OUMAN IN RASUL MITA 8 - Alkitab Singog In Mongondow Masa In Tanaa

¹ Bo nopia doman gina i Saulus kon pinoḻimodan kon i Stepanus tua. Kon singgaipa doman tatua jamaat kon Yerusalem totokdon in aḷo-aḷowan mako monia bo pogutúon sahingga in bayongan intau inta mopirisaya koḻikud in rasul mita, komintan nongoibaya-bayá mako kon bayongan ḻipú kon Yudea bo kon Samaria.

Ki Saulus nomogutú kon jamaat

² Bayongan in intau inta mongoondok kon i Allah noḷobong kon i Stepanus bo totok monia inuangan in sia.

³ Táe ki Saulus in totokdon moḷongasi momogutú kon jamaat mita tatua. Sia in maya-mayá mako kon baḷo-baḷoiannea bo motayak kon jamaat ḷoḷaki bo bobay inta mopirisaya kon i Tuhan sin poḷuaion kon kotá tatua bo bayáan bonuon kon ponjara.

Habar Mopia nongkon i Allah pinoyaput kon Samaria

⁴ Intau mita mopirisaya inta ain nongoirangkap tatua, nopotaa-taau doman mako in Habar Mopia kon ondakabí in kobayáan monia.

⁵ Ki Pilipus minayá in tobatú kotá kon Samaria bo nopotaau in soaḷ Datu Mopoposaḷamat inta pinodandi i Allah kon bayongan intau kon tua.

⁶ Naonda in dinongog in intau moantó in onu in pinotaau i Pilipus bo mosia in nokoontong kon tanda mita inta sinoko aidannea, mosia in notobatú kon gina bo notarima kon onu inta pinotaaunea tatua.

⁷ Sin inontongdon monia tontaní in dimukud mita moraat iḷumuai nongkon intau inta sinoḷangannea tatua takin kumarak. Ná doman tua, nobayong doman totok in intau inta ḻempeng bo intau mita pelong in nopia.

⁸ Dá totok nopia-pia in gina in intau mita kon kotá in Samaria tatua.

⁹ Kon kotá tatua oyúon in tobatú ḷoḷaki tangoinea in ki Simon. Noonggotdon in sia in mogaidmai kon soaḷ mita inta totok mokoherang kon bayongan in intau kon ḻipú tatua, sin sia in mosihirmai. Bo sia in nongaku kon bayongan intau kon tua, kon sia in totok motoyang.

¹⁰ Dá bayongan intau kon kotá tatua komintandon nonarukiramai kon inia. Intau mita kon kotá tatua, mongoadí, tayowmobiag bo guyanga komintan moguman nanaa, “Intau tanaa in totokbí in kinawasa i Allah inta ponango-nangoian ‘Mokawasa totok’ tua.”

¹¹ Noonggotdon totok sia in momakémai in sihirnea, dá mopia totok gina in bayongan intau kon inia.

¹² Táe mosia in binayá i Pilipus pinopotaauan in Habar Mopia soaḷ naonda in ki Allah mamangoi momarenta saḷaku datu bo soaḷ ki Yesus Kristus, Datu Mopoposaḷamat tua. Dá bayongan in intau kon kotá tatua nodait nopirisaya kon onu in pinoyaput i Pilipus kon i monia. Bo mosia in binaptis mita pinomayá ḷoḷaki andeka bobay.

¹³ Ki Simon in nopirisayadon doman. Bo naonda in sia binaptis, sia umuran dumudu-dudui mako kon i Pilipus. Soaḷ mita inta mokoherang inta inaidan i Pilipus totok mokoherang kon i Simon.

¹⁴ Rasul mita kon Yerusalem nokodongogdon, kon bayongan intau inta kon Samaria in notarimadon kon pirman i Allah. Tuamai pinotabá monia in ki Petrus bo ki Yohanes minayá in kotá tatua.

¹⁵ Naonda in noiyaputmai kon tua in taya dua, sinambayangan monia in jamaat tatua sinbá tantú kawasaan in Roho i Allah,

¹⁶ sin diápa tobatúmai intau kon sigad monia tua in kinawasaan Roho i Allah; bagubí binaptis kon bonu in tangoi i Yesus Kristus.

¹⁷ Naonda in binarakatandon i Petrus bo i Yohanes dá mosia notarimadon kon Roho i Allah.

¹⁸ Onda inontong i Simon kon oyúondon Roho i Allah kon i monia sin binarakatan i Petrus bo i Yohanes, dá ki Simon in namangoi kon i Petrus bo kon i Yohanes takin kodia-dia in doit poḷat

¹⁹ noguman, “Ogoiai doman kawasa tanion in akuoi, sinbá aka akuoi in momarakat kon intau ibanea, yo intau mita tatua in motarima doman kon Roho i Allah.”

²⁰ Táe ki Petrus in notubag, “Koboditodon iko bo doitmu tanion! Kainimu kamai totabi Allah in motaaubí taḷuionmu?

