PINOGIAPAN 16 - Alkitab Singog In Mongondow Masa In Tanaa

Ki Korah, ki Datan bo ki Abiram

^1-2 Ki Korah adí i Yizhar nongkon inanakan i Kehat, suku Lewi, nomarontak kon i Musa. Sia dinuḷuan in intau toḷu nongkon suku i Ruben, ki Datan bo ki Abiram adí mita i Eliab, bo ki On adí i Pelet bo doyowa nogatut bo ḻima nopuḷú in intau itoi inta mongotoyang inta piniḻí in rayat.

³ Mosia noyotakin minayá kon tayowon i Musa bo i Harun bo noguman, “Mobaḻídon in natua, Musa! Bayongan umat in Israel pinotondídon kon i Tuhan, bo ki Tuhan kon yua-yuakdon naton komintan. Táe nongonu sin iraimubí kon iko in moḷantu-ḷantud nongkon umat i Tuhan?”

⁴ Nokodongogmai kon tua, ki Musa dinumokó kon butá bo nosambayang kon i Tuhan.

⁵ Bo sia in noguman kon i Korah bo dumoduduinea mita, “Ikoḷom doḷo-doḷom ki Tuhan in mopoontongdon kon i naton mongo ki ine in kapunyaan-Nea, bo ki ine inta sinondí kon i-Nia. Intau inta piḻíon-Nea tua in motaau dimiug kon i-Nia.

^6-7 Ikoḷom doḷo-doḷom iko bo dumoduduimu musti mogamá kon tampat mita in tuḷú, bonuai in baga bo dupa, bo diá pobayá in mezbah. Bo bain indoian naton mongo ki ine in kon sigad naton inta ain piniḻí i Tuhan. Mobaḻídon intua, e intau mita in Lewi!”

⁸ Noiduduimai kon tua ki Musa noguman kon i Korah, “Indongogai, ei intau mita in Lewi!

⁹ Degá pinikirmai monimu soaḷbí mointok in pinomiḻían i Allah Israel kon i monimu nongkon sigad in intau mita in Israel sinbá motaau dimiug kon i-Nia, bo mopobayá in oaidan-Nea kon Ḷoḷaigan-Nea, poḷat mogaid kon kopontingan umat Israel bo mogundoi kon i monia?

¹⁰ Iko, Korah, bo bayongan intau in Lewi aindon nokouḻí kon kahoromatan tatua nongkon i Tuhan – bo tanaa moiko in monuntut sinbá baḻíon doman imang!

¹¹ Aka iko bo dumoduduimu mita mongunsingog kon i Harun, yo totuubí kon moiko ain noḷawang kon i Tuhan!”

¹² Bo ki Musa nokioiní kon i Datan bo kon i Abiram, táe mosia noguman, “Kami in doíbí mamangoi!

¹³ Eta diápa tugat in pinogoiníanmu kon inami iḻumuai nongkon butá in Mesir inta mopia tatua sin moḻimod kon inami kon padang gurun tanaa? Yo mustipa doman iko momarenta kon inami?

¹⁴ Totuubí kon iko in diábí modia kon inami mayá in butá inta mopia, andeka mobogoi kon inami in gobá mita in tudunea bo gobá mita in anggur inta mobaḻí tonsilai nami! Tanaa iko monguboḷdon kon inami! Diá, kami in doíbí mamangoi!”

¹⁵ Ki Musa sinumorú totok bo noguman kon i Tuhan, “Tuhan, dika motarima kon sosumba monia. Diábí dodai in onda in akuoi nokoporugimai kon tobatúmai intau kon sigad monia; nodapot in diábí doman dodai in onda akuoi nogamá kon tongáka keledai tobatú nongkon i monia.”

^16-17 Bo ki Musa noguman kon i Korah, “Angoidon in ikoḷom kon Ḷoḷaigan i Tuhan moyotakin in dumoduduimu mita inta doyowa nogatut bo ḻima nopuḷú tua. Ki Harun in mamangoibí doman intua. Moiko in musti modia tonta-tontaní kon tampat in tuḷúmu. Bonu in dupa kon tua, bo posumbadon kon i Tuhan.”

¹⁸ Dá batúan in intau musti mogamá kon tampat in tuḷúnea, bo bonuannea in tuḷú bo dupa, bodongka simindog kon ngara in Ḷoḷaigan i Tuhan moyotakin i Musa bo i Harun.

¹⁹ Onda intua ki Korah nosipun kon bayongan umat bo mosia sinimindog noyogintayow i Musa bo i Harun kon tayowon in Ḷoḷaigan i Tuhan. Daḻíbí in bayongan umat nokoontong kon sindar i Tuhan inta mokotuḷow.

²⁰ Bo ki Tuhan noguman kon i Musa bo kon i Harun,

²¹ “Undokdon in moiko nongkon intau mita tanion; Yopúon-Kudon in mosia nion tanaa doman mako.”

²² Táe ki Musa bo ki Harun dinumokó nosumba bo noguman, “O Allah, Ikobí in nobogoi in kobiagan kon bayongan inta nobiag. Aka tongá tobatú in intau in binaradosa, yo degá Iko in tumorú domandon kon bayongan umat?”

²³ Ki Tuhan noguman kon i Musa,

²⁴ “Potabádon in intau mita simí nongkon ḷoḷaigan mita i Korah, i Datan bo i Abiram.”

²⁵ Bo ki Musa sinakinan in itoi mita in Israel, minayá kon tampat i Datan bo i Abiram.

²⁶ Ki Musa noguman kon intau mita in Israel, “Ḷuaidon nongkon ḷoḷaigan in intau mita inta moraat tanaa bo dika doman moḻiai kon kapunyaan monia. Aka moiko doí dumudui, yo moiko in yopúon poyotakinon monia popisí in dosa mita monia.”

