OUMAN IN RASUL MITA 9 - Alkitab Singog In Mongondow Masa In Tanaa

Ki Saulus nogogai nogaid kon moraat

¹ Wakutu intua ki Saulus umuranpabí mogogondok bo moḻimod kon bayongan intau inta ain nopirisaya kon i Tuhan Yesus. Sia in minayá kon i imang moḷoben,

² bo noigum kon surat kawasa kon inia sin diaannea kon majelis mita in Yahudi inta kon Damsyik, sinbá aka sia in mokodungkuḷ kon intau mita kon tua inta mopirisaya kon i Tuhan Yesus, yo sia in motaau modomok kon i monia bo diaan pobayá in Yerusalem.

³ Bo wakutu in sia minayá in Damsyik, naonda in nodiugdon kon kotá tatua, daḻíbí bo oyúon in sindar nongkon ḷangit nonindar kon inia.

⁴ Dá noumpag in sia kon butá bo dinongognea in singog noguman nanaa kon inia, “Saulus, Saulus! Nongonu sin momogutúbí in iko kon i-Nakó?”

⁵ Dá ki Saulus in noḻibó, “Ki ine in Iko Tuang?” Dá kain tubag in singog tatua, “Akuoi naa in ki Yesus inta pinogutúmu tua.

⁶ Táe tanaa mako in poguman-Ku kon inimu pobangondon bo tuotdon in kotá. Bain kon tua bo poguman-Ku kon inimu mongo onu in pokiaid-Ku kon inimu.”

⁷ Bayongan in intau inta noyotakinnea in nongoitaḻikokog bo pinunguḷ; sin mosia in nokodongog domandon kon singog tatua táe diábí tobatúmai intau in inontong monia.

⁸ Ki Saulus in sinimindog bo binukánea in mata, táe diádon mokoontong in sia, dá dongka bidon kinapit monia in sia minayá kon kotá in Damsyik.

⁹ Toḷu nosinggai sia in diá nokoontong bo solama intua diá doman nongaa-ngaan bo diá doman nonginu-nginum.

¹⁰ Kon Damsyik oyúon tobatú dumodudui i Tuhan Yesus ki Ananias in tangoinea. Ki Tuhan nokipogontong kon inia bo noguman, “Ananias!” Ki Ananias in sinumubag, “Akuoi naa, Tuhan.”

¹¹ Dá ki Tuhan in noguman kon inia: “Pobuatdon tanaa mako. Bayádon kon baḷoi i Yudas bo pongin daḷan inta sinangoian Daḷan Motuḻid. Ḻibó kon tua intau inta ki Saulus in tangoinea. Sia tua intau in Tarsus. Koyogot mosambayang in sia intua,

¹² bo kino taḻiontonganneadon kon oyúon in tobatú intau inta ki Ananias in tangoinea namangoi nomarakat kon inia, sinbá mokoontongpa bui in sia.”

¹³ Ki Ananias in noguman, “Tuhan, aindon dinongogku kon bayongan intau, kon nobayongdon totok intau in pinogutú bo iḻimod in intau tatua kon Yerusalem, intau mita inta mopirisaya kon i Tuhan Yesus.

¹⁴ Bo tanaa in sia in namangoi domandon naa sin inogoiandon doman i imang mita itoi in kasampatan modomok kon bayongan intau inta mopirisaya kon ini-Mu.”

¹⁵ Táe ki Tuhan in noguman kon i Ananias, “Bayádon! Sin sia tua ain bidon piniḻí-Ku mobantung kon i-Nakó mopotaa-taau mako in Habar Mopia soaḷ Akuoi kon bangusa mita ibanea inta deeman intau in Yahudi bo kon datu mita bo kon intau mita in Israel.

¹⁶ Bain Akuoi tontaní in mopoontong kon inia kon bayongan roriga inta musti korasaannea popisí in pirisayanea kon i-Nakó.”

¹⁷ Dá ki Ananias in minayá domandon in baḷoi tatua bo nomarakat kon i Saulus, kainia, “Saulus utatku, ki Tuhan Yesus inta ain nokipogontong kon i utat kon daḷan, wakutu in ki utat mopoangoi in naa, Sia doman tua inta nopotabá kon inakó mamangoi kon inimu sinbá ki utat in buipa mokoontong bo kawasaandon in Roho i Allah.”

¹⁸ Dá kon dodaipa doman intua bo kinorasaannea ná noḷabú in karapus in matanea, bo nokoontongdon bui in sia. Dá nobangondon in sia bo poḷat binaptis.

¹⁹ Naonda in nongaan mako, sia in buidon noropot.

Ki Saulus nopoyaput in Habar Mopia kon Damsyik

²⁰ Ki Saulus in nogutunpa kon Damsyik tongonumai nosinggai noyotakin in dumodudui mita i Yesus kon tua.

²¹ Bayongan in intau noherang in nokodongog kon i Saulus. Mosia in noguman, “Eta deemanbí sia naa inta moḷongasi moḻimod kon bayongan intau inta mopirisaya kon i Tuhan Yesus kon Yerusalem? Bo inta mamangoi doman naa sin modomok kon bayongan intau inta mopirisaya kon i Tuhan Yesus bo diaan kon tayowon in imang mita itoi!”

²² Táe moḷobendon totok in pongaru i Saulus kon i monia. Onu inta nobaḻí kon inia soaḷ ki Tuhan Yesus, nodaitnea inouman kon i monia, sahingga in nopirisayadon totok in mosia kon ki Yesus tuata in Datubí Mopoposaḷamat, dapot intau mita in Yahudi kon Damsyik diádon mokobayow.

