PETRUS 2 2 - Alkitab Singog In Mongondow Masa In Tanaa

Intau mita inta deeman totuu guru

¹ Koḻipod kon sigad in umat i Allah, oyúondon in intau mita inta mongaku nabi, táe deemanbí in mosia tua totuu nabi. Natuabí doman in mobaḻí kon sigad monimu, moiangoibí intau mita inta mongaku guru, táe onu inta tundúon monia tua in diábí totuu. Mosia in motundú kon uboḷ, sahingga intau inta mopirisaya kon i monia in mokouḻí kon hukuman. Bo mosia tua diá mopirisaya kon mongongawasa inta ain nopobebas kon i monia. Aid monia natua in mokobodito kon i monia tontaní, bo tua in diádon moonggot in moiantug kon i monia.

² Táe umpaka natua, yo mobayongpa doman in intau dinumudui kon kobobiag in intau mita inta deeman totuu guru inta kinawasaandon ibog in awak monia. Aid monia tatua totok in mokopopisí kon mobayong in intau moningkuḻe kon Daḷan Mobanar inta mopobayá kon i Allah.

³ Popisí in mosia motamaa, dá intau mita inta deeman totuu guru tua in mongonguman kon inimu in ouman mita inta tongá ai-aidan monia tontaní sinbá kouḻían monia kon kauntungan in moiko. Táe bá kotaauan monimu, pongadilan inta mopoḷabú in hukuman kon i monia tua in noonggot bidon in sinadia, bo koyoyangan inta ain sinantú kon i monia in mogoḷat bidon mako.

⁴ Malaekatpa mita inta nogaid kon dosa, diábí doman pinilatan i Allah nongkon hukuman. Mosia tua in komintanbí doman pinogonag kon naraka. Mosia in pinobonu kon irang inta mosindip sin pogoḷa-goḷatan kon Singgai Ponantúan.

⁵ Natuabí doman in pinomia kon dunia tungkuḷ intua, diábí pinomayá mako i Allah kotaḻiban in hukuman. Pinoangoi i Allah in ḷunud moḷoben totok kon dunia in intau mita moraat tungkuḷ intua. Tongábí ki Nuh takin intau pitu ibanea in pinosaḷamat i Allah, sin sia in nopotaau in habar soaḷ kobobiag inta mokosanang kon gina i Allah.

⁶ Ná doman kotá in Sodom bo Gomora: nodait i Allah sinubá in kotá mita tatua sinbá mobaḻí contoh kon onu inta mobaḻí kon intau mita inta moraat.

⁷ Táe ki Lot in pinosaḷamat sin sia in dinumudui kon singog i Allah; mororiga totok in ginanea sin umuran mokoontong kon aid mita mokotor inta pinomia in intau mita inta moromú.

⁸ Saḷaku intau mopia inta nobiag kon yua-yuak in intau moraat natua, moajar totok in gina i Lot sin pomuḷoi in singgai umuran mokoontong mako kon intau mita inta mongoromú tatua.

⁹ Dá kotaauanbí i Tuhan in moposaḷamat kon intau mita inta dinumudui kon ibog-Nea aka mosia koantugan in sobaan mita. Bo kotaauanbí doman i Tuhan in motagú kon intau mita inta moraat sin sikisaan kon Singgai Ponantúan,

¹⁰ torutama intau mita inta tantú dinumudui kon ibog in awak monia inta mokotor bo inta moningkuḻe kon kawasa i Allah. Ná domai tua in kobobarani monia bo koḷoḷatú in intau mita inta mongaku guru mita tatua, sahingga in diábí moondo-ondok in mosia moningkuḻe kon mahaḷuk mita in soroga inta momulia!

¹¹ Bokaka umpaka malaekat mita inta mongoropot bo inta kokawasa noiḻiu kon i monia tua yo diábí kobaḻí in mopoyagi-yagimai kon singog kon bayongan mahaḷuk mita tatua kon tayowon i Allah.

¹² Táe aid in intau mita tatua in moiḻiudon totok! Mosia tua in naonda bo mahaḷuk inta pinononggadí sin domokon bo ḻimodon. Mosia tua in diábí morai, tongábí mogaid podudui in onu inta kinoibog monia aidan, sahingga in onu inta diá kinomangaḻean monia totokdon in singkuḻeon monia. Dá oaid bidon monia tontaní in mokobodito kon i monia tua naonda bo mahaḷuk mita inta mongoromú.

¹³ Saḷaku tontuḻí in aid monia inta mongoromú tua, yo mosia in mokorasabí kon roriga. Aka kon i monia yo soaḷ mita inta mokosanang kon gina monia in mogaidbí kon onukabí kon wakutu in singgaipa sin mopoorop kon ibog in awak monia. Aka mosia ḻimitú moyotakin monimu kon rame bo mongaan moyotakin, yo oaid monia tua in mokobú lantaran mosia moḷoḷangu in ibog awak monia.

¹⁴ Mosia tua in diábí mogoga-gogai in mogaid kon dosa, bo totok moibog in mosia motayak kon bobay inta monakaḷ. Bo intau mita inta diápa noroton in pirisaya monia modait tongganutan monia. Gina monia tua in noibiasa bidon moturá. Mosia tua in binutung bidon!

¹⁵ Popisí in mosia bo doí dumudui kon onu inta noitutui, dá noiḷangkamdon in mosia. Mosia in dinumuduidon kon i Bileam ki adí Beor tungkuḷ intua. Ki Bileam naa in moibog totok tondanan sinbá mogaid kon inta moraat.

¹⁶ Tongá sia in nokouḻí kon tompoingat popisí in oaidnea moraat tatua, wakutu intua keledainea in nosingog naonda bo intau. Dá nabi tatua in pinakisa bá mogogaidon mogaid kon oaidannea inta nobundai tatua.

¹⁷ Mototundú mita kon inta diá totuu tatua naonda bo bokaká inta noingkagdon, bo ná doman onda bo goḷom inta inirup in tompot moropot. Mosia ain bidon pinosadiaan i Allah kon tampat inta mosindip totok, tampat pohohukuman.

¹⁸ Mosia in umuran mopodandi in uboḷ mita bo inta diá baraguna. Ibog monia inta mokotor totok tatua pinaké monia mopoyaying kon i monia inta bagupa nopirisaya kon i Tuhan.

¹⁹ Mosia tua in mopodandi in kasaḷamatan kon intau ibanea, bokaka mosia tontaní ain nobaḻí ki ata in oaid mita inta diá mopia inta mokogoguyaat kon intau. Sin aka tobatú intau bo sinaḷowdon in tobatú kawasa dá sia in mobaḻí bidon ata in kawasa inta nokotaḷow kon inia tua.

²⁰ Intau inta nonotaaudon kon i Tuhan bo kon i Mopoposaḷamat naton ki Yesus Kristus, yo sia tua in noipilatdon nongkon kawasa mita in dunia naa inta mokokotor kon intau. Táe onda intua sia in buidon nogaid kon inta moraat, dá oaid in intau tatua in moiḻiu bidon totok kon koraatnea inta muna.

²¹ Maníka intau mita natua in diádon kon dodai in onda in nonotaau kon onu inta noitutui inta sinundú i Tuhan dika in nonotaaudon táe doíbí dinumudui kon parenta-Nea mita inta ain pinotaau kon i monia.

²² Singog moiduduimai naa noyokaan totok in oaid monia tua, “Ungkú mokaanbí bui kon totukanea, bo boké inta ain ininggúan kinodarit buibí doman in sia mayá ḷumobong kon bonu in yoná.”