PINOGIAPAN 3 - Alkitab Singog In Mongondow Masa In Tanaa

Ki adí mita i Harun

¹ Naa in buí mita i Harun bo i Musa kon dodai in ki Tuhan noyosingog i Musa kon Buḷud in Sinai.

² Ki adí i Harun opat, naa in tangoi monia: Ki Nadab in guya-guyang, induduinea in ki Abihu, ki Eleazar bo ki Itamar.

³ Mosia binaḻí imang pinongin upacara pinomutakan in ḷana kon uḷu.

⁴ Táe ki Nadab bo ki Abihu in minatoi kon padang gurun Sinai, kon tungkuḷ in mosia minayá kon tayowon i Tuhan bo nodia kon tuḷú inta diá kinoibog i Tuhan. Taya dua tua in diá kogadí. Dá kon dodai in ki Harun nobiagpa, ki Eleazar bo ki Itamar in nobaḻí imang.

Intau mita in Lewi piniḻí mobantung kon oaidan in imang mita

⁵ Ki Tuhan noguman kon i Musa,

⁶ “Potabádon in suku Lewi mamangoi tumayow, bo piḻídon in mosia mobaḻí intau mita inta mobantung kon i imang Harun.

⁷ Mosia in musti mopobayá in oaidan kon Ḷoḷaigan-Ku bo musti mobantung kon imang mita bo bayongan umat takin mogaid kon oaidan tatua kon Ḷoḷaigan-Ku tatua.

⁸ Oaidan monia tua in monoinut kon bayongan touḷut kon Ḷoḷaigan-Ku bo mogaid kon oaidan kon Ḷoḷaigan-Ku tua mobaḻí toḻiu in intau mita in Israel.

⁹ Nongkon bangusa Israel tatua, tongábí suku i Lewi in pokiaidan-Ku in oaidan tatua sin mobantung kon i Harun bo buínea.

¹⁰ Táe ki Harun bo ki adínea mita in musti baḻíon-Ku imang sin mogaid kon oaidan-Ku, koḻikud in mosia, yo ki ineka in monungkuḷ mopobayá in oaidan tatua musti hukumon dapot in matoi.”

¹¹ Ki Tuhan noguman kon i Musa,

^12-13 “Tanaa in intau mita in Lewi piniḻí-Ku nobaḻí Akuoi in kitogi. Kon tungkuḷ nodait-Ku iḻimod in adí guya-guyang in bangusa Mesir, sinondí-Kudon kon i-Nakó in bayongan adí guya-guyang ḷoḷaki in bangusa Israel bo bayongan in bobiagon monia inta pinogadí muna. Tua komintan in Akuoibí in kitogi. Nobaḻí toḻiu in adí ḷoḷaki guya-guyang in intau Israel, dá ginamá-Kudon intau in Lewi; mosia in mobaḻí kapunyaan-Ku. Akuoi in ki Tuhan.”

Pinogiapan kon intau in Lewi

¹⁴ Kon padang gurun Sinai ki Tuhan nopotabá kon i Musa

¹⁵ nogiap kon intau mita in Lewi podudui in inanakan bo batúan koluarga monia; Bayongan adí ḷoḷaki inta umur tobuḷan bo namonik musti paison in tangoinea.

¹⁶ Bo inaidan i Musa in parenta i Tuhan tatua.

^17-20 Ki Lewi kogadí kon ḷoḷaki toḷu: ki Gerson, ki Kehat bo ki Merari. Mosia tua in nobaḻí mogoguyang in inanakan mita inta sinangoi podudui in tangoi monia. Ki Gerson kogadí kon ḷoḷaki doyowa: ki Libni bo ki Simei. Ki Kehat kogadí kon ḷoḷaki opat: ki Amram, ki Yizhar, ki Hebron bo ki Uziel. Ki Merari kogadí kon ḷoḷaki doyowa: ki Mahli bo ki Musi. Mosia tua in nobaḻí mogoguyang in koluarga mita inta sinangoian podudui in tangoi monia.

²¹ Inanakan i Gerson in koluarga mita i Libni bo i Simei.

²² Kobayong in adí ḷoḷaki inanakan i Gerson inta umur tobuḷan bo namonik inta kinopaisan in 7.500.

^23-24 Ki Elyasap adí i Lael nobaḻí itoi kon inanakan tatua. Kon pinononḷoḷaigan in bangusa Israel, inanakan tatua nogamá kon tampat kon dotá in toyopan kon tumi in Ḷoḷaigan i Tuhan.

²⁵ Kon bonu in monoinut kon Ḷoḷaigan i Tuhan, mosia inogoian tanggung jawab monompia kon Ḷoḷaigan bo atopnea, kaeng kon ngara tumuot,

²⁶ toḷipoi in bosínea inta pinoḻibu kon Ḷoḷaigan bo mezbah, bo toḷipoi in ngara in bosínea tatua. Mosia in musti motanggung jawab kon bayongan oaidan inta oyúon in hubungannea takin pakakat mita kon tua.

