SURAT I PAULUS KON JAMAAT RUM 3 - Alkitab Singog In Mongondow Masa In Tanaa

¹ Aka natua, yo onu in kauntungannea in mobaḻí intau in Yahudi? Bo onu in baragunanea in dumudui kon atorang in sunat?

² Mobayongbí totok in baragunanea! Muna-munamai, lantaranbí kon intaubí in Yahudi naa in pinopopirisayaan i Allah in singog-Nea mita.

³ Táe naonda degá aka tongobotak intau in Yahudi diá mosatia? Degá tongádon popisí intua, dá ki Allah in diádon mosatia?

⁴ Tantú diábí natua! Sin notarang bidon kon ki Allah in tantúbí mobanar, umpakabí bayongan intau monguboḷ. Kon bonu in Buk motusi ain pinais nanaa, “Musti moiniata kon inimu kon totuu in onu inta siningogmu, bo iko in mountung kon dodai in iko hakimon.”

⁵ Táe aka koadilan i Allah moniatadon totok, popisí in kita nogaid kon inta diá totuu, yo onu in singogon naton? Degá diá moadil aka ki Allah mohukum kon i naton? (Ḷoḻibó tanaa in mopiabí saḷaku intau.)

⁶ Táe totuubí kon diábí motaau in mosingog natua! Sin aka ki Allah bo diá moadil, yo naondabí in pohohakim-Nea kon dunia naa?

⁷ Táe aka popisí in oaid inta diá moitutui tua, onu inta mobanar soaḷ ki Allah in modugangdon moiḷontú dá Sia in dayowon, yo nongonu sin intau inta nogaid kon moraat tua in tantúpabí potaḷaan saḷaku intau binaradosa?

⁸ Bo nongonu sin kita in diá doman motaau in moguman, “Koḻigai, kita in mogaid kon inta moraat sinbá momukádon in inta mopia?” Totuubí kon oyúonbí in intau mohojat kon inakó bo moguman kon akuoi ain nosingog kon natua. Intau mita natua in patusbí hukumon i Allah.

Diá Tobatúmai Intau diá Binaradosa

⁹ Dá aka natua, yo degá kita naa in noiḻiu kon intau mita inta deeman Yahudi tua? Diábí in kita noiḻiu! Aindon pinogumanku muna, kon intau in Yahudi andeka bangusa ibanea, komintan bidon kinawasa in dosa.

¹⁰ Ná inta pinais kon bonu in Buk Motusi nanaa, “Diábí tobatúmai intau inta mobanar,

¹¹ diábí tobatúmai intau inta nomangarti bo diábí doman tobatúmai in intau in nosumba kon i Allah.

¹² Bayongan intau in iyumayúdon kon i Allah; komintandon nogaid kon noitaḷá. Diádon tobatúmai intau nogaid kon inta mobanar, tobatúmai yo diábí!

¹³ Sigogow monia in naonda bo poḷoḷobonganan inta noibukat mako. Dilá monia in pinaké monia mosingog kon uboḷ, bo kuḻit in bibig monia in totok mobisa, naonda bo bisa in uḷag.

¹⁴ Bibig monia nopuḻing in singog inta pogodi-godi bo pohojat.

¹⁵ Ḷangkad monia in moḻikat aka mayá moposikisa bo moḻimod kon intau.

¹⁶ Korimumudan bo kasusahan ponabud magí-mako monia.

¹⁷ Diábí kotaauan monia in mobiag motompia,

¹⁸ bo mosia in diábí motoguondok kon i Allah.”

¹⁹ Tanaa, kinotaauandon naton kon bayongan inta pinais kon bonu in hukum agama Yahudi, pinomakusudbí kon intau mita inta nobiag dinumudui kon hukum tatua. Tuamai in diábí tobatúmai intau in motaau mobogoi in alasan onu, bo bayongan intau kon dunia naa in motaaubí tuntuton i Allah.

²⁰ Sin diábí in tobatúmai in motaau mopopiaan i Allah sin popisí in mosia ain nogaid kon soaḷ mita inta kon bonu in hukum agama Yahudi. Táe hukum tatua in tongábí moponiata kon intau tua in binaradosabí komintan.

Intau Posaḷamaton i Allah popisí Mopirisaya

²¹ Ki Allah ain nobogoi in daḷan kon naonda in intau moyopia bui takin-Nea; bo aid tatua in diábí in hubungannea takin hukum in agama Yahudi. Tongá buk mita i Musa bo buk in nabi mita noponiatadon kon soaḷ tatua,

²² kon ki Allah in noibogbí noyopia bui takin intau, táe tua in nointotoibí kon pirisaya kon i Yesus Kristus. Tua inaidan i Allah kon bayongan intau inta mopirisaya kon i Kristus, sin Sia in diábí mopoyoposi kon intan:

²³ Intau in komintan bidon binaradosa bo noyayúdon kon i Allah inta moposaḷamat kon i monia.

²⁴ Tongábí popisí in totabi i Allah inta pinomorosen-Nea, dá hubungan in intau bo i Allah in motompiadon bui; caranea kon tua intau pinobebasdon i Kristus Yesus.

²⁵ Ki Allah ain nopokuruban kon i Yesus Kristus sinbá pinongin kinopatoian-Nea tatua intau in poniatadon kon pinilatandon nongkon bayongan taḷá monia aka mosia mopirisaya kon i Yesus. Tua in inaidan i Allah sin mopoontong in koadilan-Nea. Sin tungkuḷ intua nosabardon in Sia kon bayongan dosa in intau, sahingga in diá ihukum-Nea in mosia.

²⁶ Táe tanaa in hukumon-Neabí ki ine in mogaid kon inta diá mopia sin moponiata kon moadilbí in Sia. Aid-Nea tatua in moponiatabí kon Sia tua in totu-totuubí mobanar; bo pomuḷoi intau inta mopirisaya kon i Yesus, pinoniata-Neadon saḷaku intau inta ain noyopia bui takin i Allah.

²⁷ Manangka intua diábí in dodoyonan naton dumodia. Nongonu sin natuabí? Popisí degá kita in dinumuduidon kon onu inta pinais kon hukum agama in Yahudi? Deemanbí! Táe popisíbí in kita mopirisaya.

²⁸ Sin nanaabí in simpod in singog: Intau in sinangoian noyopiadon bui i Allah, deemanbí popisí in nogaid kon onu inta pinais kon hukum in agama Yahudi, táe popisíbí in pirisayanea kon i Yesus Kristus.

²⁹ Andeka degá ki Allah tua in tongábí ki Allah intau in Yahudi? Deemanbí Sia tua in ki Allah in bayongan intau? Totuu, Sia tua in ki Allahbí doman in bayongan intau!

³⁰ Sin ki Allah tua in tongábí tobatú. Siabí tua inta nobogoi in kasampatan kon intau mita in Yahudi noyopia bui takin i Allah sin pinodoyon doman kon pirisaya monia. Bo Siabí doman tua inta nobogoi in kasampatan kon intau ibanea mobiag moyopia takin i Allah, bo tua in nobaḻí doman popisí in mosia mopirisaya.

³¹ Yo motaau degá in singogon kon popisí in kita bo mopirisaya kon i Kristus, dá musti ḷumbúondon in hukum agama Yahudi tatua? Diábí motaau in mosingog natua! Justru popisí in oyúondon in pirisaya naton tatua, dá musti horomaton naton in hukum tatua.