²⁷ Bo intau mita tatua iḷumuai nongkon ḷoḷaigan mita i Korah, i Datan bo i Abiram. Ki Datan bo ki Abiram aindon iḻumuai bo sinimindogdon mako kon ngara in ḷoḷaigan monia tontaní takin adí bo buḷoi monia.

²⁸ Bo ki Musa noguman, “Tanaa in kotaauandon monimu kon ki Tuhan ain nopotabá kon inakó sin mogaid kon tanaa komintan bo tua in deemanbí ibogku tontaní.

²⁹ Aka intau mita tatua matoi ná biasamai, takin diá in hukuman nongkon i Allah, yo tua in nobaḻí tomponuot kon ki Tuhan in diábí nopotabá kon inakó.

³⁰ Táe aka ki Tuhan momia kon tobatú inta diápa dodai in onda in dinongog monimu naa in kino oonggot, bo aka butá mobotak sin moḻiom kon i monia takin bayongan kapunyaan monia, dá mosia in tumuotdon kobia-biagpa kon bonu in dunia intau minatoi, kotaauandon monimu kon intau mita tatua noḷawang kon i Tuhan.”

³¹ Bo naonda in nopaḷut ki Musa nosingog, dá ná doman tua in butá inta sinindogan monia tatua nobotak,

³² bo noḻiom kon i monia takin buḷoi, adí bo bayongan dumodudui i Korah, bo takin doman bayongan kapunyaan monia.

³³ Dá noigonagdon in mosia kobia-biagpa doman kon bonu in dunia intau minatoi takin bayongan kapunyaan monia. Butá inta nobotak tatua nomumbun bo mosia diádon inontong iḻiom in butá.

³⁴ Bayongan intau in Israel inta kon tua nokodongog kon karak monia. Bo intau mita in Israel noḷagui, sindaḷan nomaḷú, “Poḷagui! Ḻiomon in butá in kita!”

³⁵ Bo ki Tuhan nopoangoi in tuḷú inta nomokak kon doyowa nogatut bo ḻima nopuḷú in intau inta noposumba in dupa tatua.

Tampat in tuḷú

³⁶ Bo ki Tuhan noguman kon i Musa,

^37-38 “Potabádon in ki Eleazar adí i Imang Harun mobuat kon tampat mita in tuḷú bo kiagat mita in tuḷú tatua bo bayáan ḷumbúon kon tampat ibanea, sin tampat tatua in motusibí. Barang mita tatua in sosumba in intau mita inta ain ihukum minatoi sin popisí in dosanea. Barang mita tatua motusi sin ain pinosumba kon tayowon i Tuhan, tuamai musti tontaḷon konipi-nipiton sin baḻíon aip in dotá in ḷuai in mezbah. Tua in mobaḻí tompoingat kon bangusa Israel.”

³⁹ Dá ki Imang Eleazar nogamá kon tampat mita in tuḷú tatua bo nokitontaḷ intua kon intau kinonipi-nipit sin mobaḻí aip in ḷuai in mezbah.

⁴⁰ Tua in nobaḻí tompoingat kon bangusa Israel kon koḻikud in buí i Harun, diábí in tobatúmai in intau motaau mamangoi kon mezbah i Tuhan sin motubá kon dupa posumba kon i Tuhan. Intau inta ḻimimpat kon atorang tatua in yopúonbí ná ki Korah bo dumoduduinea mita. Bayongan tua inaidan pinodudui kon ná inta pinarenta i Tuhan kon i Eleazar pinongin i Musa.

Ki Harun noposaḷamat kon bangusa Israel

⁴¹ Nopoikoḷomai kon singgai bayongan umat in Israel kitoru-torúmai kon i Musa bo kon i Harun. Mosia nosingog, “Moiko ain noḻimod kon umat i Tuhan.”

⁴² Koyogot in mosia noyosipun sin moḷawang kon i Musa bo kon i Harun, mosia nobobui kon Ḷoḷaigan i Tuhan, bo nokoontong kon goḷom inta noikoḷob kon Ḷoḷaigan tatua, bo kinoontongandon in sindar kinoangoian i Tuhan.

⁴³ Ki Musa bo ki Harun minayá in tayowon in Ḷoḷaigan i Tuhan,

⁴⁴ bo ki Tuhan noguman kon i Musa,

⁴⁵ “Pokoyayúdon kon intau mita tanion. Yopúon-Kudon in mosia nion kon tampat doman tanion!” Taya dua tua dinumokó bo nosumba,

⁴⁶ bo ki Musa noguman kon i Harun, “Gamápa in tampat in tuḷúmu, bonuaidon in baga in tuḷú nongkon mezbah bo tududon in dupa tatua. Ḷagidon diá intua kon umat bo pomiadon kon upacara pongampungan kon dosa kon i monia. Koḻikat! Torú i Tuhan moḷobendon totok bo yampoi momangkoidon.”

⁴⁷ Pinomia i Harun onu inta pinoguman i Musa. Sia noribatuk minayá in yua-yuak in umat inta noyosipun bo nomangkoidon kinotugatan in yampoi. Dá ki Harun notubá kon dupa kon baga in tuḷú, bo nomia kon upacara pinotobutan kon dosa in umat.

⁴⁸ Yampoi tatua nogogai, bo ki Harun kon yua-yuak in intau mita inta nobiagpa bo inta ain minatoi.

⁴⁹ Kobayong in intau inta minatoi tungkuḷ intua in 14.700, diápabí pinoyoiap in intau mita inta minatoi kon dodai in pinomarontakan i Korah.

⁵⁰ Naonda in yampoi tatua nogogai, ki Harun in minayá bui kon i Musa kon ngara in Ḷoḷaigan i Tuhan.