PINOGIAPAN 23 - Alkitab Singog In Mongondow Masa In Tanaa

¹ Guman i Bileam kon i Balak, “Posindogdon kon naa in mezbah pitu sin pakéonku, bo sadia doman in sapi koḷakian pitu bo domba koḷakian pitu doman.”

² Ki Balak nomia kon ná inta pinoguman i Bileam kon inia. Kon tudu in batúan mezbah tatua mosia noposumba in tumongo batu in sapi koḷakian bo domba koḷakian doman.

³ Bo ki Bileam noguman kon i Balak, “Sindogdon kon diug in kuruban payongon i Tuangku. Bo akuoi in mayápa moindoi mongo moibog in ki Tuhan moyodungkuḷku andeka doí. Bain pogumanku in bayongan inta poguman i Tuhan kon inakó.” Dá ki Bileam minayá tontaní kon tudu in buḷud tobatú,

⁴ bo kon tampat tatua ki Allah namangoi kon inia. Guman i Bileam kon i Allah, “Akuoi ain noposindog in mezbah pitu bo noposumba domandon in sapi koḷakian tobatú bo domba koḷakian tobatú kon batúan in mezbah tatua.”

⁵ Bo pinotaaudon i Tuhan kon i Bileam in onu inta musti singogonnea, bo nopotabá bui kon inia mayá kon i Balak sin mopotaau in koyow i Tuhan kon inia.

⁶ Ki Bileam nobui bo kinobayáanneamai ki Balak simindogpa doman mako kon diug in kuruban payongonnea, noyotakin in bayongan itoi in Moab.

⁷ Bo ki Bileam nopotaau kon onu inta mobaḻí naa, “Nongkon Aram, buḷud kon pomukaan tatua, ki Balak, datu in Moab mogoiní kon inakó, kainia, ‘Angoipa, posingogpa kon inakó. Kutukpa in bangusa Israel tatua!’

⁸ Yo degá motaau in akuoi mongutuk, aka ki Allah in diá mongutuk? Yo degá motaau in akuoi mohukum aka ki Tuhan in diá mohukum?

⁹ Nongkon tudu mita in buḷud ontongonku in mosia; nongkon tudu mita in buḷud bobuionku in mosia. Indoiai, bangusa tobatú inta noitontaní diá kinobauian in bangusa ibanea.

¹⁰ Buí i Yakub naonda bo ḷobud diá koiapan; bangusa Israel kobayongnea totuu mobarong. Poigumon mako in akuoi matoi saḷaku intau motuḻid poigumon mako in kopopatoiku naonda bo kopopatoi in intau mita tatua.”

¹¹ Bo ki Balak noguman kon i Bileam, “Onu degá in aidanmu kon inakó? Iko nion in diniaku namangoi in naa sin mongutuk kon musungku mita. Táe naa iko in nomarakatbí kon i monia.”

¹² Tubag i Bileam, “Akuoi in tongábí motaau moguman kon onu inta pinoki guman i Tuhan.”

Pinopotaauan nogindua kon onu in mobaḻí

¹³ Bo ki Balak noguman kon i Bileam, “Koḻigai mayá in kita moyotakin kon tampat ibanea; nongkon tua iko mokoontong kon tongá tongosilai in bangusa Israel. Kutukdon in mosia nongkon tua.”

¹⁴ Dá ki Balak nodia kon i Bileam minayá in padang Zopim, kon tudu in Buḷud Pisga. Kon tua in sia noposindog doman in mezbah pitu bo noposumba doman in sapi koḷakian tobatú bo domba koḷakian doman tobatú kon batúan in mezbah tatua.

¹⁵ Guman i Bileam kon i Balak, “Oḷatpa kon naa, kon diug in kuruban payongon i Tuangku, akuoi in mayápa mokipodungkuḷ kon i Tuhan kon tua.”

¹⁶ Ki Tuhan nokipodungkuḷ kon i Bileam bo nopotaau kon inia in onu inta musti singogonnea, bo dongka nopotabá bui minayá kon i Balak sin mopotaau in koyow i Tuhan tua.

¹⁷ Dá nobuidon in ki Bileam bo kinobayáanneamai in ki Balak sinimindogpa doman mako kon diug in kuruban payongonnea, noyotakin in itoi mita in intau in Moab. Ki Balak noḻibó mongo onu in pinoguman i Tuhan,

¹⁸ bo ki Bileam nopotaau in onu inta mobaḻí naa, “Ei, Balak, adí i Zipor, koḻigai kon naa, indongogaipa onu inta pogumanku naa.

¹⁹ Ki Allah deemanbí ná intau inta moḷongkang angoian in momanasaḷ bo moibog monguboḷ. Aka ki Allah in modandi, yo notantúbí kon aidan-Nea! Aka Sia in mosingog, yo totuubí kon mobaḻí!

²⁰ Akuoi in pinotabá momarakat; bo aka ki Allah in momarakat, yo diábí in motaau indoianku bui.

²¹ Kon i Yakub diábí kinoontongan in moraat; kon Israel diábí doman kinoontongan in mororiga. Ki Tuhan, Allah monia, kotaki-takin monia. Mosia norogiow: Siabí in Datu!

²² Ki Allah in nodia kon i monia iḻumuai nongkon Mesir; naonda bo bantong kaḻig Sia in noparang sin motuḷung kon i monia.

²³ Diábí in totaau in kumaan kon i Yakub diábí in ponggaing in mokomampu monayow kon Israel. Tosingogon in intau soaḷ bangusa tatua, ‘Indoiai in mokoherang inta inaidan i Allah!’

²⁴ Bangusa tatua nobangon naonda bo singa kobaayan, bo simindog motorindog naonda bo singa koḷakian. Diábí in sia mosiug aka diápa mokaan kon onu in kokaanonnea bo monginum kon dugú in kuruban inta dinomoknea.”

²⁵ Bo ki Balak in noguman kon i Bileam, “Natuadon, aka iko doí mongutuk kon bangusa Israel; tongá dika mokoimontanmai in momarakat kon i monia!”

²⁶ Tubag i Bileam, “Ain bidon muna pinogumanku kon i Tuangku kon akuoi in tongábí mogaid kon bayongan inta pinarenta i Tuhan!”

Pinopotaauan nogintoḷu kon onu inta mobaḻí

²⁷ Ki Balak in noguman, “Koḻigai mayá in kita kon tampat ibanea. Dikabo kon tampat tatua pomayádon mako i Allah iko mongutuk kon Israel sin motuḷung kon inakó.”

²⁸ Dá dinianeadon in ki Bileam minayá in tudu in Buḷud Peor inta noitayow in padang gurun.

²⁹ Guman i Bileam kon i Balak, “Posindogdon in mezbah pitu kon tampat tanaa bo sadia domandon kon naa in sapi koḷakian pitu bo domba koḷakian pitu.”

³⁰ Inaidan doman i Balak in onu inta pinoguman i Bileam. Sia nopokuruban in sapi koḷakian tobatú bo domba doman koḷakian tobatú kon batúan in mezbah tatua.