²⁷ Inanakan i Kehat in koluarga mita i Amram, i Yizhar, i Hebron bo i Uziel.

²⁸ Ḷoḷaki inta umur tobuḷan bo namonik nongkon inanakan tatua in kobayongnea komintan in 8.600. Mosia tua in inogoian oaidan monoinut bo monompia kon pakakat mita inta kon Ḷoḷaigan i Tuhan.

^29-30 Ki Elisapan adí i Uziel in nobaḻí itoi kon inanakan tatua. Kon pinononḷoḷaigan, inanakan tatua nogamá kon tampat kon dotá in toḷatan Ḷoḷaigan i Tuhan.

³¹ Mosia pinoki ḷukadan in Poti Dodandian, meja, sioḷ in totuduan in togá, mezbah mita, pakakat mita inta pakéon in imang kon Yuang Motusi, bo toḷipoi inta nopotondí in Yuang Motusi. Mosiadon tua in kitogi totaau kon bayongan oaidan inta noyotogot in pakakat mita tatua.

³² Nobaḻí tongguḷu kon suku Lewi in ki Eleazar, adí i Harun. Sia in moindoi kon intau mita inta mogaid kon Yuang Motusi.

³³ Inanakan i Merari in koluarga mita i Mahli bo koluarga i Musi.

³⁴ Ḷoḷaki inta umur tobuḷan bo namonik nongkon inanakan tatua kobayongnea in 6.200.

³⁵ Ki Zuriel adí i Abihail in nobaḻí itoi kon inanakan tatua. Kon pinononḷoḷaigan, inanakan tatua nogamá kon tampat kon dotá in Utuan Ḷoḷaigan i Tuhan.

³⁶ Mosia in pinoki ḷukadan in tombaḷoi in Ḷoḷaigan tatua, balaknea mita, oiginea mita, datoḷannea, bo bayongan pakakat takin bayongan oaidan inta noyotogot in pakakat mita tatua.

³⁷ Bo takin doman oigi mita, takin datoḷanea mita, bo patok mita bo tontogot mita inta pakéon kon bosínea kon ḷuai.

³⁸ Kon bonu in pinononḷoḷaigan, ki Musa bo ki Harun takin ki adínea mita musti mogamá kon tampat kon tayowon in Ḷoḷaigan i Tuhan, kon dotá in pomukaan. Mosia in kitogi totaau kon poibadaan in bangusa Israel kon Yuang Motusi. Kon ḻikud in mosia, ki ineka in monungkuḷ mogaid kon oaidan tatua musti hukumon dapot in matoi.

³⁹ Bayongan ḷoḷaki kon suku Lewi inta umur tobuḷan namonik inta pinais i Musa podudui in inanakannea tontaní podudui in parenta i Tuhan, kobayongnea komintan in 22.000.

Intau in Lewi nobaḻí toḻiu in adí mita ḷoḷaki guya-guyang in Israel

^40-41 Ki Tuhan noguman kon i Musa, “Bayongan adí ḷoḷaki guya-guyang Israel in Akuoibí in kitogi. Paisdon in tangoi mita monia inta umur tobuḷan bo namonik. Táe nobaḻí toḻiu monia, poniata-Kudon kon bayongan intau in Lewi tua in nobaḻí kapunyaan-Ku. Akuoi in ki Tuhan! Bo bobiagon in intau in Lewi doman poniata-Ku nobaḻí toḻiu in bayongan bobiagon inta muna pinogadí in bayongan bobiagon in bangusa Israel.”

⁴² Ki Musa nogaid kon onu inta pinoki aid i Tuhan; pinaisnea in tangoi mita in bayongan adí ḷoḷaki guya-guyang

⁴³ inta umur tobuḷan bo namonik. Kobayongnea komintan in 22.273.

⁴⁴ Bo ki Tuhan in noguman kon i Musa,

⁴⁵ “Potondídon in intau mita in Lewi tua kon i-Nakó nobaḻí toḻiu in bayongan in adí ḷoḷaki guya-guyang in Israel; bobiagon doman in intau in Lewi nobaḻí toḻiu in bobiagon in intau Israel.

⁴⁶ Popisí in kobayong adí guya-guyang ḷoḷaki in intau Israel 273, tua in mobayo-bayong nongkon intau mita in Lewi, dá ḻiunea tatua musti tobuton monimu.

⁴⁷ Batúan in adí tobuton monimu in doit saḷaka ḻima podudui in boḻinea inta sinantú kon Ḷoḷaigan-Ku;

⁴⁸ Ogoi in doit tatua kon i Harun bo kon i adínea mita.”

⁴⁹ Inaidan i Musa onu inta pinoki aid i Tuhan tua.

⁵⁰ Sia in nogamá kon 1.365 doit saḷaka,

⁵¹ bo nobogoi kon i Harun bo kon i adínea mita.