SURAT I PAULUS KON JAMAAT RUM 15 - Alkitab Singog In Mongondow Masa In Tanaa

Poposanangbí in intau ibanea, deemanbí tongá iko tontaní

¹ Kita inta ain totu-totuu moyakin kon onu inta pinirisaya naton, mustibí mosabar in mokodongog kon onu inta kinodoí in intau inta diápa totok in moyakin. Donaaibí in kita tongá moposanang in gina naton tontaní.

² Mustibí in kita moposanang doman in gina i utat naton, sin kopiaan doman monia, bá koyakinan monia in modugang doman moropot.

³ Sin ki Kristuspa in diábí norai kon kopontingan-Nea tontaní. Kon bonu in Buk Motusi in pinais nanaa, “Bayongan hojatan inta pinonapud kon ini-Mu ain noiantug kon inakó.”

⁴ Bayongan inta pinais kon Buk Motusi, tua in makusudnea motundúbí kon inaton. Sin totundú inta sinarima naton nongkon Buk Motusi nokodugang kon kototahang bo kororopot in gina naton, dá kita in umuran moharap kon i Allah.

⁵ Poigumon mako ki Allah inta nobogoi in kasabaran bo ropot kon intau, umuran doman motuḷung kon i monimu, sinbá moiko in mobiag motobatú kon gina bo dumudui kon onu inta ain inaidan i Yesus Kristus.

⁶ Sahingga moiko motobatú kon gina bo motobatúdon kon singog bo modayow kon i Allah, ki Amá i Tuhan naton ki Yesus Kristus.

Habar Mopia kon intau mita deeman Yahudi

⁷ Manangka intua poigumonku kon i Utat mita, moiko in musti umuran mositarimaan takin sanang in gina, notongkai ná pinototarima i Kristus kon i naton sin mopomulia kon i Allah.

⁸ Torop in naa, ki Kristus ain nobantung kon intau in Yahudi sin mopoontong kon ki Allah in mogaidbí kon onu inta ain pinodandi-Nea kon mogoguyang naton.

⁹ Pinomia doman i Yesus in bangusa mita ibanea mopomulia kon i Allah popisí kopopia in gina-Nea kon i monia. Kon bonu in Buk Motusi in pinais nanaa, “Tuamai akuoi in modayow kon ini-Mu kon sigad in bangusa mita, akuoi in mopodondongbí in dodayowku podayow kon tangoi-Mu.”

¹⁰ Oyúon doman in pinais nanaa, “Kosanangdon in gina monimu takin umat mita i Allah inta kinopiḻían, ei … bangusa mita!”

¹¹ Bo nanaa doman, “Dayowdon in ki Allah, ei … bayongan in bangusa, pomayádon mako in bayongan intau in modayow kon i-Nia!”

¹² Ki Nabi Yesaya in noguman doman nanaa, “Nongkon buí i Isai moiangoibí in intau tobatú inta momarenta kon bangusa mita; kon i-Niabí tua in poharapan in bangusa mita tatua.”

¹³ Poigumon mako kon i Allah, inta tampat pohoharapan monimu, sinbá Sia in mobogoi kon i monimu in gina mosanang bo kobiagan motompia sin moiko in mopirisaya kon i-Nia. Poigumon doman mako sinbá moiko in umuran kawasaan in Roho i Allah, sahingga in modugangdon moḷoben in harapan monimu kon i Allah.

Dodoyonan raian pinomaisan i Paulus kon surat tanaa

¹⁴ Utatku mita! Moyakinbí in akuoi kon totokbí in mobayong inta mopia in nion kon i monimu. Moiko nion in nonotaaubí doman kon bayongan in yagi-yagi bo mokomampubí doman mositongginaan.

¹⁵ Táe kon soaḷ mita ibanea, ogoiankupa in tompoingat in moiko pongin surat tanaa, sin ki Allah ain noponotabi in oaidan tanaa kon inakó.

¹⁶ Binaḻí-Neadon in akuoi mogogaid kon oaidan i Kristus sin pinotabá minayá kon intau mita inta deeman Yahudi. Bo akuoi in nogaidon naonda bo imang, inta nopoyaput in Habar Mopia nongkon i Allah, sinbá intau mita inta deeman Yahudi in mobaḻí tobatú sosumba kon i Allah inta motaau tarimaan-Nea. Poigumondon mako bá baḻíondon in Roho i Allah in mosia tobatú sosumba kon i Allah tontaní.

