SURAT I PAULUS KON JAMAAT RUM 4 - Alkitab Singog In Mongondow Masa In Tanaa

Ki Abraham nobaḻí contoh

¹ Aka natua, onu in motaau singogon soaḷ ki Abraham, mogoguyang naton tatua? Naonda in pongalamannea?

² Aka soaḷ mita inta inaidannea tatua bo nobaḻí dodoyonan pinotarimaan i Allah kon inia saḷaku intau inta mokosanang kon gina-Nea, dá oyúon doman in dodoyonannea dumodia. Táe sia in diábí motaau dumodia kon tayowon i Allah.

³ Sin kon bonu in Buk Motusi in pinais nanaa, “Ki Abraham nopirisaya kon i Allah, bo popisí in pirisayanea tatua dá sinarima i Allah in sia saḷaku intau inta mokosanang kon gina-Nea.”

⁴ Intau inta mogaid in motarimabí kon boḻi in pinogaidannea bo tua in diábí inanggap saḷaku pinomorosen sin hakneabí intua.

⁵ Táe oyúon in intau inta diábí tumogot kon usahanea tontaní; sia in moposarakanbí in kobiagan-Nea kon i Allah inta moposaḷamat kon intau mita baradosa. Dá pirisayaneabí tatua in nobaḻí dodoyonan pinotarimaan i Allah kon inia saḷaku intau inta mokosanang kon gina-Nea.

⁶ Natua doman in singog i Daud; manangka intua sia in noguman doman nanaa, pia in kamang in intau inta ain sinarima i Allah saḷaku intau inta mokosanang kon gina-Nea, táe inta deemanbí pinodoyon kon oaidnea mita. Ki Daud in noguman nanaa,

⁷ “Pia in kamang in intau inta taḷánea mita ain inampungan bo dosanea mita inampungandon i Allah!

⁸ Pia in kamang in intau inta dosanea mita diádon irekengmai i Tuhan!”

⁹ Degá singog ḷunganga tanaa in tongá pinomakusud kon intau mita inta ain sinunat andeka degá kon i monia doman inta diá sinunat? Sin munadon pinogumanku, kon ki Abraham in sinarima i Allah saḷaku intau inta mokosanang kon gina-Nea, deemanbí popisí in oaidnea, táe popisíbí in pirisayanea kon i Allah.

¹⁰ Dá degá kon dodai in onda intua in pinoontong i Allah? Kon wakutu degá in sia diápa sinunat ande kon wakutu in sia sinunatdon? Tantú kon wakutubí in sia diápa sinunat, deemanbí bain sinunat mako.

¹¹ Sia in sinunat bambí noiduduimai, tongá sunatnea tatua in tongábí saḷaku tanda kon sia ain sinarima i Allah saḷaku intau inta mokosanang kon gina-Nea, popisí in mopirisaya kon i Allah. Sia in sinarima i Allah kon wakutu in diápa dinumudui kon atorang in sunat tatua. Bo ki Abraham in nobaḻí guyanga in bayongan intau inta mopirisaya kon i Allah, bo popisí intua, dá sia sinarimadon i Allah saḷaku intau inta mokosanang kon gina-Nea, umpakabí mosia in diá sinunat.

¹² Ki Abraham in guyangabí doman in intau mita inta ain sinunat. Sia in nobaḻí guyanga monia, deemanbí tongá popisí in mosia ain sinunat, táe popisíbí in mosia nopirisayadon kon i Allah bo nobiagdon naonda bo ki Abraham wakutu in diápa sinunat.

Dandi i Allah sinarima sin nopirisaya kon i Allah

¹³ Ki Allah ain nodandi kon i Abraham bo buínea kon dunia naa in mobaḻíbí kapunyaan i Abraham. Dandi tatua in deemanbí pinodoyon kon kotoindudui i Abraham kon hukum in agama Yahudi, táe popisíbí in sia mopirisaya kon i Allah, dá sinarima i Allah in sia saḷaku intau inta mokosanang kon gina-Nea.

¹⁴ Sin aka tongá intau mita motoindudui kon hukum in agama Yahudi in motarima kon onu inta pinodandi i Allah, dá pirisaya kon i Allah in beresibí diá in baragunanea bo dandi i Allah tatua in diábí in mangaḻenea.

¹⁵ Hukum agama in Yahudi naa in mokopoangoi kon hukuman i Allah. Táe aka diá in hukum tatua, yo diábí doman in moḷawang.

¹⁶ Dandi i Allah tatua in pinodoyonbí kon pirisaya in intau tatua kon i Allah. Tua in nobaḻí tobatú jaminan kon bayongan buí i Abraham, kon dandi tatua in inogoi kon i monia saḷaku tobatú oogoi inta pinonotabi i Allah, deemanbí tongá kon i monia inta motoindudui kon hukum in agama Yahudi, táe kon i moniabí doman inta mopirisaya kon i Allah. Ná ki Abraham inta totok in mopirisaya kon i-Nia. Ki Abraham tua in ki amábí naton komintan inta mopirisaya.

¹⁷ Sin ki Allah in nogumandon kon i Abraham nanaa, “Iko ain binaḻí-Ku ki amá in bayongan intau inta mopirisaya.” Tua in dandi inta inogoi i Allah kon i Abraham. Bo ki Abraham in nopirisaya kon i-Nia. Sia tua in ki Allah inta nomiag kon intau minatoi, Siabí doman tua in ki Allah inta tongá takin singog in mogaid kon bayongan yagi-yagi inta diápa, mobaḻí oyúondon.

¹⁸ Ki Abraham in umuran mako moharap bo mopirisaya umpakabí diádon in harapan. Tuamai sia in nobaḻí ki amá in bayongan intau inta mopirisaya, ná inta pinais kon bonu in Buk Motusi, “Buímu in mobaḻídon mobayong totok.”

¹⁹ Kinotaauan bidon i Abraham tungkuḷ intua, kon diá bidon kumaan kon akaḷ aka sia bo mokouḻípa kon buí, sin nogoguyangdon in sia, bo umurnea in modiugdon mogatut notaong; natua doman in ki Sara, ki buḷoinea tua, in bantó, tongá umuran moḷoben in pirisaya i Abraham.

²⁰ Sia in umuran mopirisaya bo diábí in ḻia-ḻiaw mako in ginanea kon onu inta pinodandi i Allah tatua. Pirisayanea in mokodugang kon ropotnea, sahingga umuran in sia modayow kon i Allah.

²¹ Totokbí in moyakin in sia kon mokosanggupbí in ki Allah momia kon onu inta ain pinodandi-Nea tua.

²² Tuamai in sinarima i Allah in sia saḷaku intau inta mokosanang kon gina-Nea.

²³ Singog “sinarima saḷaku intau inta mokosanang kon gina i Allah”. pinais deemanbí tongá kon i Abraham tontaní;

²⁴ táe kon i natonbí doman. Kita in tarimaanbí doman i Allah saḷaku intau inta ain nokosanang kon gina-Nea, sin kita in nopirisaya kon i Allah inta ain nomiag bui kon i Yesus, ki Tuhan naton.

²⁵ Ki Yesus tua in pinosarakandon kon intau mita sin ḻimodon sin potobut kon bayongan dosa naton. Tongá Sia in biniagdon bui i Allah sinbá kita in buidon moyodame takin i Allah.