PINOGIAPAN 24 - Alkitab Singog In Mongondow Masa In Tanaa

¹ Naa in kinotaauandon i Bileam kon ibogon i Tuhan sia momarakatbí kon bangusa Israel. Tuamai in sia diá bidon notayak kon tomponuot mita ná inta inaidannea dungkuḷ. Ki Bileam nobobui ná padang gurun,

² bo nokoontong kon bangusa Israel inta nononḷoḷaigan inta sinondi-tondí pinodudui in suku bangusanea. Bo Roho i Allah nongawasa kon i Bileam,

³ bo sia in nopotaau kon onu inta mobaḻí moiduduimai, “Naadon in koyow i Bileam, adí i Beor, tosingogon in intau tobatú inta mosindap in mata

⁴ inta ain nokidongog kon tosingogon mita i Allah bo inta ain pinoki pogontongan i Inta Totok Mokawasa, kouḻi-uḻid, tongá kobuka-buká in mata.

⁵ Totuu diá in bogitnea in ḷoḷaiganmu mita ei Yakub, bo tampat mita pinogogaianmu, ei Israel!

⁶ Naonda bo ḷopá inta nooḷad nobayag mako, andeka taman kon bingkí in ongkag; naonda bo pangkoi in gaharu inta pinomuḷa i Tuhan, andeka pangkoi in aras kon bingkí in tubig.

⁷ Mosia nokouḻí kon tubig in uyan inta mobayong totok, bibit in pinomuḷa mokouḻí kon tubig mobayong. Datu monia in mobaḻí ponango-nangoian, moiḻiu kon i Agag, bo dodatuannea in totok poḷantudon.

⁸ Ki Allah inta nodia kon i monia iḻumuai nongkon Mesir, naonda bo bantong kaḻig Sia in moparang motuḷung kon i monia. Bangusa mita in musung modaitbí ḻiomon-Nea, tuḷan mita monia in toko ropúon-Nea, bo piot mita monia in putoḷon-Nea.

⁹ Bangusa tatua naonda bo singa koḷakian bo singa kobaayan, inta tumongkob bo umuḻid. Ki ine in mokobaḻí mopobangon kon inia? Poigumon mako intau inta momarakat kon inimu in barakatan doman, bo intau inta mongutuk kon inimu in kutukon doman.”

¹⁰ Sinumorú in ki Balak bo nongurongkom kon koyungkumnea poḷat noguman kon i Bileam, “Iko inoiníku sin mongutuk kon musungku mita, táe naa in kotoḷumudon binarakatan in mosia.

¹¹ Bayádon iko in tanaa mako, pobuidon kon baḷoimu! Akuoi ain nodandi moguboḻi kon inimu, táe diá ogoi i Tuhan in iko motarima kon tua.”

¹² Tubag i Bileam, “Munaku bidon pinotaau kon totabá mita i Tuangku kon

¹³ umpakabí daiton i Tuangku ogoi kon inakó in bayongan in saḷaka bo buḷawan kon komaḻig i Tuangku, yo diábí motaau in akuoi ḻimimpat kon parenta i Tuhan bo mogaid podudui in ibogku tontaní. Akuoi in tongábí motaau moguman kon onu in pinoki guman i Tuhan kon inakó.”

Pangabisan pinopotaauan kon onu in mobaḻí

¹⁴ Guman i Bileam kon i Balak, “Naa in akuoi mobuidon kon bangusaku. Táe kon dodai in akuoi diápa mayá, potaaukupa muna kon i Tuangku onu in aidan in bangusa Israel kon bangusa i Tuangku kon singgai moiduduimai.”

¹⁵ Bo ki Bileam nopotaau in onu in mobaḻí tua, “Naa in koyow i Bileam, adí i Beor; tosingogon in intau inta mosindap in mata

¹⁶ inta ain nokodongog kon tosingogon mita i Allah, bo inta notaau monotaau kon i Inta Totok in Moḷantud inta pinoki pogontongan i Inta Totok Mokawasa kouḻi-uḻid tongá kobuka-buká in mata.

¹⁷ Inontongku in sia, táe deemanbí tanaa mako; binobuiku in sia, táe nongkon noyayú. Datu tobatú nongkon Israel in sia, mamangoi naonda bo tundi inta motarang. Itoi mita in Moab in toko ropúonku bangusa i Set in rimumudonnea.

¹⁸ Butá in Edom in ḻitúanbí in musungnea, táe Israel momia kon oaidan inta moroton.

¹⁹ Nongkon i Yakub moitukatbí mangoi in pongawasa tobatú, inta moyompat kon musungnea mita.”

²⁰ Onda intua kon bonu in pinosindapan tatua ki Bileam nokoontong kon intau mita in Amalek. Dá sia nopotaau doman in tosingogon tanaa, “Nongkon bayongan in bangusa kon dunia, Amalek inta totok in mokawasa. Táe bangusa tatua kon buitnea, moitaḷom domandon turus.”

²¹ Kon bonu in pinosindapan tatua ki Bileam nokoontong kon buí i Keni, bo nopotaau in tosingogon tanaa, “Tampat pinogutunanmu tua in totuu kon morigon, naonda bo pugad kon tudu in buḷud batu.

²² Táe moiko, intau in Keni, in yopúon, diádon moonggot in Asyur bo modia kon i monimu mobaḻí intau inta sinoko dakop kon parang.”

²³ Onda intua ki Bileam nopotaau doman in tosingogon tanaa, “Mobodito! Ki ine in nobiag, aka aidandon i Allah intua?

²⁴ Táe nongkon Siprus mamangoibí in kapaḷ mita in parang, mosia in monaḷowbí kon Asyur bo Heber, onda intua kapaḷ mita in parang tatua moyopúbí doman.”

²⁵ Bo nosadiadon in ki Bileam mobui kon tampat pinogutunannea, bo ki Balak in minayá domandon.