OUMAN IN RASUL MITA 7 - Alkitab Singog In Mongondow Masa In Tanaa

Singog i Stepanus

¹ Imang moḷoben in noḻibó kon i Stepanus, “Totuu degá intua?”

² Dá ki Stepanus in nosingog, “Guyanga mita bo utat! Indongogaipa in singogku naa: Wakutu in mogoguyang naton ki Abraham diápa nomamping kon Haran, wakutu intua sia in nogutunpa kon Mesopotamia, bo ki Allah inta totok in moḷantud in namangoi kon inia

³ bo noguman, ‘Taḷaaidon in butámu tanaa bo ginaḷummu mita, bayádon kon kotá inta tundúon-Ku kon inimu.’

⁴ Dá iḷumuaidon in sia nongkon ḻipú intau in Kasdim bo nogutun kon Haran. Bo naonda in minatoidon in ki amánea, pinoki pomampingan i Allah in sia nongkon butá tatua bo minayá in butá inta pinogutunan monimu masai naa.

⁵ Kon wakutu intua diábí inogoian i Allah in butá in sia saḷaku pusakanea; Topaḷadmai yo diábí inogoi Allah kon inia. Táe ki Allah in nodandi kon ogoian-Neabí in ki Abraham sin baḻíon pusaka i Abraham bo buínea mita. Dodai intua ki Abraham in diá kogadí.

⁶ Táe naa in pinoguman i Allah kon inia, ‘Buímu in mogutun kon tua saḷaku mokokiangoi kon butá intau ibanea. Bo baḻíon monia ata poḷat doman rori-rorigaanmai kon bonu in opat nogatut notaong in koonggotnea.

⁷ Táe intau inta mononggata tatua in tokohukumonbí. Tua in siningog i Allah. Tongá mopaḷut mako kon tua, mosia in poḷuaion-Ku kon tua bo mosumba kon i-Nakó kon tampat tanaa.’

⁸ Sunat in nobaḻí tanda kon dodandian tatua. Dá naonda in ki Ishak inta ki Adí i Abraham noilahirdon, adí tatua pinoki sunat kon singgai iwaḷunea; ki adí i Ishak in ki Yakub. Yo ki adí i Yakub tua in mopuḷú bodoyowá inta nobaḻí mogoguyang naton.

⁹ Táe popisí in mointoi kon i Yusup dá mogoguyang naton ibanea tua in nopotaḷui kon i Yusup kon intau in Mesir, táe umuran sinakinan i Allah in sia,

¹⁰ bo pinilatan i Allah in sia kon bayongan roriga bo inogoian in totabi bo pandoi wakutu in minayá kon tayowon i Piraun datu intau in Mesir tua, sahingga in binaḻí i Piraun gubernur kon butá in Mesir bo nongawasa kon bonu in komaḻig i Piraun.

¹¹ Noiduduimai kon tua noiangoidon sempo in malarat moḷoben kon bayongan butá in Mesir bo kon butá in Kanaan sahingga intau in nokorasadon kon roriga. Mogoguyang naton in kinodaitan domandon in kaanon.

¹² Tongá naonda in dinongog i Yakub kon oyúon in gandum kon Mesir, pinotabánea in mogoguyang mita naton tatua minayá in Mesir. Tuata in wakutu dungkuḷ totok minayá in Mesir.

¹³ Naonda in noginduadon minayá, ki Yusup ginumumandon kon i utatnea mita. Bain tua bo kinotaauandon i Piraun in asaḷ-usuḷ i Yusup.

¹⁴ Onda intua binayá i Yusup pinoki gamá in ki amánea ki Yakub takin bayongan in ginaḷumnea pitu nopuḷú boḻima in kobayongnea.

¹⁵ Dá namangoi domandon in Mesir in ki Yakub bo ginaḷumnea mita nodapot in minatoi mita kon tua in mosia.

¹⁶ Tuḷan mita monia in dinia domandon minayá in Sikhem bo iḷobong kon tua. Butá inta inuboḻian i Abraham kon suku bangusa in Hemor kon Sikhem.

¹⁷ Táe naonda in motoyongdon in wakutu i Allah mogintompod kon dandi-Nea kon i Abraham, noantódon totok in intau naton in nogutun kon Mesir.

¹⁸ Pangabisannea nobaḷuidon in datu kon Mesir. Datu inta diá nonotaau kon i Yusup.

¹⁹ Datu nobagu tatua totok in moporupa-rupamai kon intau naton bo totok doman in momogutú kon mogoguyang naton. Sia in nokiḷumbú in adí mita mointok monia sinbá matoi.

²⁰ Wakutu intuata noilahirdon in ki Musa; sia in moḷunat totok. Sia in biniag toḷu nobuḷan kon baḷoi i amánea,

²¹ bodongka iniḻig kon ongkag táe nouḻí i adí i Piraun bobay bo biniag monia naonda bo ki adí monia tontaní.