²³ Naonda in tongonumaidon nosinggai in koonggotnea intau mita in Yahudi noyopakat moḻimod kon i Saulus.

²⁴ Táe makusud monia tatua kinotaauan i Saulus. Doḷom bo singgai mosia in mogoḷat mako kon ngara in kotá tatua, sin moḻimod kon inia.

²⁵ Táe kon doḷom tobatú, sia in binonu in dumoduduinea mita kon karansi bo pinoḻimpat pinongin dinding in kotá tatua.

Ki Saulus kon Yerusalem

²⁶ Noiyaputmai kon Yerusalem, ki Saulus moramuji dumugang kon dumodudui mita i Yesus kon tua. Táe dumodudui mita i Yesus kon tua in komintan mongoondok kon inia, sin diápa mopirisaya in mosia kon sia tua in totu-totuudon nobaḻí dumodudui i Tuhan Yesus.

²⁷ Táe inangoi i Barnabas bo ginamá in sia bo pinotayow kon rasul mita. Bo nodait inouman i Barnabas kon i monia in soaḷ naonda in ki Saulus nokoontong kon i Tuhan kon yuak in daḷan bo soaḷ naonda in ki Tuhan nosingog kon inia. Bo inoumannea doman kon i monia in kinobobarani i Paulus nopoyaput in Habar Mopia soaḷ ki Yesus kon Damsyik.

²⁸ Dá sinarimadon monia in ki Saulus poḷat nogutundon noyotakin monia kon Yerusalem. Kon tua in sia mobarani totok in mopoyaput in Habar Mopia inta pinodoyon kon bonu in tangoi Tuhan.

²⁹ Sia in umuran mongonguman bo mobobayowan takin intau mita in Yahudi inta nomaké in bahasa Yunani, sahingga in totok ramujion monia ḻimoddon.

³⁰ Táe naonda in kinotaauan in jamaat in tomayá monia tatua, baya-bayá dinia monia in sia kon Kaisarea bo poḷat pinoki bayáan monia in Tarsus.

³¹ Dá bayongan in jamaat kon Yudea, Galilea bo Samaria komintan nopia in gina. Takin totuḷung in Roho i Allah, bo takin doman toguondok kon i Tuhan, bayongan in jamaat koropot-koropotdon bo kodugang-kodugang domandon in kobayongnea.

Ki Petrus kon Lida bo Yope

³² Ki Petrus in minaya-mayá mako nokipodungkuḷ kon jamaat mita kon ḻipu-ḻipúannea. Kon binayáannea tatua sia in nongandup kon jamaat mita i Tuhan inta kon Lida.

³³ Kon tua in sia noyodungkuḷ i Eneas, intau inta ain waḷu notaong noitosiug mako sin diádon mokobayá.

³⁴ Ki Petrus noguman kon i Eneas, “Eneas, ki Yesus Kristus in mongundam kon inimu. Pobangondon bo toinutdon in tosiuganmu tanion.” Dá kon dodaipa doman tatua bo nobangon in ki Eneas, bo nopirisayadon in mosia kon i Tuhan.

³⁵ Natua doman in bayongan intau kon Yope bo kon Saron. Mosia in nopirisaya domandon mita, naonda in nokoontong kon i Eneas inta ain nokobayá tua.

³⁶ Kon ḻipú tatua oyúon doman in bobay, tangoinea in ki Tabita. Sia in tobatú intau inta mopirisaya kon i Yesus. (Aka kon Yunani, ki Dorkas in tangoinea.) Sia in umuran mogaid kon inta mopia bo umuran moibog motuḷung kon intau mita inta nobiag nobogá.

³⁷ Táe dodai intua sia in notakit poḷat minatoi. Naonda ininggúandon, mayatnea in inukat monia kon gopot kon ḻimonik.

³⁸ Lantaran ḻipú in Lida nodiug kon Yope, dá naonda in intau mita inta mopirisaya kon i Yesus nokodongog kon ki Petrus in oyúon kon tua, binayá monia bo pinoki oiní kon intau doyowa takin koyow nanaa, “Ḷagipa angoi in naa.”

³⁹ Ki Petrus in baḷú nonoinut bo minayá noyotakin monia. Naonda in noiyaputmai kon tua, dinia monia in sia noponik kon gopot inta pinogukatan kon mayat i Dorkas. Bayongan in intau inta dongkadon boba-bobay komintan namangoi sinimindog kon diug i Petrus poḷat nongombaḷ bo mopoontong doman in ḷambung inta inaidan mita i Dorkas wakutu in nobiagpa.

⁴⁰ Táe nodaitnea pinoki ḷuaian in mosia kon gopot tatua, bo sia in sinumungkud nosambayang. Nopaḷut mako nosambayang, nobobui in sia kon mayat tatua bo noguman, “Tabita, pobangondon!” Dá ki Dorkas nobukádon kon mata, bo naonda inontongnea in ki Petrus, bango-bangon in sia bo iḻimitú.

⁴¹ Dá kinadaiandon i Petrus in ḻimanea bo pinosindog. Onda intua inoiníneadon in intau mita inta mopirisaya bo bayongan intau inta dongkadon boba-bobay kon tua, bo ki Dorkas inta ain nobiag bui pinosarakanneadon kon i monia.

⁴² Onu inta ain nobaḻí tatua, noisiardon kon bayongan in ḻipú kon Yope. Dá nobayongdon intau in nopirisaya kon i Tuhan Yesus.

⁴³ Nopaḷut mako kon tua ki Petrus in nogutunpa tongonumai nosinggai kon Yope kon baḷoi i Simon, intau inta mororubus kon kuḻit.