PINOGIAPAN 22 - Alkitab Singog In Mongondow Masa In Tanaa

Datu in Moab nogoiní kon i Bileam

¹ Bangusa Israel nobuat bui bo nononḷoḷaigan kon rata in Moab, kon butá inta kon ḷoḷan in Ongkag in Yordan, kon diug in kotá in Yerikho.

^2-3 Naonda in datu in Moab inta ki Balak, adí i Zipor, nokodongog kon naonda in pinogogaid in intau Israel kon intau in Amori, bo nokotaaumai kon bangusa Israel tua nobarong totok, noondokdon in sia takin bayongan rayatnea.

⁴ Bo intau in Moab noguman kon itoi mita in intau in Midian, “Diádon moonggot bo gorombolan mita tatua mokaan kon bayongan yagi-yagi inta kon diugmai naton naonda bo sapi mokaan kon bonok kon apow.” Dá ki datu Balak

⁵ nopotabá kon totabánea mogoiní kon i Bileam, adí i Beor, inta nogutun kon kotá in Petor kon diug in Ongkag in Eprat kon butá in Amau. Mosia pinotabá mopotaau kon i Bileam in koyow tanaa nongkon i Balak, “Pokotaaudon, oyúon in bangusa tobatú inta namangoi nongkon Mesir; intaunea mita noibaya-bayádon mako bo nosadiadon monubu kon butá nami.

⁶ Mosia in moropo-ropot in kami. Dá angoipa! Tuḷungaipa in akuoi bo kutuk in mosia. Dika-dikabo kotaḷowanbí nami in mosia bo poguntunon nongkon butá tanaa. Sin noyakinbí in akuoi kon intau inta barakatanmu in mokouḻíbí kon barakat, bo intau inta kutukonmu mokouḻíbí doman kon kutuk.”

⁷ Dá minayádon in itoi mita in intau Moab bo Midian tua takin kodia-dia in tondan poguboḻi kon i Bileam sinbá moibog in sia mongutuk kon intau in Israel. Naonda in noiyaput kon i Bileam, mosia nopotaaudon in koyow i Datu Balak.

⁸ Guman i Bileam kon i monia, “Pogogaidon in doḷom naa kon naa. Ikoḷom bo potaauku kon imonimu onu in poguman i Tuhan kon inakó.” Dá itoi mita in Moab tatua nogutunpa kon tampat i Bileam.

⁹ Bo ki Allah in namangoi kon i Bileam bo noḻibó, “Ki ine in intau mita inta kon tampatmu tua, Bileam?”

¹⁰ Tubag i Bileam, “Mosia tua in totabá i Datu Balak nongkon Moab sin mopotaau

¹¹ kon bangusa tobatú inta nomangoi nongkon Mesir aindon noibaya-bayá mako kon bayongan tampat. Ki Datu Balak nopotabá kon inakó mongutuk kon bangusa tatua sin kopontingannea, sinbá taḷowonneadon bo poḷat mopoguntun kon i monia.”

¹² Guman i Allah kon i Bileam, “Dika mayá takin intau mita tatua, bo dika mongutuk kon bangusa tatua, sin mosia ain binarakatan-Ku.”

¹³ Nopoikoḷomai kon singgai ki Bileam noguman kon totabá mita i Balak tatua, “Pobuidon, Diá ogoi i Tuhan in akuoi mayá moyotakin monimu.”

¹⁴ Dá nobuidon in mosia kon i Balak bo poḷat nopotaau kon inia kon ki Bileam in doíbí mamangoi moyotakin monia.

¹⁵ Bo ki Balak nopotabá in totabá inta mobayo-bayong bo inta pangkat monia in moḷantu-ḷantud nongkon inta muna.

¹⁶ Mosia in nopotaau kon i Bileam in koyow tanaa nongkon i Balak, “Akuoi mopoigum totok: angoipa bo dikapa mogindoí.

¹⁷ Mobarongbí totok in poguboḻiku, bo aidankubí in onuka inta pogumanmu. Angoi bo tuḷungaipa kaasí in akuoi kutukpa in bangusa tatua.”

¹⁸ Táe ki Bileam notubag, “Umpakabí bayongan saḷaka bo buḷawan inta kon bonu in komaḻig i Datu Balak in poguboḻi kon inakó, akuoi in diábí motaau ḻimimpat kon parenta i Tuhan, Allah inta sinumbaku. Umpaka tongá inta mointok yo diábí in akuoi motaau moḷawang.

¹⁹ Táe motaaubí in moiko mogogai kon naa in doḷom naa, ná inta totabá mita inta muna. Totaauonkupa mongo oyúonpa in potaau i Tuhan kon inakó.”

²⁰ Doḷom tua ki Allah namangoi kon i Bileam bo noguman, “Intau mita tatua namangoi sin mopoigum sinbá iko in mayá moyotakin monia. Dá posadiadon sin mayá. Táe tongádon aidai inta pinoki aid kon inimu.”

