PILEMON 1 - Alkitab Singog In Mongondow Masa In Tanaa

¹ Uḻe Pilemon, utatku inta nobaḻídon yobayat topogaidan nami! Akuoi ki Paulus, intau inta pinonjara popisí in nopirisaya kon i Kristus Yesus, noyotakin i utat naton ki Timotius, nomais kon surat tanaa kon inimu

² bo kon jamaat inta noyosipun kon baḷoimu; bo kon i utat doman naton bobay ki Appia bo yobayat toporjuangan naton, ki Arkhipus.

³ Kami in umuran mosambayang sinbá ki Allah, ki Amá naton bo ki Tuhan Yesus in mobogoi in barakat bo kobiagan motompia kon inimu.

Tabi bo pirisaya i Pilemon

⁴ Pomuḷoi in akuoi mosambayang umuranku kotangoian in iko, bo poḷat mopoyaput sukur kon i Allah.

⁵ Sin dinongogkudon kon iko in intaubí inta totu-totuu mopirisaya kon i Tuhan Yesus bo motabi doman kon umat i Allah.

⁶ Igumon mako doa, sinbá pinonobatúan naton saḷaku intau mita inta mopirisaya, mobogoidon in pongortian inta moḷoben kon bayongan in barakat inta nouḻí naton sin notobatúdon takin i Kristus.

⁷ Uḻe Pilemon utatku, tabimu kon bayongan in umat i Allah, nokosanangdon totok kon ginaku bo nokodugang domandon kon ropot in pirisayaku! Bayongan in gina in umat i Allah in pinosanangmudon.

Oigum i Paulus kon i Pilemon

⁸ Manangka intua, saḷaku intau inta tumpaḷa mopirisaya kon i Tuhan Yesus dá sabanarnea oyúonbí in hakku mokiaid kon i Utat in onukadon inta musti aidan i utat.

⁹ Tongá lantaran akuoi motabi kon i Utat, dá tongábí akuoi mopoigum kon inimu. Akuoi naa in guyanga bo apa doman tanaa akuoi in pinonjara popisí in nogaid kon oaidan i Kristus Yesus.

¹⁰ Tuamai, akuoi ki Paulus in mopoigum kon inimu soaḷ ki Onesimus, inta ain nobaḻí ki adíku sin sia ain nopirisaya kon i Kristus, kon wakutu in akuoi kon bonupa in ponjara bo akuoi in nobaḻídon guyanganea kon bonu in pirisaya kon i Tuhan.

¹¹ Totuubí kon koḻipod sia naa in diábí baraguna kon inimu, táe tanaa in mobaraguna bidon in sia kon inimu, bo deemanbí tongá kon inimu, táe baragunabí domandon kon inakó.

¹² Bo tanaa intau inta kino-tabiku tua in pinotabákudon bui mamangoi kon inimu.

¹³ Sabanarnea ibogonku in kon naapabí in sia saḷaku toḻiumu sin mobantung kon inakó kon dodai in akuoi kon bonupa in ponjara sin nopotaau in Habar Mopia nongkon i Allah.

¹⁴ Táe doíbí in akuoi momia kon natua aka diápa muna moyosingogmu. Sinbá onu inta mopia pomiaanmu, deemanbí popisí in pinakisaku; táe inaidanmubí intua takin nosanang in gina.

¹⁵ Sin degá bo tuabí in mangaḻe ki Onesimus pinoyayúpa notoyong kon inimu sinbá sia in umuranmudon tarimaan modapot in mononoi.

¹⁶ Bo tanaa, sia in deeman bidon tongá tobatú ata kon i utat; táe noiḻiu bidon kon tua. Sia in tumpaḷa bidon intau in Keresten inta kotabi naton. Sia in baragunadon kon i naton apalagi kon inimu! Tantú sia in baraguna bidon totok kon inimu, pinomayá saḷaku ata ande saḷaku utat kon bonu in tabi i Tuhan!

¹⁷ Tuamai, lantaran akuoi inanggapdon i Utat saḷaku tumpaḷa Keresten, dá tarimadon bui in ki Onesimus ná pinototarima i Utat kon inakó.

¹⁸ Aka sia bo nokoporugimaidon kon inimu andeka koboḻi kon inimu, yo bain akuoi in motanggung kon tua komintan.

¹⁹ Yo tanaa akuoi in momaisdon tontaní kon tanaa: Akuoi, ki Paulus, moguboḻi kon bayongan boḻinea. (Tantú diá bidon paraḷuku ponorop bui kon i Utat, kon iko tontaní in koboḻibí doman kon inakó, boḻimu tua in kobiagan mobagu saḷaku intau Keresten.)

²⁰ Manangka intua, podoyon kon tangoi i Tuhan tuḷungaipa in akuoi, posanangpa in ginaku saḷaku Utat inta tumpaḷa notobatú i Kristus.

²¹ Surat tanaa in pinaisku, sin moyakinbí in akuoi kon moibogbí iko mogaid kon onu inta pinoigumku tanaa. Bo moiḻiubí kon tua in aidanmu.

²² Akuoi in mopoigum doman kon inimu, tuḷungaipa posadiaai in akuoi kon gopot kon baḷoimu sin haraponku mako kon indongoganbí i Allah onu in pinoigum i utat mita konbá akuoi in buipa mamangoi kon i monimu.

Salam Pangabisan

²³ Ki Epapras inta noyotakinku kon bonu in ponjara popisí in nogaid doman kon oaidan inta pinoki aid i Kristus, nokipoyaput doman in salam kon inimu.

²⁴ Bo tarimadon doman in salam nongkon yobayat mita topogaidanku, ki Markus, ki Aristarkhus, ki Demas bo ki Lukas.

²⁵ Poigumon mako ki Tuhan Yesus Kristus in momarakat kon i monimu. Horomat nami, Ki Paulus