PINOGIAPAN 35 - Alkitab Singog In Mongondow Masa In Tanaa

Kotá mita kon intau in Lewi

¹ Kon rata in Moab, kon bingkí in Ongkag in Yordan, kon diug in kotá in Yerikho, ki Tuhan noguman kon i Musa,

² “Potaaudon kon bangusa Israel kon nongkon butá tonsilai inta bain tarimaan monia tua, tongonumai in kotánea takin rawang in bonok kon diugneamai musti ogoi monimu kon intau in Lewi sinbá mosia motaau mogutun kon tua.

³ Kotá mita tatua in nobaḻídon kapunyaan in intau in Lewi sin baḻíon pogogutunan monia. Rawang in bonok kon diugneamai in nobaḻí popokaanan in bobiagon monia.

⁴ Rawang in bonok tua kooḷadnea in 450 nometer ḻibu-ḻibu, inukur nongkon dinding in kotá.

⁵ Dá butá intau in Lewi notonggopat, inta ukurannea in tumososiow nogatut nometer, bo kotánea in kon yua-yuaknea.

⁶ Intau in Lewi musti ogoian monimu in kotá pogogadopan onom sin baḻíon tampat poḷoḷaguian in intau inta diá sinumuod noḻimod kon intau ibanea. Kon ḻikud intua intau in Lewi musti ogoian doman in kotá ibanea opat nopuḷú bodoyowá

⁷ takin rawang in bonoknea. Dá kobayongnea komintan in opat nopuḷú bo waḷu in kotá ogoi kon intau in Lewi.

⁸ Kobayong in kotá mita in intau in Lewi kon bonu in wilayah in batúan suku in Israel musti tantúon podudui kon kobayong in kotá bo koḷoben in wilayah tatua.”

Kotá mita pogogadopan

⁹ Ki Tuhan nopotabá kon i Musa

¹⁰ mopotaau kon bangusa Israel in tosingogon mita tanaa, “Naonda in mopaḷut mako ḷumoḷan kon Ongkag in Yordan bo tumuotdon kon butá in Kanaan,

¹¹ musti tantúon monimu in kotá mita pogogadopan, sinbá intau mita inta diá sinumontuon noḻimod kon intau ibanea, motaau in moḷagui mayá intua.

¹² Kon kotá mita tatua intau tatua moaman nongkon ginaḷum in intau inta kinoḻimodan tua inta moibog motuḻí. Sin intau inta pinoponapudan noḻimod kon intau ibanea, diábí motaau in ḻimodon aka pelekaranea diápa muna sidangon kon pongadilan kon bayongan intau.

¹³ Tantúdon in kotá pogogadopan onom,

¹⁴ toḷu in kon dotá in pomukaan kon Ongkag in Yordan bo toḷu doman in kon butá in Kanaan.

¹⁵ Kotá onom tatua mobaḻí kotá pogogadopan monimu, intau in Israel, bo kon intau ango-angoi andeka inta nogutun notantú kon yua-yuak monimu. Ki inekabí inta diá sinumontuon noḻimod kon intau ibanea, motaaubí in mayá moḷagui kon tobatú in kotá tatua.

^16-18 Tongá aka intau tobatú bo nopomakédon in pakakat uatoi andeka batu andeka kayu sin poḻimod kon intau ibanea, dá intau tatua in totuubí kon moḷoḻimod; sia tua in kotaḷá bo musti hukumon dapot in matoi.

¹⁹ Ginaḷum inta modaginpa totok in intau inta iḻimod tua motaaubí in mopoaid in hukuman matoi tatua. Aka mouḻínea in intau inta noḻimod tatua, motaaubí ḻimodonnea.

²⁰ Aka intau tobatú moyaat in ginanea kon intau ibanea, bo poḷat moḻimod kon intau tatua takin mopomobak kon inia andeka mopogarab in barang tobatú kon inia,

²¹ andeka mongoyungkum, yo intau tatua in moḷoḻimod; sia tua in kotaḷá bo musti hukumon matoi. Ginaḷum inta totokpa in modagin in intau inta iḻimod tatua motaaubí in mopobayá in hukuman matoi tatua. Aka moyodungkuḷnea in intau inta noḻimod tatua, yo motaaubí in ḻimodonnea.

²² Tongá oyúonbí doman in mobaḻí intau tobatú in diábí sinumontuon noḻimod kon intau inta diábí kinoyaatnea, pinomayá nopomobak kon intau tatua andeka nopogarab in barang kon intau tatua.

²³ Ande oyúon in inta mobaḻí intau tobatú in diá noindoi muna, bo noḷabú kon batu tobatú inta nokopopisí kon kinopatoian in intau ibanea inta deeman musungnea, bo diábí doman in makusudnea mopobodito kon intau tatua.

²⁴ Kon pelekara mita ná tatua kon poyodungkuḷan in umat musti mopoyotutui kon intau inta ain noiḷaut noiḻimod, bo intau inta moibog motuḻí kon kinopatoian in intau inta ain kinoḻimodan.

^25-28 Poyodungkuḷan in umat musti moḷukad kon intau inta diá sinumontuon noḻimod tatua kon gogondok in ginaḷum in intau inta kinoḻimodan tatua. Intau tatua musti diaan bui pobayá in kotá pogogadopan, tampat pinoḷaguiannea tatua. Musti in sia mogutun kon tua modapot in intau inta tungkuḷ intua nobaḻí Imang Moḷoben matoidon; bain tua bo motaaudon in sia mobui kon ḻipúnea tontaní. Tongá aka sia monaḷámai kon kotá pogogadopan inta pinoḷaguiannea tatua, bo noyodungkuḷbí bo poḷat iḻimod in ginaḷum in intau inta kinoḻimodan tatua, dá aid notuḻí tatua in deemanbí pinoḻimodan.

²⁹ Atorang mita tatua pakéon kon i monimu bo kon buímu, kon ondakabí in pinogutunan monimu.

³⁰ Kon pelekara poḻimodan, intau inta sinapudan noḻimod, motaau poponiata kon kotaḷá bo ḻimodon aka aidnea tatua motaau popobukiag takin oyúon in sakusi intau doyowa andeka noiḻiu. Tobatú in sakusi tua in diápabí tugat mopobukiag kon onu inta pinonapud tatua in totuu.

³¹ Moḷoḻimod tobatú in mustibí hukumon matoi. Diábí motaau tobutonnea in doit in hukuman tatua.

³² Aka intau tobatú noḷagui kon kotá pogogadopan tobatú, dikabí ogoi in sia mobogoi in doit sinbá motaaudon in sia mobui kon baḷoinea kon dodai in ki Imang Moḷoben diápa minatoi.

³³ Aka aidan monimu in natua, yo moiko in nokoporomúdon kon butá inta pinogutunan monimu. Poḻimodan mokoporomú kon butá; dá diábí in aid ibanea mondarit in butá tatua koḻikudbí in monginggamá kon kobiagan in intau inta noḻimod tatua.

³⁴ Donaai moporomúmai in butá inta pinogutunan monimu, sin Akuoi ki Tuhan, bo Akuoi in nogutun kon yua-yuak in bangusa Israel.”