PINOGIAPAN 10 - Alkitab Singog In Mongondow Masa In Tanaa

Torompet mita inta nongkon saḷaka

¹ Ki Tuhan in noguman kon i Musa,

² “Pomia kon torompet doyowa inta nongkon saḷaka tontaḷon sin pakéon pogoinían kon umat moyosipun andeka mopotabá kon i monia mayá.

³ Aka irupon koḷanggóon in doyowa tatua, dá bayongan umat musti moyosipun ḻimibu kon inimu kon tayowon ngara in Ḷoḷaigan-Ku.

⁴ Táe aka tongá tobatú in irupon, dá tongábí itoi mita in moyosipun bo ḻimibu kon inimu.

⁵ Aka torompet bo irupon kotoyon-toyongon, dá tanda kon suku mita inta nononḷoḷaigan kon dotá in pomukaan musti mayá.

⁶ Aka irupon kotoyon-toyongon mogindua, dá suku mita kon dotá in toḷatan musti mayá. Dá singognea inta mopoḷom-poḷok tua mangaḻenea umat in musti mayá,

⁷ aka singognea moḷanggó dá umat musti moyosipun.

⁸ Torompet mita tatua musti irupon in imang mita, adí mita i Harun. Tuata in atorang inta musti umuran duduian monimu.

⁹ Bo aka moiko moparang kon butá monimu sinbá diá kawasaan in musung inta monubu, irup in torompet mita tatua. Dá Akuoi, ki Tuhan Allahmu, in motuḷung bo moposaḷamat kon i monimu nongkon musungmu mita.

¹⁰ Ná doman tua in kon singgai mita poramean, ramean mita Buḷan Mobagu bo porayaan mita monimu ibanea, torompet tatua musti irupon kon dodai in moiko moposumba in kuruban payongon bo kuruban podamean kon i-Nakó. Dá tuḷungan-Ku in moiko. Akuoi in ki Tuhan Allahmu.”

Intau Israel nobuatdon

¹¹ Kon taong nogindua naonda in bangusa Israel nonaḷámai kon Mesir, kon singgai doyowa nopuḷú buḷan nogindua, namonikdon in goḷom nongkon ḻimonik in Ḷoḷaigan i Tuhan.

¹² Bo intau Israel moyo-moyodudui in mayá monaḷámai kon padang gurun Sinai, bo goḷom tatua nogogai kon dodai in mosia modapotdon kon padang gurun Paran.

¹³ Tuata in nobaḻí muna totok kon dodai in mosia nobuat pinodudui kon parenta i Tuhan kon i Musa.

¹⁴ Inta muna totok nobuat in mosia inta kon siungon in bandera pinonobatúan i Yohuda, naa in tangoi monia tua: ki Nahason, adí i Aminadab, sia in nobaḻí itoi kon pipidan suku in Yohuda,

¹⁵ ki Natanael adí i Zuar in itoi kon pipidan in suku Isakhar,

¹⁶ bo ki Eliab adí i Helon in nobaḻí itoi kon pipidan in suku Zebulon.

¹⁷ Bo Ḷoḷaigan i Tuhan kinokai, bo nobuatdon in inanakan i Gerson bo i Merari inta nomotaan kon Ḷoḷaigan tatua.

¹⁸ Onda intua nobuatdon in lasikar inta kon siungon in bandera pinonobatúan i Ruben, naa in tangoi monia: Ki Elizur adí i Syedeur nobaḻí itoi kon pipidan in suku i Ruben.

¹⁹ Ki Selumiel adí i Zurisyadai nobaḻí itoi kon suku i Simeon,

²⁰ bo ki Elyasap adí i Rehuel nobaḻí itoi kon pipidan suku i Gad.

²¹ Nopaḷut mako nobuatdon intau mita in Kehat inta nomotaan kon barang mita motusi. Aka mosia modapot kon tampat pononḷoḷaigan moiduduimai, Ḷoḷaigan i Tuhan aindon pinosindog bui.

²² Moiduduimai kon tua in lasikar inta kon siungon in bandera pinonobatúan in suku i Epraim, naa in tangoi monia: Ki Elisama adí i Amihud nobaḻí itoi kon pipidan suku i Epraim,

²³ ki Gamaliel adí i Pedazur nobaḻí itoi kon pipidan in suku Manasye,

²⁴ bo ki Abidan adí i Gideoni nobaḻí itoi kon pipidan suku Benyamin.

²⁵ Pangabisannea nobuat in lasikar inta kon siungon in bandera pinonobatúan in suku Dan. Mosia tua in nobaḻí pongawal kon tumi in bayongan pinonobatúan. Mosia minayá podudui in pipidan monia: ki Ahiezer adí i Amisyadai in nobaḻí itoi kon suku Dan.

²⁶ Ki Pagiel adí i Okhran nobaḻí itoi kon pipidan in suku Asyer,

²⁷ bo ki Ahira adí i Enan nobaḻí itoi kon pipidan in suku Naptali.

²⁸ Tuata in tundugan pipidan intau Israel, noyo-noyodudui, pomuḷoi in mosia mobuat sin momamping.

²⁹ Ki Musa noguman kon i bilanea, ki Hobab adí i Rehuel intau in Midian, “Kami in mayá kon tampat inta kai Tuhan in ogoi kon inami. Ki Tuhan ain nopodandi kon inta mopia kon intau Israel. Dá duduidon, diábí pomayá mako nami in iko.”

³⁰ Tubag i Hobab, “Sukur moantó, táe akuoi in moibogbí mobui kon ḻipúku tontaní.”

³¹ “Dika monaḷámai kon inami,” guman i Musa, “iko in motaaubí mobaḻí mototundú kon daḷan kon inami, sin kinotaauanmu kon onda in motaau pononḷoḷaigan naton kon padang gurun.

³² Aka iko dumudui, dá bayongan inta mopia inta inaidan i Tuhan kon inami, in pomiaan nami doman kon inimu.”

Bangusa Israel nobuat

³³ Naonda in bangusa Israel nonaḷámai kon Sinai, buḷud i Tuhan, mosia in minayá toḷu nosinggai in koonggotnea. Poti Dodandian i Tuhan umuran diaan pouna kon i monia sin motayak kon tampat pononḷoḷaigan kon i monia.

³⁴ Aka mosia mobuat nongkon pinononḷoḷaigan, goḷom i Tuhan umuran mogoḻiung kon i monia kon wakutu in singgai.

³⁵ Pomuḷoi in Poti Dodandian tatua diaan, ki Musa moguman, “Sindogdon, o Tuhan, poyayitdon in musung-Mu dapot in intau mita inta doí kon inimu moḷagui.”

³⁶ Bo pomuḷoi in Poti Dodandian tatua modapot kon tampat pogogaian, ki Musa moguman, “Angoidon kon naa, o Tuhan, kon ribuan motoḷuadí in Israel.”