SURAT I PAULUS KON JAMAAT RUM 14 - Alkitab Singog In Mongondow Masa In Tanaa

Donaai mopotaḷá kon i utatmu

¹ Intau inta diá moyakin kon onu inta pinirisayanea in mustibí tarimaanmu kon sigad in intau mita inta mopirisaya. Dikabí mobobayowannea soaḷ pendiriannea tatua.

² Oyúon in intau kopendirian kon sia in motaaubí mokaan kon bayongan in yagi-yagi. Táe intau inta diápa moyakin kon onu inta pinirisayanea tatua; kinotaauannea in tongábí kuyat in motaau kaanonnea.

³ Intau inta mokaan kon onukadon donaaibí in mopoompámai kon intau inta tongá mokaan kon kaanon inta ain sinantúnea motaau kaanon. Ná doman tua, intau inta tongá mokaan kon onu inta ain sinantúnea motaau kaanon, donaaibí mopotaḷá kon intau inta mokaan kon bayongan yagi-yagi, sin ain sinarima i Allah in sia.

⁴ Ki inebí in iko utat, sahingga in musti mopotaḷá kon ata intau ibanea? Moibanting ande moisindog in ata tatua, tua in urusanbí i tuangnea. Bo totuubí kon ata tatua in moisindogbí motorindog, sin mokomampubí in ki Tuhan in moḷukad sahingga in sia tantú simindog motorindog.

⁵ Oyúon in intau monganggap kon oyúonbí in tobatú singgai inta totok in moponting nongkon singgai ibanea, táe oyúonbí doman intau monganggap kon notongkaibí in bayongan singgai. Pomayádon mako in mosia monantú kon onu in koyakinan monia tontaní.

⁶ Intau inta nonantú kon oyúonbí in singgai inta totok moponting, tua in inaidannea sin mohoromatbí kon i Tuhan. Intau inta nokaan kon bayongan in yagi-yagi, tua in lantaranbí doman sia mohoromat kon i Tuhan, sin sia in mosukur kon onu inta inogoi kaanon tua. Natua doman, intau inta tongá mokaan kaanon inta ain sinantúnea motaau kaanon, yo intau tatua in mohoromatbí doman kon i Tuhan bo mosukur kon i Allah.

⁷ Kon sigad naton naa diábí in mobiag tongá kon kopontingannea tontaní; bo diábí doman in tobatúmai in matoi kon inia tontaní.

⁸ Aka kita mobiag, yo kita in mobiagbí kon kopontingan i Tuhan. Bo aka kita matoi yo matoibí doman kon kopontingan i Tuhan. Dá mobiag andeka matoi, kita naa in kapunyaanbí i Tuhan.

⁹ Ki Kristus ain minatoi, táe buidon nobiag. Manangka intua sia in nobaḻídon Tuhan kon intau mita inta nobiag bo kon intau mita doman inta ain minatoi.

¹⁰ Dá utatku mita! Onubí in mangaḻenea kita in mopotaḷá kon intau mita inta tumpaḷa mopirisaya kon i Kristus? Bo onubí in mangaḻenea ki utat in mopoompámai kon inia? Kita komintan in mayábí kon tayowon i Allah sin hakimon.

¹¹ Kon bonu in Buk Motusi ain pinais nanaa, “Totuu kon nanaabí in pirman i Tuhan, pomuḷoi intau in mamangoibí tumungkud bo mosumba kon tayowon-Ku. Bo pomuḷoi intau in mongakubí kon Akuoibí naa in ki Allah.”

¹² Dá kitabí tontaní in motanggung jawab kon bayongan oaid naton kon i Allah.

Donaai mopoḷaḻe kon i utatmu

¹³ Manangka intua donaaidon mosipotaḷáan in kita. Táe aidai in naa, poramuji sinbá moiko in diá mogaid kon onukadon inta mokopopisí kon i utatmu inta tumpaḷa Keresten in mogaid kon inta moitaḷá.

¹⁴ Popisí in akuoi bo notobatúdon i Tuhan Yesus, dá mopirisayabí totok in akuoi kon diábí in tobatúmai monajis. Soaḷ tatua najis podudui intau tobatú, aka tua inanggapnea najis.

¹⁵ Sin aka iko bo moposakí kon gina i utatmu tumpaḷa Keresten tongá popisí in onu in kinaanmu tua, dá aidmu tua in diádon pinodoyon kon tabi. Donaaibí pomayámu mako in ki utatmu tua in mobodito tongá popisí in onu in kinaanmu, sin ki Kristus ain minatoi popisí in intau doman tobatú tatua.

¹⁶ Manangka intua donaaidon pomayámu mako in onu inta mopia kon inimu in anggapon intau ibanea diá mopia.

¹⁷ Sin aka ki Allah in momarenta kon kobiagan intau, yo soaḷ onu in motaau kaanon ande inumonnea, tua in diábí moponting. Inta moponting in soaḷbí intau inta dumudui kon onu in kinoibog i Allah in mokorasabí kon moonow in gina bo motarima kon kasanangan gina inta inogoi in Roho i Allah, tua in moponting.

¹⁸ Intau inta nobantung natua kon i Kristus, sia tua inta mokosanang kon gina i Allah, bo sia in horomaton doman in intau ibanea.

¹⁹ Tuamai koḻigai bá tayakon naton onu inta mokopoangoi kon dodamean bo mosibiagan.

²⁰ Ḷukadaibí sinbá diá tongá soaḷ kokaanon, iko momoguyaat kon onu inta ain inaidan i Allah. Komintan kaanon diábí in pinoton, motaaubí modait kaanon, táe aka onu in kinaanmu tua mokopopisí kon intau ibanea baradosaan, dá iko in kotaḷá.

²¹ Maníka dikadon mokaan kon ponoyá ande monginum kon anggur, ande mogaid kon onukabí inta mokopopisí kon i utatmu tumpaḷa Keresten tua, mogaid kon mokobaradosa.

²² Onu inta pinirisaya i utat, yo tongádon tua in aidan kon tayowon i Allah sin kopontinganmu tontaní. Mosanangdon totok in mosia inta diá morai kon noitaḷá kon onu inta inanggapnea noitutui.

²³ Táe intau inta moondo-ondok in mokaan kon onu inta motaau kaanon, tongá pangabisannea in nokaan doman kon kaanon tatua, yo potaḷáan i Allah in sia, sin tua inaidannea diá pinodoyon kon koyakinannea soaḷ onu in noitutui bo onu inta noitaḷá. Onuka in aidan takin diá podoyon kon koyakinan yo dosabí intua!