PINOGIAPAN 17 - Alkitab Singog In Mongondow Masa In Tanaa

Tungkud i Harun

¹ Ki Tuhan noguman kon i Musa,

² “Potabá in intau Israel mobogoi kon inimu in mopuḷú bodoyowá in tungkud, pomuḷoi in suku tumongobatú, inta musti poabat kon itoi in suku. Paisdon in tangoi mita in itoi mita kon tungkudnea,

³ bo tangoi i Harun in paison kon tungkud in suku Lewi. Kon batúan in suku musti oyúon in tungkud tumongobatú

⁴ Diadon in tungkud mita tatua kon Ḷoḷaigan-Ku, bo ukat kon tayowon in Poti Dodandian, kon tampat inta biasamai poyodungkuḷan-Ku takin imonimu.

⁵ Tungkud in intau inta piḻíon-Ku in momoḻimping. Natuata in Akuoi mopogogai in amui mita in intau mita inta umuran mongunsingog kon i monimu.”

⁶ Tua in pinotaau i Musa kon intau Israel. Bo itoi mita monia mopoabat kon inia in tungkud tumongobatú kon batúan in itoi in suku. Mopuḷú bodoyowá in kobayongnea mita, bo tungkud i Harun kon sigad doman in tungkud monia tua.

⁷ Bo inukat i Musa in tungkud mita tatua kon bonu in Ḷoḷaigan i Tuhan kon tayowon Poti Dodandian.

⁸ Nopoikoḷomai kon singgai, naonda in ki Musa sinumuot kon bonu in Ḷoḷaigan i Tuhan, inontongnea kon tungkud i Harun, inta tungkud in suku Lewi, aindon nomoḻimping. Tungkud tatua nonondaundon, nomusir bo nopomungai in toḻitoi inta ain nogurang!

⁹ Ki Musa in nogamá kon bayongan tungkud tatua bo pinoontongnea kon intau in Israel. Inindoiandon monia onu inta nobaḻí, bo pomuḷoi in itoi nogamádon bui kon tungkud monia tontaní.

¹⁰ Onda intua ki Tuhan noguman kon i Musa, “Ukatdon bui in tungkud i Harun kon tayowon in Poti Dodandian. Tungkud tatua musti tagúon mobaḻí tompoingat kon bangusa in Israel inta moibog momarontak tatua kon matoibí in mosia aka mosia umuran mongunsingog.”

¹¹ Ki Musa nogaid kon onu inta pinarenta i Tuhan.

¹² Bo intau Israel noguman kon i Musa, “Aka natua, mosilaka in kami! Mobodito in kami!

¹³ Aka intau inta dimiug kon Ḷoḷaigan i Tuhan musti matoi, dá diádon in kamang bui kon inami!”