PINOGIAPAN 29 - Alkitab Singog In Mongondow Masa In Tanaa

Sosumba kon Taong Mobagu

¹ Kon singgai imitánea buḷan noginpitu moiko musti momia kon poyodungkuḷan sin moibada, bo diádon in motaau mogaid kon oaidan inta mobogat. Kon singgai tatua bayongan torompet musti daiton irupon.

² Posumbadon kon i Tuhan in kuruban payongon, sapi koḷakian tobatú inta batánea, domba koḷakian tobatú, bo ki adí in domba pitu koḷakian inta umur totaong, komintan inta diá in bogitnea. Rongingi in kuruban tatua in mokosanang kon gina i Tuhan.

³ Posumba doman in kuruban oḷudon inta ain sinantú, topong inta binauian in ḷana zaitun: toḷu nokilo in kon sapi koḷakian tobatú, doyowa nokilo in kon domba koḷakian,

⁴ bo tumongo kilo in kon batúan ki adí in domba.

⁵ Posumba domandon in ki adí in bembé koḷakian tobatú sin baḻíon kuruban potobut kon dosa. Natuata in pogogaid monimu kon upacara potobutan kon dosa in umat.

⁶ Kuruban mita tatua mobaḻí indugang kon kuruban payongon inta posumba poyotakinon in kuruban oḷudon, kon singgai imitánea muḷoi in buḷan. Bo nobaḻí doman indugang kon kuruban payongon muḷoi in singgai inta pinosumba pinoyotakin in kuruban oḷudon bo kuruban tubig in anggurnea. Rongingi in kuruban payongon tatua in mokosanang kon gina i Tuhan.

Sosumba kon Singgai Potobutan kon Dosa

⁷ Kon singgai impuḷúnea buḷan noginpitu moiko musti momia kon poyodungkuḷan sin moibada. Kon singgai tatua moiko in musti mopuasa bo diábí motaau mogaid.

⁸ Posumbadon kon i Tuhan in kuruban payongon ná sapi koḷakian tobatú inta batánea, domba koḷakian tobatú bo ki adí in domba koḷakian pitu inta umur totaong, komintan inta diá in bogitnea. Rongingi in kuruban tatua in mokosanang kon gina i Tuhan.

⁹ Posumba doman in kuruban oḷudon inta ain sinantú, ná topong inta binauian in ḷana zaitun: toḷu nokilo in kon sapi koḷakian, doyowa nokilo in kon domba koḷakian,

¹⁰ bo tumongo kilo in kon batúan adí in domba.

¹¹ Posumba domandon in bembé koḷakian tobatú kon upacara potobutan kon dosa in umat, koḻikud in kuruban potobutan kon dosa bo kuruban payongon muḷoi in singgai takin kuruban oḷudon bo kuruban tubig in anggurnea inta pinosumba singgai tua.

Sosumba kon Singgai Moḷoben in Pondok Daun

¹² Kon singgai impuḷú bo ḻima buḷan noginpitu moiko in musti momia kon poyodungkuḷan sin moibada, bo diábí motaau in mogaid kon oaidan inta mobogat. Kon bonu in pitu nosinggai moiko musti momia kon porayaan sin mohoromat kon i Tuhan.

¹³ Kon singgai dungkuḷ posumbadon kon i Tuhan in kuruban payongon sapi koḷakian batánea mopuḷú bo toḷu, domba koḷakian batánea doyowa, bo adí in domba mopuḷú bo opat umur totaong, komintan inta diá in bogitnea. Rongingi in kuruban tatua in mokosanang kon gina i Tuhan.

¹⁴ Posumba doman in kuruban oḷudon inta ain sinantú ná topong inta binauian in ḷana zaitun: toḷu nokilo in kon batúan in sapi koḷakian, doyowa nokilo in kon batúan in domba koḷakian,

¹⁵ bo tumongo kilo in kon batúan in ki adí in domba. Poyotakinon in kuruban oḷudon tatua musti posumba doman in kuruban in tubig in anggur inta pinaké.

¹⁶ Koḻikud intua posumba doman in bembé tobatú koḷakian sin baḻíon kuruban potobut kon dosa. Kuruban tatua in nobaḻí indugang in kuruban payongon muḷoi in singgai takin kuruban oḷudon bo kuruban tubig in anggurnea.

¹⁷ Kon singgai nogindua posumbadon in sapi koḷakian batánea mopuḷú bodoyowá, bo domba koḷakian doyowa, bo ki adí in domba koḷakian mopuḷú bo opat umur totaong, komintan inta diá in bogitnea.

^18-19 Posumba doman poyotakinon intua komintan in kuruban mita ibanea ná inta pinaké kon singgai dungkuḷ.

²⁰ Kon singgai nogintoḷu posumbadon in sapi koḷakian batánea mopuḷú bomitá, domba koḷakian doyowa, bo adí in domba koḷakian mopuḷú bo opat inta umur totaong, komintan inta diá in bogitnea.

^21-22 Posumbadon poyotakinon intua mita in kuruban mita ibanea ná inta pinaké kon singgai dungkuḷ.

²³ Kon singgai noginggopat posumbadon in sapi koḷakian batánea mopuḷú, domba koḷakian doyowa, bo adí in domba koḷakian mopuḷú bo opat inta umur totaong, komintan inta diá in bogitnea.

^24-25 Poyotakinon intua posumba domandon in bayongan kuruban ibanea ná inta pinaké kon singgai dungkuḷ.

²⁶ Kon singgai noginḻima posumbadon in sapi koḷakian batánea siow, domba koḷakian doyowa, bo adí in domba koḷakian mopuḷú bo opat inta umur totaong, komintan inta diá in bogitnea.

^27-28 Poyotakinon intua posumba doman in bayongan kuruban ibanea ná inta pinaké kon singgai dungkuḷ.

²⁹ Kon singgai noginggonom posumbadon in sapi koḷakian batánea waḷu, domba koḷakian doyowa, adí in domba mopuḷú bo opat inta umur totaong, komintan inta diá in bogitnea.

^30-31 Poyotakinon intua posumba doman in bayongan kuruban ibanea ná inta pinaké kon singgai dungkuḷ.

³² Kon singgai noginpitu posumbadon in sapi koḷakian batánea pitu, domba koḷakian doyowa, adí in domba koḷakian mopuḷú bo opat inta umur totaong, komintan inta diá in bogitnea.

^33-34 Poyotakinon intua posumba doman in bayongan kuruban ibanea ná inta pinaké kon singgai dungkuḷ.

³⁵ Kon singgai noginwaḷu moiko in musti momia kon poyodungkuḷan sin moibada bo diá motaau mogaid kon oaidan inta mobogat.

³⁶ Posumbadon kon i Tuhan kuruban payongon ná sapi koḷakian batánea tobatú, domba koḷakian tobatú, adí in domba koḷakian pitu inta umur totaong, komintan inta diá in bogitnea. Rongingi in kuruban tatua in mokosanang kon gina i Tuhan.

^37-38 Poyotakinon intua posumba domandon in bayongan kuruban ibanea ná inta pinaké kon singgai dungkuḷ.

³⁹ Tuata in atorang mita kon kuruban payongon, kuruban oḷudon, kuruban tubig in anggur, bo kuruban pondamean inta musti posumba monimu kon i Tuhan kon porayaanmu mita inta ain sinantú. Kuruban mita tatua in nobaḻí indugang kon kuruban mita inta posumba monimu sin moguboḻi kon dandi andeka kuruban ibog tontaní.

⁴⁰ Ki Musa nopotaau kon bangusa Israel in bayongan yagi-yagi inta pinarenta i Tuhan kon inia.