PINOGIAPAN 27 - Alkitab Singog In Mongondow Masa In Tanaa

Ki adí mita bobay i Zelapehad

¹ Ki Zelapehad kogadí kon bobay ḻima, inta ki Mahla, ki Noa, ki Hogla, ki Milka bo ki Tirza. Ki amá i Zelapehad in ki Heper, ki amá i Heper in ki Gilead. Ki amá i Gilead in ki Makhir, ki amá Makhir in ki Manasye, bo ki amá i Manasye in ki Yusup.

² Ki adí i Zelapehad ḻima tatua inta minayá kon tayowon i Musa, bo i Imang Eleazar, bo itoi mita bo bayongan umat inta noyosipunmai kon diug in ngara in Ḷoḷaigan i Tuhan. Guman monia,

³ “Ki amá nami minatoi kon padang gurun bo sia in diá kogadí kon ḷoḷaki. Sia tua in deemanbí dumodudui i Korah inta nomarontak kon i Tuhan. Ki amá nami tua in minatoi popisí in dosaneabí tontaní.

⁴ Táe nongonu sin tangoinea in mustibí popatan nongkon bangusa in Israel tongá popisí in sia diá kogadí kon ḷoḷaki? Ogoiaidon kami in butá tonsilai nami kon yua-yuak in utat mita i amá nami.”

⁵ Bo pelekara monia tatua pinotaau i Musa kon i Tuhan,

⁶ bo ki Tuhan noguman kon i Musa,

⁷ “Onu in pinoguman i adí mita i Zelapehad tua in totuubí. Dá ogoiaidon in mosia in butá tonsilai kon yua-yuak in utat i amá monia. Tonsilai i Zelapehad tua in musti poabat kon i adínea mita bobay tatua.

⁸ Pogumandon kon bangusa Israel kon aka ḷoḷaki tobatú bo matoi bo sia in diá kogadí kon ḷoḷaki, dá butá tonsilainea in musti ogoi kon i adínea inta bobay.

⁹ Aka sia diá kogadí kon bobay, dá butá tonsilainea tatua musti ogoinea kon i utatnea inta ḷoḷaki.

¹⁰ Aka diá in sia kogutat kon ḷoḷaki, dá butánea tatua ogoineadon kon utat ḷoḷaki i amánea.

¹¹ Aka diá in sia kogutat kon ḷoḷaki, bo diá doman in utat ḷoḷaki i amánea, yo butá tatua mobaḻí kapunyaan in ginaḷumnea inta totok in modagin nongkon kaumnea.” Onu inta ain sinantú tatua musti duduian in intau Israel mobaḻí atorang hukum inta pinarenta i Tuhan pinongin i Musa.

Ki Yosua piniḻí nobaḻí toḻiu i Musa

¹² Ki Tuhan noguman kon i Musa, “Potakodon kon Buḷud in Abarim, bo indoiaidon nongkon tua in butá inta ogoi-Ku kon intau in Israel.

¹³ Naonda in mopaḷut mako moindoi kon tua, matoidon in iko ná ki guya-guyangmu ki Harun,

¹⁴ sin kon padang gurun Zin kamunda ain noḷawang kon parenta-Ku. Kon tungkuḷ in kon Meriba bayongan rayat nongunsingog kon i-Nakó, bo moiko doí moponiata in kawasa-Ku kon tayowon monia kon dodai in mosia kinodaitan in tubig.” (Tua in nobaḻí kon bokaká in tubig Meriba kon Kades, kon padang gurun Zin.)

¹⁵ Bo ki Musa nosambayang,

¹⁶ “O, Tuhan Allah, inta nobogoi in kobiagan kon bayongan inta nobiag, poigumonku, tundúpa in intau tobatú inta motaau mobaḻí itoi kon bangusa tanaa;

¹⁷ intau inta motaau baḻíon itoi kon dodai in mosia moparang. Dikapa pomayá mako in umat-Mu naa naonda bo paanan in domba inta diá in gombala.”

¹⁸ Guman i Tuhan kon i Musa, “Oinídon in ki Yosua, adí i Nun. Sia tua in intau inta motoḻindat. Poukat in ḻimamu kon uḷunea.

¹⁹ Pokisindogaidon in sia kon tayowon i Imang Eleazar bo bayongan umat. Bo kon tayowon monia komintan iko in musti mopotaau kon ki Yosua tua in toḻiumu.

²⁰ Ogoidon kon inia in tongosilai in kawasamu, sinbá umat in Israel motoindudui kon inia.

²¹ Ki Yosua in musti mopoigum in totundú i Imang Eleazar, bo ki Eleazar in musti moḻibó kon onu in koibog-Ku takin mopomaké in Urim bo Tumim. Natua in pododia i Eleazar kon i Yosua bo bayongan bangusa Israel kon bonu in bayongan pelekara inta kobayáan monia.”

²² Inaidan i Musa in bayongan inta pinarenta i Tuhan kon inia. Pinoki sindogannea in ki Yosua kon tayowon i Imang Eleazar bo bayongan umat.

²³ Bo nopoukat in ḻimanea kon uḷu i Yosua bo nopotaau kon ki Yosua tua in toḻiunea, ná inta ain pinoguman i Tuhan kon inia.