PINOGIAPAN 9 - Alkitab Singog In Mongondow Masa In Tanaa

Porayaan kon Paska inta nogindua

¹ Kon buḷan imitánea kon taong nogindua naonda in bangusa Israel nonaḷámai kon Mesir, ki Tuhan noguman kon i Musa kon padang gurun Sinai. Guman i Tuhan,

^2-3 “Kon singgai impuḷú bo opat buḷan tanaa, pangkoion kon dodai in mata in singgai tumoyop, intau Israel musti momia kon porayaan Paska podudui in atorang inta ain sinantú.”

⁴ Dá ki Musa nopotabá kon bangusa Israel moraya kon Paska.

⁵ Iraya monia intua kon padang gurun Sinai kon dodai in ḷoḷabungnea singgai impuḷú bo opat buḷan imitánea. Bayongan intua inaidan monia notongkai ná inta ain pinarenta i Tuhan kon i Musa.

⁶ Táe kon sigad monia tua oyúon in tongonumai intau inta nonajis sin ain nokadai kon intau minatoi, dá mosia in diábí motaau moraya kon Paska kon singgai tatua. Mosia tua minayá nokipodungkuḷ kon i Musa bo kon i Harun

⁷ bo noguman, “Kami naa in nonajis sin ain nokadai kon intau minatoi. Táe nongonu sin kami in diábí ogoi moposumba in kuruban kon i Tuhan moyotakin in utat mita nami?”

⁸ Ki Musa notubag, “Oḷatpa modapot in akuoi mokouḻí kon totundú nongkon i Tuhan.”

⁹ Ki Tuhan nopotabá kon i Musa

¹⁰ moguman kon bangusa Israel, “Aka kon sigad monimu andeka kon buí monimu oyúon in nonajis popisí in nokadaidon kon intau minatoi andeka kon binayáan moyayú, yo sia in musti doman moraya kon Paska kon i Tuhan.

¹¹ Táe porayaan tatua musti pomiaan tobuḷan moiduduimai, inta kon doḷom singgai impuḷú bo opat kon buḷan nogindua. Porayaaidon in singgai tatua takin mokaan kon domba Paska takin roti inta diá iragian bo kuyat pait.

¹² Dika tonggagatan in kaanon tatua modapot in mobangon monik, bo dika momutoḷ kon tobatúmai in tuḷan in mahaḷuk inta posumba kon i-Nakó. Rayaaidon in Paska tatua podudui kon bayongan atorangnea.

¹³ Tongá intau inta diá nonajis bo diá doman kon binayáan, táe diá nomia kon pinorayaan Paska, yo intau tatua in diá bidon poyoiapon-Ku umat-Ku, sin sia in diá noposumba in kuruban kon i-Nakó kon wakutu inta ain sinantú. Intau tatua musti mobaba kon bungai in dosanea.

¹⁴ Aka kon sigad monimu bo oyúon in intau ango-angoi inta moibog moraya kon Paska, dá musti rayaannea podudui in bayongan atorang bo onu inta ain sinantú. Hukum tatua in pakéon kon bayongan intau, pinomayá intau Israel andeka intau ango-angoi.”

Goḷom inta nonindar

^15-16 Kon singgai in Ḷoḷaigan i Tuhan pinosindog, noikoḷobdon mangoi in goḷom kon Ḷoḷaigan tatua. Kon tungkuḷ in doḷom dapot in doḷo-doḷom goḷom tatua koontongan ná tuḷú.

¹⁷ Pomuḷoi in goḷom tatua mamonik, intau in Israel mongokai kon ḷoḷaigan monia, bodongka mobuat. Bo kon onda in goḷom tatua moponag, dá kon tampat doman tatua in pononḷoḷaigan monia bui.

¹⁸ Podudui in parenta i Tuhan bangusa Israel mongokai bo moposindog bui in ḷoḷaigan. Kon bonu in goḷom tatua umuranpa kon ḻimonik in Ḷoḷaigan i Tuhan, yo mosia in umuranpa doman mogutun kon tampat tatua.

¹⁹ Aka goḷom tatua moonggot kon tombutung in Ḷoḷaigan tatua, mosia in motoindudui kon atorang i Tuhan bo diá mobuat nongkon tampat tatua.

²⁰ Táe siga-sigad tongá tongonumai nosinggai in goḷom tatua kon tombutung in Ḷoḷaigan tatua. Naondakabí, parentabí i Tuhan in monantú kon i monia mogutun kon tampat tobatú andeka mobuat.

²¹ Siga-sigad goḷom tatua tongá nongkon ḷoḷabungnea modapot in doḷo-doḷom, bo kon dodai in goḷom tatua mamonik kon dodai in doḷo-doḷom, dá mosia in mobuat doman. Toonukabí in goḷom tatua mamonik, pinomayá singgai andeka doḷom, mobuatbí doman in mosia.

²² Kon bonu in goḷom tatua kon tombutungpa in Ḷoḷaigan i Tuhan, pinomayá doyowa nosinggai, tobuḷan, totaong, andeka moiḻiu, dá natua doman in koonggotnea in mosia mogutun kon tampat tatua. Aka goḷom tatua mamonik, bain tua mosia bo mobuat.

²³ Mosia in mogutun kon tobatú tampat bo mobuat mayá in tampat ibanea podudui in parenta i Tuhan inta pinotaau i Tuhan kon i Musa.