PINOGIAPAN 20 - Alkitab Singog In Mongondow Masa In Tanaa

Inta nobaḻí mita kon Kades

¹ Kon buḷan imitánea bayongan umat Israel nodapot kon padang gurun Zin bo nogutun notantú kon Kades. Ki Miryam minatoi bo iḷobong kon tua.

² Kon singgai tobatú kon tampat pinononḷoḷaigan monia diá in tubig. Dá namangoidon in intau mita tatua kon i Musa bo kon i Harun

³ takin nongunsingog, “Maníka bo kami in minatoidon kon tayowon i Tuhan noyotakin i utat mita nami!

⁴ Nongonu sin diniamubí in kami kon padang gurun tanaa? Degá bá matoi in kami kon naa moyotakin in bobiagon mita nami?

⁵ Onu in mangaḻe in pinodiaan monimu kon inami iḻumuai nongkon Mesir bo mamangoi in tampat mororiga tanaa inta diábí motaau pomuḷaan kon onu bo onu? Kon naa diá in gandum, diá in pangkoi in ara, anggur bo delima. Nodapot in tubig inumon diá doman!”

⁶ Ki Musa bo ki Harun minayá iyumayú kon intau mita tatua bo sinimindog kon diug in ngara in Ḷoḷaigan i Tuhan. Mosia dinumokó, bo sindar in kinoangoian i Tuhan nonindar kon i monia.

⁷ Ki Tuhan noguman kon i Musa,

⁸ “Gamá in tungkud inta kon tayowon in Poti Dodandian, bo kamunda i Harun musti mosipun kon bayongan umat. Kon tayowon monia komintan, iko musti moguman kon buḷud batu inta kon tua sinbá moporoput magí in tubig. Natuata in iko mopoḷuai in tubig nongkon buḷud batu tatua sinbá oyúondon in ponginuman in umat bo bobiagon monia.”

⁹ Dá minayádon in ki Musa bo nogamá kon tungkud tatua ná podudui in parenta i Tuhan.

¹⁰ Ki Musa bo ki Harun nosipun kon bayongan umat kon tayowon buḷud batu tatua. Bo ki Musa noguman, “Indongogaipa, ei intau momomarontak! Ibogon monimu degá bá kami mopoḷuai in tubig nongkon buḷud batu tanaa sinbá oyúon in inumon monimu?”

¹¹ Bo ki Musa notonggó kon tungkud tatua bo nomorot kon buḷud batu tatua kodua. Dá noiroputdon magí in tubig norogot totok, dá bayongan intau bo bobiagon nonginumdon kon tua.

¹² Táe ki Tuhan nonoboḷow kon i Musa bo kon i Harun, kai-Nia, “Popisí in moiko diá totok mopirisaya kon i-Nakó moponiata in kawasa-Ku inta motusi kon tayowon in bangusa Israel, dá moiko in diábí mobaḻí itoi inta motaau modia kon i monia tumuot kon butá inta pinodandi-Ku kon i monia.”

¹³ Tuata in bokaká in tubig Meriba. Kon tampat tatua intau mita in Israel nongunsingog kon i Tuhan, bo kon tua doman ki Tuhan nopoontong in kawasa-Nea inta motusi kon bangusa tatua.

Datu in Edom diá mobogoi kon bangusa Israel Tumaḻib

¹⁴ Onda intua nongkon Kades, ki Musa nopotabá in totabá mita sin mayá mokipodungkuḷ kon i datu in Edom. Guman monia, “Kami in nongkon suku mita in Israel inta oyúonpa in tondoḷ in kompong i Tuangku. Degá kinotaauan bidon i Tuangku in yoyiga inta noiantug kon inami.

¹⁵ Mogoguyang nami minayá in Mesir bo nogutun notantú kon tua kon taongannea. Mogoguyang nami bo kami doman pinomiadon ibo-ibog in bangusa Mesir,

¹⁶ bo kami nokuani kon i Tuhan mokituḷung. Inindongogan i Tuhan in kuani nami tatua bo poḷat nopotabá in malaekat tobatú. Malaekat tatua nodia kon i nami iḻumuai nongkon butá in Mesir. Tanaa kami kon Kadesdon, tobatú kotá inta noyosigad in butá inta kon bonu in kawasa i Tuangku.

¹⁷ Kami mopoigum kon i Tuang bá totabionpa kaasí i Tuang in kami bo ogoipa i Tuang tumaḻib mongin butá tanaa. Kami takin bobiagon mita nami in diábí ḻimimpat kon daḷan bo diábí doman tumuot kon gobá mita andeka gobá mita in anggur. Diábí in kami monginum kon tubig nongkon parigí mita i Tuangku. Kami in mayábí mongin daḷan moḷoben modapot in kami moiḷuai kon butá i Tuangku.”

¹⁸ Táe intau in Edom notubag, “Moiko in diábí ogoi nami tumaḻib mongin butá nami. Aka moiko umuran doman moniat tumaḻib dá tubuon nami in moiko!”

¹⁹ Intau Israel noguman, “Kami in mongin daḷanbí moḷoben, bo aka kami andeka bobiagon nami monginum kon tubig monimu, yo uboḻianbí nami. Kami in tongábí tumaḻib.”

²⁰ Intau in Edom nosingog bui, “Diábí motaau!” Bo mosia iḻumuai kotaki-takin in tontara monia inta moropot sin monubu kon bangusa Israel.

²¹ Dá intau in Israel nomurow bo notayak kon daḷan ibanea sin diá inogoi in intau Edom mongin butá monia.

Ki Harun minatoi

²² Bayongan umat Israel nonaḷámai kon Kades bo nodapotdon in mosia kon Buḷud in Hor,

²³ kon pinosigadan in Edom. Kon tua ki Tuhan noguman kon i Musa bo kon i Harun,

²⁴ “Ki Harun in diábí moituot kon butá inta ain pinodandi-Ku kon bangusa Israel; sia in matoibí sin popisí in kamunda ain noḷawang kon parenta-Ku kon diug in bokaká in Meriba.

²⁵ Diadon in ki Harun bo ki Eleazar, adínea, motakod kon Buḷud in Hor.

²⁶ Ḷongkutdon in pakeang i Harun bo poḷutudon kon i Eleazar. Ki Harun in matoidon kon tampat tatua.”

²⁷ Ki Musa nogaid kon onu inta pinarenta i Tuhan. Ki Musa, ki Harun bo ki Eleazar notakod kon Buḷud in Hor koonto-ontong in bayongan umat.

²⁸ Bo iḷongkutdon i Musa in pakeang i Harun bo pinoḷutudnea kon i Eleazar. Kon tudu in buḷud tatua ki Harun minatoi, onda intua ki Musa bo ki Eleazar nosiḻigdon bui.

²⁹ Bayongan umat nokodongog kon ki Harun minatoidon, bo mosia komintan nonogumatoidon toḷu nopuḷú nosinggai in koonggotnea.