PINOGIAPAN 26 - Alkitab Singog In Mongondow Masa In Tanaa

Pinogiapan nogindua

¹ Naonda in bodito tatua nopaḷut, ki Tuhan noguman kon i Musa bo kon i Eleazar, adí i Imang Harun,

² “Moiko in musti mogiap bui kon bayongan umat in Israel podudui in inanakan monia. Bayongan in ḷoḷaki inta umur doyowa nopuḷú notaong bo namonik inta motaaudon baḻíon tontara, musti daiton paison.”

^3-4 Ki Musa bo ki Eleazar nopobayá in parenta tatua. Mosia nogoiní kon bayongan in ḷoḷaki inta umur doyowa nopuḷú notaong bo namonik bo nosipun kon i monia kon ḷopá in Moab, kon ḷoḷan in Ongkag in Yordan, kon diug in kotá in Yerikho. Naa in intau mita Israel inta iḻumuai nongkon Mesir:

⁵ Nongkon suku i Ruben, adí guya-guyang i Yakub: inanakan i Henokh, i Palu,

⁶ i Hezron bo i Karmi.

⁷ Ḷoḷaki mita nongkon inanakan mita tatua kobayongnea in 43.730.

⁸ Ki adí i Palu in ki Eliab,

⁹ bo ki adí mita i Eliab in ki Nemuel, ki Datan bo ki Abiram. Ki Datan bo ki Abiram tua ain piniḻí in umat, táe mosia ain dinumugang kon dumodudui mita i Korah sin moḷawang kon i Musa bo kon i Harun bo moḷawang kon i Tuhan.

¹⁰ Bo butá noguang poḷat noḻiom kon i monia nodapot in mosia minatoi noyotakin i Korah takin dumoduduinea mita kon dodai in tuḷú nomokak kon doyowa nogatut bo ḻima nopuḷú in ḷoḷaki. Tua in nobaḻí tompoingat kon bangusa Israel.

¹¹ Táe ki adí mita i Korah diábí in noitakin kinoḻimodan.

¹² Nongkon suku i Simeon: Inanakan i Nemuel, i Yamin, i Yakhin,

¹³ i Zerah bo i Saul.

¹⁴ Kobayong in ḷoḷaki mita kon inanakan mita tatua in 22.200.

¹⁵ Nongkon suku i Gad: Inanakan i Zepon, i Hagi, i Syuni,

¹⁶ i Ozni, i Eri,

¹⁷ i Arod bo i Areli.

¹⁸ Kobayong in ḷoḷaki mita nongkon inanakan mita tatua in 40.500.

^19-21 Nongkon suku i Yohuda: Inanakan i Syela, i Peres, i Zerah, i Hezron bo i Hamul. Ki adí i Yohuda doyowa inta ki Er bo ki Onan, ain minatoi kon butá in Kanaan.

²² Kobayong in ḷoḷaki nongkon inanakan mita tatua in 76.500.

²³ Nongkon suku i Isakhar: Inanakan i Tola, i Pua,

²⁴ i Yasub bo i Simron.

²⁵ Kobayong in ḷoḷaki mita kon inanakan tatua in 64.300.

²⁶ Nongkon suku i Zebulon: Inanakan i Zered, i Elon bo i Yahleel.

²⁷ Kobayong in ḷoḷaki mita kon inanakan mita tatua in 60.500.

²⁸ Nongkon buí i Yusup, inta kogadí kon adí ḷoḷaki doyowa: Suku i Manasye bo suku i Epraim.

²⁹ Nongkon suku i Manasye: Ki Makhir, adí i Manasye, in ki amá i Gilead; bo inanakan mita moiduduimai naa in buí i Gilead:

³⁰ Inanakan i Iezer, i Helek,

³¹ i Asriel, i Sekhem,

³² i Semida bo i Heper.

³³ Ki Zelapehad adí i Heper diá kogadí kon ḷoḷaki, tongá bobay. Tangoi monia in ki Mahla, ki Noa, ki Hogla, ki Milka bo ki Tirza.

