PINOGIAPAN 13 - Alkitab Singog In Mongondow Masa In Tanaa

Toimata taya mopuḷú bodoyowá

¹ Ki Tuhan noguman kon i Musa,

² “Nongkon batúan in suku kon Israel potabádon tumongobatú nongkon sigad in itoi mita monia sin mayá monaridi kon butá in Kanaan inta ogoi-Ku kon intau in Israel.”

^3-15 Podudui in parenta i Allah tatua, ki Musa nopotabá kon i monia nongkon padang gurun Paran. Bayongan intau inta pinotabá tua in itoi mita kon sigad intau Israel: Suku Itoi Ruben Syamua adí i Zakur Simeon Sapat adí i Hori Yohuda Kaleb adí i Yepune Isakhar Yigal adí i Yusup Epraim Hosea adí i Nun Benyamin Palti adí i Rapu Zebulon Gadiel adí i Sodi Manasye Gadi adí i Susi Dan Amiel adí i Gemali Asyer Setur adí i Mikhael Naptali Nahbi adí i Wopsi Gad Guel adí i Makhi

Suku Itoi

¹⁶ Tuata in intau mita mononoimata inta pinotabá i Musa monaridi kon butá tatua. Ki Hosea adí i Nun binaḷuaian i Musa in tangoinea ki Yosua.

¹⁷ Naonda in pinotabá i Musa in mosia minayá, sia in nongoyow kon i monia, “Bayádon pongin utuan, mopobayá ná dotá in toḷatan kon butá in Kanaan, bo turus mopobayá ná buḷud.

¹⁸ Taridiaidon mongo naonda in kaadaan butá tatua, indoiai mongo nobarong andeka noyakag in intau nogutun kon tua, moropot mongo noyangkó.

¹⁹ Taridiaidon doman mongo mopia andeka diá in butá tatua, bo indoiai doman mongo intau mita kon tua nogutun kon ḻipú mita inta diá dininding andeka kon bonu in kotá mita inta iḻibu dininding in tondok.

²⁰ Korigon in ginamu. Indoiai mongo mopia in butánea bo nobayong pangkoi in kayu kon tua. Dika mokoḻiong modia kon topiḻikmai in bungai in ayop inta nobiag kon tua.” Kon dodai intua pinomangkoiandon pinomungaian in anggur.

²¹ Dá nobuatdon in intau mita tatua nopobayá ná utuan bo nonaridi kon butá tatua pinangkoi nongkon padang gurun Zin kon dotá in toḷatan nopobayá ná utuan nodapot kon kotá in Rehob, nodiug kon daḷan mayá in Hamat.

²² Muna-munamai mosia minayá kon dotá in toḷatan butá tatua bo noiyaput kon kotá in Hebron, tampat pinogutunan in intau mita in Ahiman, Sesai bo Talmai, buí i Enak. Hebron pinosindog noiuna pitu notaong nongkon kotá in Zoan kon Mesir.

²³ Bo nodapotdon in mosia kon ḷopá in Eskol. Kon tua in pinomongkóan monia kon anggur totanga inta mobogat totok, nodapot in musti tombuḻigan intau doyowa. Mosia in nodia doman kon tongonumai in bungai in delima bo bungai in ara.

²⁴ Tampat tatua sinangoian Ḷopá in Eskol sin tanga bungai in anggur inta pinongkó in intau Israel kon tua.

²⁵ Naonda in nonaridi mako kon butá tatua opat nopuḷú nosinggai in koonggotnea, intau mita tatua nobuidon

²⁶ bo nopotaau kon i Musa, kon i Harun bo kon bayongan umat in Israel inta noyosipunmai kon Kades, kon padang gurun Paran. Inouman monia onu inta inontong bo pinoontong doman monia in bungai mita in kayu inta dinia monia.

²⁷ Guman monia kon i Musa, “Ain sinaridi nami in butá tatua bo inontongdon nami kon butá tatua in nooyúon bo mopia totok, bo naa in topiḻik bungai in pinomuḷa nongkon tua.

²⁸ Táe intau mita inta nogutun kon tua mongoropot. Kotá mita monia nongoḷoben bo iḻibu dininding in tondok. Bo inontong domandon nami in intau mita buí in tuyá kon tua.

²⁹ Intau in Amalek nogutun kon dotá in toḷatan butá tatua; Intau in Het, Yebus bo Amori nogutun kon buḷud; bo intau in Kanaan in nogutun kon butá inta kon bingkí in dagat bo kon bingkí Ongkag in Yordan.”

³⁰ Táe pinoonow i Kaleb in gina in intau mita inta kon tayowon i Musa. Guman i Kaleb, “Butá tatua musti tubuon naton bo agowon naton tanaa domandon mako, sin tugat bidon in intau naton monaḷow kon i monia.”

³¹ Táe intau mita inta nobui mangoi takin i Kaleb tatua noguman, “Diá, kita diá mokosanggup in monubu kon i monia. Intau mita kon butá tatua in moropo-ropot nongkon inaton.”

³² Bo mosia nomangkoidon nongonguman magí-mako kon onu inta diá totuu kon sigad in intau Israel soaḷ butá inta ain sinaridian monia tua. Guman monia, “Butá tatua totok in mokoondok, umpakabí kon i monia inta nogutun kon tua. Intau mita inta inontong nami kon tua totok mongoḷoben in awak monia.

³³ Bo kami in nokoontong domandon kon intau mita inta ná ki tuyá, inta buí in intau Enak. Aka poyotongkaionmai monia tua yo kami naa in tongábí naonda bo pangkoḷá, bo tantú kon natuabí doman in anggapan monia kon inami.”