²² Bayongan in pongotahuan in bangusa Mesir nodait sinundú kon inia, sahingga in sia nobaḻí intau inta totok mokawasa kon soaḷ pososingog bo oaidnea.

²³ Wakutu in umurdon opat nopuḷú notaong, noiangoidon in ibognea mokipodungkuḷ kon i utatnea mita inta intau Israel.

²⁴ Kon dodai intua sia in nokoontong kon intau in Mesir momogutú kon intau Israel. Dá sinuḷungannea intau in Israel tatua bo poḷat iḻimodnea intau in Mesir.

²⁵ Iraineamai kino mangaḻeanbí i utatnea mita intau in Israel kon sia tua in pinakébí i Allah mopoḷuat kon i monia. Naanta yo diábí kino mangaḻean monia.

²⁶ Nopoikoḷomai kon singgai sia in nokoontong doman kon intau in Israel doyowa noropatoi, táe sinongginaannea, kainia, ‘Moiko nion in ginaḷumbí, yo nongonu sin moropatoibí?’

²⁷ Táe intau inta nomongkug kon yobayatnea tatua in nonuḷud kon i Musa bo noguman, ‘Eta ki ine in nopobaḻí kon inimu itoi bo hakim kon sigad nami?

²⁸ Degá ḻimodonmu doman in akuoi ná intau in Mesir koḷabung?’

²⁹ Nokodongogmai kon natua, ki Musa in noḷagui nonaḷámaidon kon Mesir bo minayá nogutun kon Midian. Kon tua in sia nokouḻí kon adí ḷoḷaki doyowa.

³⁰ Naonda in opatdon nopuḷú notaong kon tua, ki Musa in nokoontong kon tobatú malaekat kon padang gurun kon diug in buḷud in Sinai. Malaekat tatua iḷumuai nongkon dokot in tuḷu inta kon yua-yuak in díat.

³¹ Ki Musa in noherang totok in nokoontong kon soaḷ tatua. Sahingga minayá in sia dinimiug bo moindoi mongo onu intua. Bo sia in nokodongog kon singog i Tuhan noguman kon inia,

³² ‘Akuoi naa in ki Allah in mogoguyangmu; Akuoi naa in ki Allah i Abraham, i Ishak bo i Yakub.’ Ki Musa in inumurot bo totok in inagían ondok dá diádon in sia nokobaḻí inimindoi bui kon dokot inta iḷumuai kon yua-yuak in díat tatua.

³³ Bo ki Tuhan in noguman kon inia, ‘Ḷongkut in aip in sioḷmu inta pinakému nion, sin butá inta sinindoganmu nion in butábí motusi.

³⁴ Inontong-Kudon bo umuran-Kudon sinaridimai in roriga in umat-Ku kon Mesir. Dinongog-Kudon in amui monia, dá moponag in Akuoi bo mopoḷuat kon i monia. Tanaa, koḻigai! Potabá-Kudon bui in iko mayá in Mesir.’

³⁵ Ki Musa naa kinodoí in bayongan intau Israel bo inta siningog monia nanaa, ‘Eta ki inebí in nomaḻí kon inimu itoi bo hakim kon sigad nami?’ Táe ki Musabí intau inta pinotabá i Allah mobaḻí itoi bo mopoposaḷamat, takin totuḷung in malaekat inta namangoi kon inia inta kon yua-yuak in díat tatua.

³⁶ Ki Musabí tuata inta nodia kon bangusa in Israel iḻumuai nongkon Mesir takin nogaid kon soaḷ mita inta totok in mokoherang bo soaḷ mita inta diá in poḻiuan kon Mesir, bo kon Dagat Nopuya bo kon padang gurun kon bonu in opat nopuḷú notaong.

³⁷ Siabí doman tua inta noguman kon bangusa in Israel, ‘Ki Allahbí in mobogoi kon inimu in tobatú nabi inta piniḻí-Nea kon sigad monimu, ná Sia ain nomiḻí kon inakó.’

³⁸ Ki Musabí tuata inta kon yua-yuak in bangusa Israel kon padang gurun, inta nobaḻí tonsigad kon malaekat inta nopoyaput in singog kon inia kon Buḷud in Sinai takin mogoguyang naton. Sia tuata inta notarima kon habar inta nobiag nongkon i Allah sin poyaput kon i naton.

³⁹ Umpaka natua táe mogoguyang naton in doí dinumudui kon inia. Mosia in doí notarima kon inia bo moibog mobui kon Mesir.

⁴⁰ Mosia in noguman kon i Harun nanaa, ‘Pogaidaipa kon dewa mita inta motaau duduianmai nami. Sin diádon kotaauan nami mongo onudon in nobaḻí kon i Musa inta nodia kon inami iḷumuai nongkon Mesir!’