¹⁷ Popisí in akuoi bo ain notobatú i Kristus Yesus, dá mosanangdon totok in ginaku, sin motaaudon in akuoi mogaid kon oaidan tatua kon i Allah.

¹⁸ Akuoi in diábí mobarani in mosingog kon ibanea mako, koḻikudbí in soaḷ inta ain inaidan i Kristus inta pinotonsigad-Nea kon inakó; pinaké-Nea in akuoi modia kon bangusa mita ibanea (deeman Yahudi) sinbá mosia in mamangoi bo dumuduidon kon i Allah. Tua pinomiaku deemanbí tongá singog táe takinbí doman oaid,

¹⁹ inta mokoherang totok kon intau bo diá in poporupaan. Tua mita in nobaḻí sin kawasa in Roho i Allah. Habar Mopia soaḷ ki Kristus aindon pinohabarku komintan kon intau mita, pinangkoipamai kon Yerusalem nodapot in Ilirikum.

²⁰ Kon ginaku naa in mopotaaubí in Habar Mopia nongkon i Allah kon tampat inta intaunea mita in diápa nokodongog kon soaḷ ki Kristus tua. Sin doíbí in akuoi moposindog in oaidan kon pondasi mita inta ain pinomia in intau ibanea.

²¹ Kon bonu in Buk Motusi ain pinais nanaa, “Intau mita inta diápa kon dodai in onda in notarima kon habar soaḷ Sia, in mokoontongbí; bo mosia inta diápa kon dodai in onda in nokodongog, in momangaḻe bidon.”

Tomayá i Paulus mayá in Rum

²² Tuamai in mokakitdon oyúon in moiḷamboi kon tomayáku mamangoi mokipodungkuḷ kon i monimu.

²³ Táe tanaa oaidanku kon daerah mita tatua ain nopaḷut. Kon taonganneadon ibogku mamangoi mokipodungkuḷ kon i monimu.

²⁴ Igumonku mako aka kon binayáanku mopobayá in Spanyol, yo moiandupa in akuoi kon tampat monimu bá moyodungkuḷpa in kita takin pia in gina umpaka diá moonggot. Mopaḷut mako kon tua haraponku moiko in motaaupa motuḷung kon inakó mongingguput kon bobayáanku mopobayá in Spanyol.

²⁵ Táe tanaa mako, akuoi in mayápa in Yerusalem sin mogatod kon totuḷung kon umat i Allah kon tua.

²⁶ Sin jamaat mita kon Makedonia bo kon Akhaya ain notobatú kon gina bo nobogoi in totuḷung kon utat mita inta nobiag nobogá kon sigad in umat i Allah kon Yerusalem.

²⁷ Totokbí in nosanang in gina monia in nonantú kon mobogoi in totuḷung tatua. Totuubí kon patusbí in mosia motuḷung kon utat mita inta bogá kon Yerusalem tua; sin nongkon intaubí mita in Yahudi tatuata sahingga intau mita inta deeman Yahudi notarimadon kon barakat mita nongkon i Allah. Dá tuamai intau mita inta deeman Yahudi tua in patusbí doman motuḷung mobogoi in barakat inta koontongan tua kon intau mita in Yahudi.

²⁸ Aka mopaḷutkudon in oaidan tanaa bo posarakankudon kon i monia inta kon Yerusalem in totuḷung inta ain sinipunku tua, dá akuoi in mayádon in Spanyol bo mongin kotámu.

²⁹ Kotaauankubí kon aka akuoi in mamangoi kon i monimu, pasti modiabí kon barakat mobayong inta nongkon i Kristus.

³⁰ Podoyon kon tangoi i Tuhan naton ki Yesus Kristus, bo podoyon kon tabi inta inogoi in Roho i Allah, igumonku totok sinbá moiko in moyotakinku mosambayang kon i Allah.

³¹ Sambayangaidon sinbá pilatandon i Allah in akuoi nongkon kawasa in intau mita kon Yudea inta diá mopirisaya bo bá oaidanku in modia kon totuḷung kon Yerusalem tarimaan in umat mita i Allah kon tua takin sanang in gina.

³² Sinbá aka ogoianpa i Allah in kasampatan, dá mamangoipa in akuoi kon i monimu takin gina mosanang, bo moonowdon totok in ginaku kon yua-yuak monimu.

³³ Poigumondon mako, ki Allah inta nobogoi in kobiagan motompia kon intau, umuran moyotakin i monimu komintan. Amin.