Biblia Todo Logo
Bìoball air-loidhne

- Sanasan -

PINOGIAPAN 28 - Alkitab Singog In Mongondow Masa In Tanaa


Sosumba mita pomuḷoi in singgai
( Iḷn. 29:38-46 )

1 Ki Tuhan nopotabá kon i Musa

2 mopotaau kon bangusa Israel kon mosia in mustibí, monarukira totok sinbá kon wakutu mita inta ain sinantú, moposumba in kuruban mita inta ná kaanon inta mokosanang kon gina i Tuhan.

3 Naa in kuruban inta musti posumba kon i Tuhan: Inta mobaḻí kuruban muḷoi in singgai, tua in ki adí in domba koḷakian doyowa inta umur totaong inta diá nobogit,

4 tobatú in baḻíon sosumba doḷo-doḷom, bo inta tobatú in baḻíon sosumba ḷoḷabungnea.

5 Poyotakinon in adí in domba tatua musti posumba doman in topong tokilo inta binauian in ḷana zaitun toliter inta totok in nopira.

6 Tuata in kuruban payongon notantú inta muna totok posumba kon Buḷud in Sinai. Ronginginea mokosanang kon gina i Tuhan.

7 Poyotakinon in adí in domba tatua musti posumba doman in tubig in anggur toliter inta popobutak kon tudu in mezbah.

8 Ki adí in domba inta baḻíon kuruban ḷoḷabungnea musti pokuruban ná mopokuruban in sosumba doḷo-doḷom, takinan in tubig in anggur. Rongingi in kuruban payongon tatua in mokosanang kon gina i Tuhan.


Sosumba kon singgai in Sabat

9 Kon singgai in Sabat musti mopokuruban in adí in domba koḷakian doyowa inta umur totaong inta diá nobogit, bo topong doyowa nokilo poyobauion in ḷana zaitun sin baḻíon kuruban oḷudon bo pokuruban doman in tubig in anggur.

10 Kuruban payongon tatua musti posumba pomuḷoi in singgai in Sabat mobaḻí indugang in kuruban muḷoi in singgai poyotakinon in kuruban tubig in anggurnea.


Sosumba kon singgai imitánea muḷoi in buḷan

11 Kon singgai imitánea muḷoi in buḷan musti posumba kon i Tuhan in kuruban payongon ná sapi koḷakian doyowa inta batánea, domba koḷakian tobatú, bo pitu in adí in domba koḷakian inta umur totaong, inta diá nobogit.

12 Mobaḻí kuruban oḷudon dá musti posumba in topong inta binauian in ḷana zaitun; topong toḷu nokilo in kon batúan sapi koḷakian; bo topong doyowa nokilo in kon domba koḷakian,

13 bo topong tokilo in kon batúan in ki adí in domba koḷakian. Kuruban payongon tatua in nobaḻí kuruban kaanon, ronginginea in mokosanang kon gina i Tuhan.

14 Poyotakinon in kuruban payongon tatua musti posumba doman in kuruban tubig in anggur, kobayongnea doyowa noliter kon batúan in sapi koḷakian, toliter bo moyoḷomboi in kon domba koḷakian, bo toliter in kon batúan in adí in domba. Tuata in atorang kon kuruban payongon inta musti posumba kon singgai noginmitá kon muḷoi in buḷan kinoouput in taong.

15 Mobaḻí indugang in kuruban payongon muḷoi in singgai takin kuruban tubig in anggurnea, yo musti doman posumba monimu in bembé koḷakian tobatú sin baḻíon kuruban potobut kon dosa.


Sosumba kon Singgai Moḷoben in Roti diá in Ragi
( Im. 23:5-14 )

16 Kon singgai impuḷú bo opat buḷan noginmitá, tua in singgai in Paska kon i Tuhan.

17 Singgai noiduduimai, singgai impuḷú boḻima, pangkoidon in Porayaan Roti diá in Ragi, bo kon bonu in pitu nosinggai tua moiko in diábí motaau in mokaan kon roti inta iragian.

18 Kon singgai dungkuḷ kon porayaan tatua moiko in musti momia kon poyodungkuḷan sin moibada, bo diábí in motaau mogaid kon oaidan inta mobogat.

19 Posumbadon kon i Tuhan in kuruban payongon inta ná sapi koḷakian doyowa inta batánea, domba koḷakian tobatú, bo ki adí in domba koḷakian pitu inta umur totaong, komintan inta diá nobogit.

20 Posumbadon in kuruban oḷudon inta ain sinantú, ná topong inta binauian in ḷana zaitun: topong toḷu nokilo in kon batúan sapi koḷakian, bo doyowa nokilo in kon domba koḷakian,

21 bo tumongo kilo in kon batúan in adí in domba koḷakian.

22 Posumba domandon in bembé koḷakian tobatú inta baḻíon kuruban potobut kon dosa. Natuata in pogogaid monimu kon upacara potobutan kon dosa in umat.

23 Bayongan in kuruban tatua nobaḻí indugang kon kuruban payongon doḷo-doḷom inta biasamai.

24 Natuata doman in pobobogoi monimu kon sosumba kuruban payongon kon i Tuhan kon bonu in pitu nosinggai. Kuruban tatua nobaḻí indugang kon kuruban payongon muḷoi in singgai takin kuruban tubig in anggurnea. Rongingi in kuruban tatua in mokosanang kon gina i Tuhan.

25 Kon singgai noginpitu moiko musti momia kon poyodungkuḷan sin moibada bo diá in motaau mogaid kon oaidan inta mobogat.


Sosumba kon Pesta Posipunan kon boyó
( Im. 23:15-22 )

26 Kon singgai dungkuḷ kon Pesta Posipunan kon boyó, singgai moḷoben nopaḷut mako kon pitu nodiminggu, kon dodai in moiko moposumba in gandum mobagu kon i Tuhan, moiko in musti momia kon poyodungkuḷan sin moibada, bo diá in motaau mogaid kon oaidan inta mobogat.

27 Posumbadon kon i Tuhan in kuruban payongon inta sapi koḷakian doyowa, domba koḷakian batánea bo adí in domba koḷakian pitu inta umur totaong, komintan diá in nobogit. Rongingi in kuruban tatua in mokosanang kon gina i Tuhan.

28 Posumbadon in kuruban oḷudon inta ain sinantú, ná topong inta binauian in ḷana zaitun: toḷu nokilo in kon batúan in sapi koḷakian, doyowa nokilo kon batúan in domba koḷakian,

29 bo tumongo kilo in kon batúan in adí in domba.

30 Posumba domandon in bembé koḷakian tobatú sin baḻíon kuruban potobut kon dosa. Natuata in pogogaid monimu kon upacara potobutan kon dosa in umat.

31 Kuruban mita tatua takin kuruban in anggurnea nobaḻí indugang in kuruban payongon muḷoi in singgai bo kuruban oḷudon.

Alkitab Singog In Mongondow Masa In Tanaa © Indonesian Bible Society, 2016.

Indonesian Bible Society
Lean sinn:



Sanasan