³⁴ Kobayong in ḷoḷaki nongkon inanakan mita tatua in 52.700.

³⁵ Nongkon suku i Epraim: Inanakan i Sutela, i Bekher, bo Tahan.

³⁶ Inanakan i Eran in buí i Sutela.

³⁷ Kobayong in ḷoḷaki mita kon inanakan tatua in 32.500. Tuata in inanakan mita buí i Yusup.

³⁸ Nongkon suku i Benyamin: inanakan i Bela, i Asybel, i Ahiram,

³⁹ i Sepupam bo i Hupam.

⁴⁰ Inanakan i Ared bo i Naaman in buí i Bela.

⁴¹ Kobayong in ḷoḷaki mita kon inanakan mita tatua in 45.600 in intau.

⁴² Nongkon suku i Dan: Inanakan i Suham.

⁴³ Kobayong in ḷoḷaki kon inanakan tatua in 64.400.

⁴⁴ Nongkon suku i Asyer: Inanakan i Yimna, i Yiswi bo i Beria.

⁴⁵ Inanakan i Heber bo i Malkiel in buí mita i Beria.

⁴⁶ Ki Asyer kogadí kon bobay tobatú tangoinea in ki Serah.

⁴⁷ Kobayong in ḷoḷaki kon inanakan mita tatua in 53.400.

⁴⁸ Nongkon suku i Naptali: Inanakan i Yahzeel, i Guni,

⁴⁹ i Yezer bo i Syilem.

⁵⁰ Kobayong in ḷoḷaki kon inanakan mita tatua in 45.400.

⁵¹ Kobayong in ḷoḷaki mita intau in Israel in 601.730.

⁵² Ki Tuhan noguman kon i Musa,

⁵³ “Silai in butá tatua kon suku mita in bangusa Israel podudui in kobayong in suku mita tatua.

^54-56 Aidai intua takin momaké in undi, Tongguḷu in suku moḷoben musti ogoianmu in tonsilai inta moḷoben, bo suku inta mointok ogoiai doman in tonsilai mointok.”

⁵⁷ Suku i Lewi tua in kinosipunan in Inanakan i Gerson, i Kehat bo i Merari.

⁵⁸ Kon buí monia tua noituot doman in inanakan i Libni, i Hebron, i Mahli, i Musi bo i Korah. Ki Kehat tua in ki amá i Amram.

⁵⁹ Ki Amram notonibuḷoi i Yokhebed, adí i Lewi. Ki Yokhebed tua noilahir kon Mesir. Ki Amram bo ki Yokhebed kogadí kon ḷoḷaki doyowa: ki Harun bo ki Musa, takin bobay tobatú ki Miryam in tangoinea.

⁶⁰ Ki Harun kogadí kon ḷoḷaki opat: Ki Nadab, ki Abihu, ki Eleazar bo ki Itamar.

⁶¹ Ki Nadab bo ki Abihu minatoi kon dodai in mosia noposumba in tuḷú inta kinodoí i Allah.

⁶² Ḷoḷaki mita inta nongkon suku i Lewi inta umur tobuḷan bo namonik kobayongnea in 23.000. Mosia iniap pinoyotontaní nongkon intau mita inta tobangusanea, sin mosia in diá nokouḻí kon butá tonsilai kon Israel.

⁶³ Tuata in pinogiapan inta pinomia i Musa bo i Imang Eleazar kon inanakan mita in Israel kon dodai in mosia nogiap kon ḷopá in Moab inta kon ḷoḷan in Ongkag in Yordan kon diug in kotá in Yerikho.

⁶⁴ Intau mita inta koḻipod tangoi monia pinais i Musa bo i Harun kon padang gurun Sinai, diádon tobatúmai in nobiagpa.

⁶⁵ Ki Tuhan ain noguman kon mosia komintan in matoibí kon padang gurun. Bo totuu kon mosia in minatoidon komintan, koḻikudon in ki Kaleb adí i Yepune bo ki Yosua adí i Nun.