SURAT I PAULUS KON JAMAAT RUM 16 - Alkitab Singog In Mongondow Masa In Tanaa

Salam i Paulus

¹ Popokanalkudon kon i monimu in ki utat naton bobay, ki Pebe in tangoinea, sia in nobantung kon jamaat inta kon Kengkrea.

² Tarimadon in sia saḷaku tobatú umat i Tuhan. Mustibí natua in intau mita inta mopirisaya mositarimaan. Tuḷungai in sia aka oyúon in paraḷunea kon i monimu, sin sia tontaní ain notuḷung kon intau mobayong bo kon inakó doman.

³ Poyaputpa in salamku kon i Priskila bo kon i Akwila, bo kon yobayatku mita inta tumpaḷa nogaid kon oaidan i Kristus.

⁴ Mosia tua ain nopotaru in nyawa monia sin moposaḷamat kon inakó. Akuoi takin jamaat mita inta deeman intau in Yahudi mopoyaput in sukur moantó kon i monia tua.

⁵ Poyaputpa in salamku kon jamaat mita inta noyosipun kon baḷoi monia. Salam doman kon i utatku ki Epenetus inta kinotabiku, tuata in intau inta muna-munamai nopirisaya kon i Kristus kon Asia.

⁶ Poyaputpa doman in salamku kon i Maria. Sia ain irumoriga totok in nogaid sin kopontingan monimu.

⁷ Poyaputpa doman in salamku kon i Andronikus bo kon i Yunias. Mosia tua in toḻipúanku bo nokoimontandon in sinumuot kon ponjara takinku. Wakutu in akuoi diápa nopirisaya kon i Kristus mosia in munadon nopirisaya. Tangoi monia tua in kinotaauan bidon totok in rasul mita.

⁸ Salampa kon i Ampliatus, inta kotabiku sin sia ain noyotakinku notobatú takin i Tuhan.

⁹ Poyaputpa in horomatku kon i Urbanus, yobayat topogaidan naton sin kopontingan i Kristus. Bo horomatku doman kon i Stakhis inta kinotabiku.

¹⁰ Salam kon i Apeles. Kotoinduduinea kon i Kristus aindon nouji. Salam doman kon motoḷuadí i Aristobulus,

¹¹ bo kon i Herodion. Sia tua in tosukuku. Salam doman kon i utat naton inta mopirisaya kon i Kristus inta tombonu in baḷoi i Narkisus.

¹² Salam doman kon i Tripena bo kon i Triposa inta ain noramuji totok in nogaid sin kopontingan i Tuhan, bo salam doman kon i Persis inta kinotabiku. Sia doman tua inta ain noramuji totok in nogaid sin kopontingan i Tuhan.

¹³ Salam kon i Rupus bo kon i inánea inta inanggapkudon ná ki ináku tontaní. Ki Rupus tua in intau inta ain piniḻí i Tuhan bo mopia doman in oaidnea.

¹⁴ Poyaputpa doman in salamku kon i Asinkritus, kon i Plegon, kon i Hermes, kon i Patrobas, kon i Hermas bo kon bayongan intau inta mopirisaya kon i Kristus inta noyotakin monia.

¹⁵ Salam doman kon i Pilologus bo kon i Yulia; kon i Nereus bo kon i bobaynea; kon i Olimpas bo kon bayongan intau mopirisaya inta noyotakin monia.

¹⁶ Posisalamanbí takin tabi saḷaku tumpaḷa utat inta mopirisaya kon i Kristus. Bayongan jamaat i Kristus kon naa nopoyaput in salam kon i monimu komintan.

Tonggina pangabisan

¹⁷ Utatku mita! Indongogaipa in tongginaku tanaa: Mokopoingatdon kon intau mita inta moibog moropatoi kon jamaat bo inta mopotombauk in pirisaya intau kon i Tuhan. Sin soaḷ tatua in noyoposibí in inta ain sinundú kon i monimu. Dikadon moyobayat in intau mita natua!

¹⁸ Sin intau mita inta momia kon natua, deemanbí mogaid sin kopontingan i Kristus inta Tuhan naton, táe tongábí motayak kon kasanangan in gina monia tontaní. Dondouḷug bo singog monia moaḷus inta kodongogan tua in tongábí pakéon monia monguboḷ kon intau mita inta diápa nonotaau in onu bo onu.

¹⁹ Bayongan in intau ain nonotaau kon ná onda in kotoindudui monimu kon totundú soaḷ Habar Mopia inta nongkon i Allah. Nokotaaumai kon natua in aid monimu, nopia totok in ginaku. Ibogonku mobijaksana in moiko in mogaid kon soaḷ mita inta mopia, bo diá motaau mogaid kon soaḷ mita inta moraat.

²⁰ Ki Allah inta mobogoi in kobiagan motompia kon intau, mopotungkudbí in Ibilis kon ḻimonag in kawasamu bo rimumudonmu in sia. Poigumon doman mako, moiko in umuran barakatan i Yesus Kristus, Tuhan naton!

²¹ Yobayat topogaidanku ki Timotius, nopoyaput doman in salamnea kon i monimu. Ná doman tua in ki Lukius, ki Yason bo ki Sosipater, inta tosukuku.

²² Nomais kon surat tanaa in akuoi ki Tertius. Akuoi in mopoyaput in salam pogogutat kon i monimu.

²³ Ki Gayus nopoyaput doman in salam kon i monimu. Akuoi in nongandupa kon baḷoinea, bo jamaat nami nongandupa doman noibada kon tua. Ki Erastus, tobatú itoi in mokokadai kon doit kon kotá nokipoyaput doman in salamnea kon i monimu. Ná doman tua in ki Kwartus, ki utat naton. [

²⁴ Poigumondon mako, ki Tuhan naton ki Yesus Kristus in momarakat kon i utat mita. Amin.]

Simpod in surat

²⁵ Dinayo-dayowdon in ki Allah! Sia in mongawasa moginrigon kon pirisaya monimu podudui in Habar Mopia nongkon i Allah inta pinotaauku soaḷ ki Yesus Kristus. Habar inta pinotaauku tua in notongkai in onu inta pinoontong i Allah kon inakó; tuata in soaḷ tomayá i Allah inta noonggotdon totok in kinotaauan intau.

²⁶ Táe masai naa, podudui in parenta i Allah inta mononoi, tomayá tatua ain pinoniata bo ain pinotaau kon bayongan intau, inta pinongin onu inta ain pinais in nabi mita, sinbá mosia komintandon mopirisaya bo motoindudui kon i Allah.

²⁷ Tongábí Sia-sia mita in Allah, mobijaksana totok in Sia. Poigumondon mako Sia in umuran duíon bo dayowon pomuḷoi mako pongin i Yesus Kristus! Amin. Horomat nami, Ki Paulus, mogogaid kon oaidan i Kristus Yesus