyon kon kinopatoian i Adí-Nea, apa doman in tanaa naonda in hubungan naton takin i Allah notompiadon bui, tantú kita in posaḷamatonbí doman bui pongin kinobiagan i Kristus.

¹¹ Bo deemanbí tongá tua, táe moḷungangadon totok in gina naton kon kopopia in gina i Allah inta pinopotonsigad kon i Yesus Kristus ki Tuhan naton. Sin pinongin i Kristus tuata, dá tanaa mako kita mokoalami kon hubungan naton inta mopia takin i Allah.

Ki Adam bo Ki Kristus

¹² Dosa in sinumuot kon dunia naa nongin intau tobatú, bo nongkon dosa tatua nomuká domandon in popatoi. Akibatnea popatoi tatua in nongawasadon kon bayongan intau, sin bayongan intau in nogaid domandon kon dosa.

¹³ Sin wakutu in hukum in agama Yahudi naa diápa, dosa in koyongan bidon oyúon kon dunia naa. Táe diápabí irekengmai sin diápa in hukum i Musa.

¹⁴ Táe umpaka natua popatoi in nongawasa bidon kon bayongan intau nongkon sempo i Adam dapot kon sempo i Musa. Umpakabí intau mita diá nogaid kon taḷá ná inta inaidan i Adam, táe mosia in noitakin bidon kinawasa in popatoi. Ki Adam tua in gambaranbí i-Nia inta moiangoi kon singgai moiduduimai.

¹⁵ Tongá diábí notongkai in taya dua; sin totabibí i Allah in moḷobe-ḷoben aka poyobandingonmai in taḷá inta pinomia i Adam. Sin taḷá in intau tobatú in nokopopisí kon nobayong in intau minatoi. Táe moḷobe-ḷobenbí doman kon tua in bungai in totabi i Allah bo tombuinag in kasaḷamatan inta inogoi-Nea kon modamaḷ in intau, inta pinongin kopopia in gina in tobatú intau, tuata in ki Kristus.

¹⁶ Totabi i Allah tua in moḷobe-ḷobenbí totok kon dosa in intau tobatú. Sin naonda in intau tobatú nogaid kon inta noitaḷá, pinoḷuai domandon in kaputusan: “Kotaḷá”. Táe naonda in nobayongdon intau in nogaid kon dosa, namangoi domandon in tombuinag nongkon i Allah inta noguman: “Diá Kotaḷá”.

¹⁷ Popisí in taḷá in intau tobatú dá bayongan in intau kinawasa domandon in popatoi inta nongin intau tobatú tua. Táe moiḻiubí domandon nongkon tua in akibat nongkon onu inaidan in intau tobatú ibanea, tuata in ki Kristus. Pinongin i-Nia tua, ki Allah in nobogoi in totabi-Nea inta totok in moḷoben kon intau mobayong, bo tongábí pinonotabi-Nea kon i monia, sahingga in mosia in noyodamedon bui takin i Allah; mosia in mongawasa kon dunia naa pinongin i Kristus.

¹⁸ Tuamai, ná doman taḷá in intau tobatú nokopopisí kon bayongan intau i hukum, yo natua doman aid in intau tobatú inta motoindudui kon i Allah; nokopobaḻí kon bayongan in intau pinilatandon nongkon taḷá monia bo inogoiandon in kobiagan.

¹⁹ Dá notongkai doman in naa, bayongan intau in nobaḻí binaradosa popisí in intau tobatú inta diá motoindudui. Ná doman tua in mobayong intau inogoian in kasampatan moyodame bui takin i Allah popisí in intau tobatú inta motoindudui kon i Allah.

²⁰ Naonda in oyúon in hukum i Musa, dá kodugang-kodugang domandon in taḷá. Táe naonda in koḷoben-koḷoben in dosa, yo tabi i Allah in kodugang-kodugang domandon in ḷobennea kon i monia.

²¹ Kita naa in mustibí matoi popisí in nogaid domandon kon dosa. Táe ki Allah in notabibí kon i naton bo nobogoi in daḷan kon i naton kon moyodame bui takin-Nea. Bo popisí in hubungan naton takin i Allah notompiadon bui, dá Sia in nobogoi domandon in kobiagan moitutui bo inta mononoi kon i naton inta pinongin i Yesus Kristus, ki Tuhan naton.