PILIPI 4 - Alkitab Singog In Mongondow Masa In Tanaa

Tonggina mita pangabisan

¹ Tuamai, Utatku mita inta kinotabiku, kobiagbí in moiko takin totu-totuu mopirisaya kon i Tuhan. Totok in akuoi mokotanob kon i monimu! Moiko nion inta totok mokoḷunganga kon ginaku.

² Ki utat naton bobay ki Euodia bo ki Sintike! Naa in tongginaku kon i monimu, kotobatúdon kon gina saḷaku intau inta mopirisaya kon i Tuhan.

³ Bo poigumonku kon i monimu Sunsugos, yobayatku inta totok in mosatia, tuḷungai in mosia, sin mosia noramujidon totok in nogaid takinku nopotaau in Habar Mopia inta nongkon i Allah; mosia tua naonda bo tai Klemen bo bayongan in intau inta nogaid noyotakinku. Tangoi monia tua in pinaisdon kon bonu in Buk Intau Nobiag.

⁴ Kosanangdon in gina monimu sin ain nopirisaya bo nobiag notobatú takin i Tuhan. Buipa doman pogumanku: kosanangdon in ginamu!

⁵ Pomayádon mako bá ontongondon in bayongan intau in oaidmu inta mopia in gina. Sin diádon moonggot ki Tuhan in mamangoi.

⁶ Donaai moḻia-ḻiaw in ginamu kon bayongan yagi-yagi. Onukabí in aidanmu umuran posambayang bo pogumandon kon i Allah onu in igumonmu. Onu in paraḷumu umurandon potaau kon i Allah bo dika mokoḻiong in mopoyaput in sukur kon i-Nia.

⁷ Dá kobiagan motompia nongkon i Allah inta diá kodapotan in raian intau, in moḷukad kon gina bo raianmu inta ain notobatú i Kristus Yesus.

⁸ Naa in simpod in singogku utat mita, porai kon onu inta oyúon in baragunanea, bo onu inta motaau dayowon, ná soaḷ mita inta moitutui, inta horomatonmai, inta moadil, modarit, inta moromimit bo inta mopia.

⁹ Aidaidon onu inta ain binalajar bo sinarima monimu kon inakó; bo onu inta ain dinongog andeka inta ain inontong monimu kon inakó aidai intua. Dá ki Allah inta pangkoi in kopiaan umuranbí kotaki-takin monimu.

Sukur i Paulus

¹⁰ Kon kobiagan inta notobatúdon i Tuhan, moḷunganga totok in ginaku, sin umpakabí noonggotdon, táe umuranpabí norai kon kaadaanku. Makusudku in deemanbí kon kinoḻiongandon monimu in akuoi; umuranpabí doman kinotoropan monimu, táe diádon in wakutu monimu mopoontong intua.

¹¹ Mosingog in akuoi kon nanaa, deemanbí popisí in diádon in onu bo onu kon inakó, sin nobalajar bidon in akuoi mosukur tongákabí onu in oyúon.

¹² Kinorasaanku bidon naonda in aka kodaitan bo naonda in aka kalebean. Kinotaauanku bidon in rahasia tumayow kon naondakabí in kaadaan; kaadaan kobiagan mooyúon andeka kaadaan mobogá, kaadaan bayongan in yagi-yagi oyúon ande kaadaan kodaitan.

¹³ Kawasa inta inogoi i Kristus kon inakó umuran mobogoi in ropot kon inakó in tumayow kon kaadaan noyagi-yagimai.

¹⁴ Táe moiko ain notuḷung kon inakó wakutu in akuoi kinoantugan in roriga; bo oaidmu tatua in mopiabí.

¹⁵ Utat mita intau in Pilipi! Kinotaauan bidon monimu totok kon wakutu in akuoi nonaḷámai kon Makedonia koḻipod, wakutu in akuoi bagu momangkoi nopoyaput in Habar Mopia, yo tongábí moiko in jamaat inta notuḷung kon inakó; moikodon nion inta nokorasa domandon kon inta mopia bo inta diá mopia wakutu in noyotakinku.

¹⁶ Sin wakutu in akuoi kon Tesalonika bo moparaḷu kon totuḷung, yo ain noiḻiu kon komintan moiko in nokidia in totuḷung monimu kon inakó.

¹⁷ Tongá soaḷ inta totok in moponting kon inakó in deemanbí tongá motarima kon onu inogoi monimu. Táe ibogonku in mokoontongbí kon bungai mita inta mokodugang kon kauntungan monimu.

¹⁸ Bayongan inta paraḷuonku inogoidon monimu kon inakó, sedang bo noiḻiudon kon tugat! Bayongan inta inogoi monimu inta pinoki dia kon i Epaproditus aindon sinarimaku. Dá tanaa mako komintandon oyúon in onu inta paraḷuku. Bayongan inta inogoi monimu kon inakó tua naonda bo kobondu in kuruban inta pinosumba kon i Allah bo inta sinarima domandon i Allah takin pia in gina.

¹⁹ Ki Allah inta sinumbaku, mobogoibí in bayongan kaparaḷuanmu podudui in kaoyúonan bo kamuliaan-Nea inta pinoniata kon i Kristus Yesus.

²⁰ Dinayo-dayowdon in ki Allah, ki Amá naton modapot in kopaḷutan dunia naa. Amin.

Salam Pangabisan

²¹ Poyaputpa in salamku kon bayongan umat i Allah inta notobatú i Kristus Yesus. Bo tarima domandon in salam inta nongkon i utat mita naton inta noyotakinku kon naa.

²² Bayongan in umat i Allah kon kotá tanaa bo mosia inta kon komaḻig i Kaisar in nopoyaput doman in salam kon i monimu.

²³ Poigumonku mako, ki Tuhan Yesus Kristus in umuran mobogoi in barakat kon i monimu komintan. Horomat nami, Ki Paulus bo ki Timotius