PINOGIAPAN 25 - Alkitab Singog In Mongondow Masa In Tanaa

Bangusa Israel kon Buḷud in Peor

¹ Kon dodai intua bangusa Israel nogutun kon Ḷopá in Sitim, Intau mita ḷoḷaki monia nomangkoidon nonuaḻing takin bobay mita in Moab inta nogutun kon tua.

² Bobay mita tatua nonongganut kon i monia mayá in bobutungan kuruban sin mohoromat kon i ilah monia. Intau mita in Israel sinumakin doman nokaan kon kaanon kuruban tatua bo nosumba doman kon ilah intau in Moab.

³ Popisí in intau Israel nosumbadon kon i Baal Peor, dá ki Tuhan sinumorú kon i monia bo noguman kon i Musa,

⁴ “Domokdon in bayongan intau inta nobaḻí itoi mita in bangusa tatua bo ḻimod in mosia kon tayowon in intau mobarong sin moponiata mogaid kon onu inta pinarenta-Ku, sinbá Akuoi in diádon tumorú bui kon bangusa tatua.”

⁵ Onda intua ki Musa noguman kon hakim mita in Israel, “Moiko komintan musti moḻimod kon bayongan intau kon bonu in sukumu inta ain nosumba kon Baal Peor.”

⁶ Kon dodai in ki Musa bo bayongan in umat mogamuimai kon tayowon in Ḷoḷaigan i Tuhan, mosia in nokoontong kon intau in Israel tobatú nodia kon bobay in Midian tobatú sinumuot kon bonu in ḷoḷaigannea.

⁷ Kon dodai in ki Pinehas, adí i Eleazar, ki ompu i Imang Harun nokoontong kon tua, sinimindog in sia bo nonaḷámai kon pinoyosipunan tatua. Ginamánea in ginubat tobatú

⁸ bo inaḷowannea in ḷoḷaki bo bobay tatua kon bonu in ḷoḷaigan. Sinakuḷnea in taya dua tua dá nogogaidon in bodito inta noiantug kon Israel dodai intua.

⁹ Táe dodai intua ain 24.000 in intau minatoi.

¹⁰ Bo ki Tuhan noguman kon i Musa,

¹¹ “Ki Pinehas adí i Eleazar, ki ompu i Imang Harun, totokdon in moibog noguntu kon kahoromatan-Ku kon sigad in intau Israel, dá torú-Ku in noinggamádon bo diádon motuoi-Ku yopúon in bangusa tatua.

¹² Dá pogumandon kon i Pinehas kon Akuoi in mogaid kon dodandian tobatú takinnea.

¹³ Sia bo buínea in tantúon-Kudon umuran mobaḻí imang, sin sia aindon noramuji totok noguntu kon kahoromatan-Ku, ki Allahnea, bo ain doman nomia kon pondamean kon dosa in intau Israel.”

¹⁴ Intau in Israel inta iḻimod pinoyotakin in bobay intau in Midian tatua tangoinea in ki Zimri, adí i Salu, tongguḷu in inanakan tobatú nongkon suku in Simeon.

¹⁵ Bobay tatua tangoinea in ki Kozbi; sia in ki adí i Zur, itoi tobatú in inanakan kon Midian.

¹⁶ Ki Tuhan nobogoi in parenta tanaa kon i Musa,

¹⁷ “Tayowaidon in intau in Midian, bo yompatdon in mosia

¹⁸ sin raat inta ain nobaḻí tomayá monia kon i monimu kon Peor, bo popisí in ki Kozbi adí in tongguḷu tobatú in inanakan kon Midian. Ki Kozbi tua in bobay inta minatoi iḻimod kon dodai in nobaḻí in bodito sin onu inta nobaḻí kon Peor.”