⁴¹ Dá kon wakutu doman intua mosia in nogaid kon patong ki adí in sapi, onda intua mosia in noposumba in kuruban kon patong tatua poḷat nomia kon rame sin noduí kon onu inta pinomia monia tua.

⁴² Dá sinaḷáanmai i Allah bo pinomayá-Neadon mako in mosia in nosumba kon tundi mita kon ḷangit. Tua in notongkai ná inta ain pinais kon bonu in buk nabi mita. Nanaa, ‘Ei intau mita Israel! Deemanbí Akuoi in pinorataan monimu bo pinobogoian in sosumba mahaḷuk kon bonu in opat nopuḷú notaong kon rawang bungaion.

⁴³ Sin ki dewa Molokhbí in umuran untu-untuon mako monimu kotaki-takin patong ki adí in sapi inta ki Repan; tuata in patong inta pinomia monimu sin sumbaan. Tuamai in ḷumbúon-Kudon in moiko koyayúon kon ḻimako, kon ḻipú in Babel.’

⁴⁴ Ḷoḷaigan tampat i Allah angoian pokipodungkuḷan kon intau in kon mogoguyang naton kon padang gurun. Ḷoḷaigan tatua in pinomia i Musa podudui in parenta i Allah bo pinodudui in gambar inta pinoontong i Allah muna kon inia.

⁴⁵ Kon singgai noiduduimai tampat tatua dinia in mogoguyang naton kon wakutu in mosia kotaki-takin i Yosua minayá nogagow kon butá naton naa nongkon kawasa in bangusa mita inta sinokountun i Allah kon tayowonmai monia. Ḷoḷaigan tatua nonahang kon tua nodapot in kon sempo i Daud.

⁴⁶ Ki Daud in totok kinosanang in gina i Allah nodapot nopoigum in sia sinbá ogoi-Nea moposindog in Baḷoi-Nea. Baḷoi i Allah inta sinumba i Yakub tatua.

⁴⁷ Táe ki Salomo bidon in noposindog in Baḷoi i Allah tatua.

⁴⁸ Tongá ki Allah Inta Totok in moḷantud tatua, diábí nogutun kon baḷoi inta inaidan in ḻima intau tatua; sin kon bonu in buk in nabi in pinais nanaa,

⁴⁹ ‘Ḷangit in tampatbí pomomarentaan-Ku, bo butá in pomomuntukan-Ku. Dá baḷoipabí onu in pomiaan monimu kon i-Nakó? Kon ondabí in tampat pogogaian-Ku?

⁵⁰ Diábí kinotaauan monimu kon Akuoibí in nogaid kon tua komintan?’ natua in pirman i Allah.

⁵¹ Nádomai tua in kinototogat in gina monimu nion. Totokbí in mororiga didikon kon bá motoindudui kon i Allah! Diábí indongogan monimu in singog i Allah! Moiko nion in naonda bo mogoguyang mita monimu; umuran diá mokidongog kon Roho i Allah.

⁵² Eta oyúon nabi in diá pinogutú in mogoguyangmu mita? Sinbá kotaauan monimu, nodait monia iḻimod in totabá mita i Allah koḻipod, inta namangoi sin mopotaau in koangoian in Simpaḷ i Allah inta totok in mobanar, inta aindon doman irupa-rupamai monimu poḷat iḻimod.

⁵³ Kinotaauan bidon mita monimu in hukum i Musa inta pinoyaput in malaekat mita kon i monimu táe diábí dinuduian monimu!”

Ki Stepanus iḻimod

⁵⁴ Naonda dinongog in anggota in Sidang Agama in bayongan singog i Stepanus tatua, totok nonakit in gina monia bo sinumorú totok kon inia.

⁵⁵ Táe ki Stepanus inta kinawasa in Roho i Allah tatua, iḷumangag kon ḷangit bo inontongnea in kamuliaan i Allah bo ki Yesus in sinimindog kon dotá in koḷanan i Allah.

⁵⁶ Ki Stepanus in noguman, “Indoiai, inontongku in soroga nobukat bo ki Adí Intau sinimindog kon dotá in koḷanan i Allah!”

⁵⁷ Dá anggota mita in Mahkama Agama totokdon nomompon kon bongoḷan monia bo nomaḷú poḷat minayá nomongkug kon i Stepanus.

⁵⁸ Pinoḷuai monia in sia kon kotá tatua bo inandur in batu. Intau mita inta nokoontong kon inta nobaḻí tatua noḷongkut kon ḷambung bo pinoki kadai monia kon tobatú tayowmobiag inta ki Saulus in tangoinea sin moduḷu doman mogandur.

⁵⁹ Koyogot monia anduron batu, ki Stepanus in nosambayang nanaa, “Tuhan Yesus, tarimadon in rohoku!”

⁶⁰ Bo sinumungkud in sia poḷat nomaḷú noropot, “Tuhan, donaaidon dosa tanaa popobaba-Mu kon i monia!” Onda in noguman mako natua sia in minatoidon.