²¹ Diá motaau iko in dumudui mogaid takin nami, sin diá motuḻid in ginamu kon i Allah.

²² Tuamai Inggamáaidon in raianmu inta mongoraat bo poigum kon i Tuhan sinbá ampungan-Nea in raianmu mita tatua!

²³ Sin kinotaauanku kon iko nion in intaubí inta mointoi totok bo kinawasa in raian mita inta diá mopia.”

²⁴ Dá ki Simon in noguman kon i Petrus bo kon i Yohanes, “Dá aka natua yo tuḷungaipa poigum kon i Tuhan sinbá diá tobatúmai in siningog monimu nion in mobaḻí kon i nakó.”

²⁵ Naonda in nopaḷutdon nobogoi in kosakusian bo nopotaau in pirman i Tuhan, ki Petrus bo ki Yohanes in nobuidon kon Yerusalem. Kon bonu in binayáan monia tatua, mosia in sindaḷan mopotaau in Habar Mopia kon bayongan ḻipú kon Samaria tua.

Ki Pilipus bo pogawai moḷantud intau in Etiopia

²⁶ Tobatú malaekat i Tuhan in noguman kon i Pilipus nanaa, “Pobuatdon! Bayádon kon dotá in toḷatan daḷan mongin Yerusalem mopobayá in Gaza.” Moingongow totok in daḷan tatua.

^27-28 Dá nobuat domandon in ki Pilipus bo minayá. Dodai intua oyúon tobatú pogawai moḷantud kon komaḻig in Etiopia. Sia tua intau inta pinirisaya mokadai kon bayongan kapunyaan i Sri Kandake, bokí kon butá in Etiopia. Intau tatua in namangoi nosambayang kon Yerusalem bo naonda in mobuidon, sia in sinumakoi kon keretanea. Kon bonu in binayáannea tatua sia sindaḷan mobaca kon buk i Nabi Yesaya.

²⁹ Dá Roho i Tuhan noguman kon i Pilipus nanaa, “bayá diugai in keretanea tatua.”

³⁰ Dá ki Pilipus in minayá dinimiug kon kereta tatua bo nokidongog kon pinobacaan in intau tatua kon buk i Nabi Yesaya. Nopaḷut mako, sia in noḻibó kon intau tatua kainia, “Komangaḻean degá i Tuang onu in binaca i Tuang tatua?”

³¹ Dá intau tatua in notubag, “Naondabí in komomangaḻeku aka diá in intau mopomangaḻe kon i nakó?” Dá sinongganutannea in ki Pilipus sinumakoi kon keretanea tatua.

³² Naa in tontagá inta binacanea tua, “Sia in naonda bo domba inta diaan ratáan, ná ki adí in domba inta tongá kibio-biómai aka gonsingan in bubuḷnea, natua in Sia diábí moposingo-singog.

³³ Sia in siningkuḻe bo pinomia ná intau inta diá mobanar. Sia in iḻimod kon dunia naa, sahingga in diá tobatúmai intau in motaau mongonguman kon asaḷ-usuḷ-Nea.”

³⁴ Bo noḻibó in pogawai tatua kon i Pilipus, “Pogumanka kon inakó, mongo ki ine in imakusud in nabi tanaa? Sia tontaní mongo intau ibanea?”

³⁵ Dá nomangkoidon in ki Pilipus nosingog; tontagá mita tatua in pinakénea nomangkoi nopotaau in Habar Mopia soaḷ ki Yesus kon intau in Etiopia tatua.

³⁶ Kon binayáan monia tatua, mosia noidapot in tobatú tampat inta oyúon in tubig. Pogawai tatua noguman, “Indoiaika, kon tua oyúon in tubig! Motaau degá aka akuoi baptisondon kon tua?” [

³⁷ Dá kai Pilipus doman, “Aka ki Tuang bo totu-totuudon mopirisaya, yo diábí doman nongonu.” “Mopirisayadon in akuoi kon ki Yesus Kristus tua in ki Adíbí i Allah,” tua in tubag in pogawai tatua kon i Pilipus.]

³⁸ Dá pinoki potogonnea in keretanea tatua; bo minayá in taya dua. Ki Pilipus bo pogawai tatua, tumpaḷa noponang kon bonu in tubig bo binaptis i Pilipus kon tua in sia.

³⁹ Naonda in mosia nobatundon nongkon tubig tatua, daḻídon dinia in Roho i Tuhan in ki Pilipus, sahingga in diádon inontong in pogawai tatua in sia. Dá sia in nogingguputdon kon bobayáannea tatua takin pia in gina.

⁴⁰ Indoianmai yo kon Asdod bidon in ki Pilipus. Bo kon dodai in sia nogingguput kon bobayáannea tatua, sia in umuran doman mopoyaput in Habar Mopia soaḷ ki Yesus kon kotá-kotáannea noiyaput kon Kaisarea.