²¹ Nopoikoḷomai kon singgai ki Bileam nopoḷutud in ḷoḻitúan kon keledainea, bodongka dinumudui kon itoi mita in Moab tatua.

Ki Bileam bo keledainea

²² Táe naonda in ki Bileam minayá, noidatogdon in torú i Allah. Kon daḷan kon dodai in ki Bileam sinumakoi kon keledainea, inta sinakinan in mogogundoinea doyowa, malaekat i Tuhan sinimindog kon yuak in daḷan sin moḷamboi kon bayáannea.

²³ Nokoontongmai kon malaekat inta sinimindog kon tua kokada-kadai in pitow inta ain sinonggó, keledai tatua sinumabat kon daḷan, bo nomurow sinumuot in gobá. Binout i Bileam in keledai tatua bo dinianea bui pinobayá in daḷan.

²⁴ Bo malaekat i Tuhan sinimindog bui kon daḷan inta mosisí, inta kon sigad in gobá in anggur bo gantung inta noidinding posiḷosi.

²⁵ Naonda in keledai tatua nokoontong kon malaekat i Tuhan, sinimí in sia dá noigupit in sioḷ i Bileam kon gantung inta noidinding tatua. Binout bui i Bileam in keledai tatua.

²⁶ Bo malaekat i Tuhan nomamping, bo sinimindog kon tampat inta gogimoi in mosisí bayáan nodapot in diádon sian kon dotá in koḷoigi bo koḷanannea.

²⁷ Nokoontongmai kon malaekat i Tuhan, nosiug in keledai tatua. Sinumorú totok in ki Bileam bo binobakannea in tungkud in keledai tatua.

²⁸ Bo binaḻí i Tuhan in keledai tatua notaau nosingog. Guman in keledai tatua kon i Bileam, “Onu in taḷáku kon i Tuang nodapot in kotoḷudon i Tuang binout in akuoi?”

²⁹ Tubag i Bileam, “Iko nopoyambá kon inakó! Aka kuma bo kodia-dia in pitow in akuoi, yo iratákudon in iko!”

³⁰ Tubag in keledai tatua, “Akuoi naa in keledai i Tuang inta noonggotdon in takoianmai i Tuang? Yo degá nokoimontandon in akuoi nomangkang kon i Tuang?” “Diá,” tubag i Bileam.

³¹ Bo binukádon i Tuhan in mata i Bileam dá inontongneadon in malaekat i Tuhan sinimindog kon tua kokada-kadai in pitow inta ain sinonggó. Dá baḷúdon in ki Bileam dinumokó bo nosumba.

³² Malaekat i Tuhan noḻibó, “Nongonu sin kotoḷu bidon binongkugmubí in keledaimu? Akuoi namangoi sin moḷamboi kon bayáanmu, sin aka kon i-Nakó, yo diábí mopia aka mayá in iko.

³³ Kon dodai in keledaimu nokoontong kon i-Nakó, kotoḷudon in sia sinimí. Aka diá yo tantú iḻimod-Ku bidon in iko, táe keledai tatua in posaḷamaton-Ku.”

³⁴ Guman i Bileam kon malaekat i Tuhan, “Binaradosadon in akuoi. Diábí kinotaauanku kon ki Tuang sinimindog kon yuak in daḷan sin moḷamboi kon bayáanku. Táe naa, aka kon raian i Tuang bo diábí mopia aka akuoi mayá intua, dá mobuidon in akuoi.”

³⁵ Táe malaekat i Tuhan noguman, “Duduidon kon intau mita tatua. Táe singogonmu in tongábí onda inta pogumanku.” Dá ki Bileam nongingguputdon kon bobayáannea noyotakin in totabá mita i Balak tua.

Ki Balak nonontomu kon i Bileam

³⁶ Naonda in kinodongogandon i Balak kon ki Bileam mamangoi, binayánea sinontomu in ki Bileam kon kotá in Moab, inta kon bingkí in Ongkag in Arnon, kon pinosigadan in butá in Moab.

³⁷ Ki Balak noḻibó kon inia, “Nongonu sin diábí in iko namangoi kon tungkuḷ in inoiníku muna? Eta degá kainimu kamai diá mokouboḻi in akuoi kon pogaidanmu?”

³⁸ Ki Bileam notubag, “Yo, naa akuoi ain namangoi. Táe diábí in hakku moguman kon onuka koḻikudbí in onu in pokiguman i Allah kon inakó.”

³⁹ Dá minayádon in ki Bileam noyotakin i Balak kon kotá in Huzot.

⁴⁰ Kon tua ki Balak nopokuruban in tongonumai in sapi bo domba. Tongosilai nongkon ponoyá mita tatua inogoinea kon i Bileam bo itoi mita inta noyotakinnea.

Ki Bileam nopotaau in onu inta mobaḻí

⁴¹ Nopoikoḷomai kon singgai ki Balak nodia kon i Bileam notakod kon buḷud in Bamot Baal. Nongkon tua ki Bileam mokoontong kon tongosilai in bangusa Israel.