OUMAN IN RASUL MITA 6 - Alkitab Singog In Mongondow Masa In Tanaa

Pitu intau piniḻí mobantung kon intau bogá

¹ Koonggot-koonggot dumodudui i Yesus kobayong-kobayong domandon. Kon wakutu intua intau mita in Yahudi inta nomaké in bahasa Yunani, mulaidon moyaat in gina kon intau mita in Yahudi taakan. Mosia in nosingog nanaa, “Intau nami inta dongkadon boba-bobay in diá kon dodai in onda in kosilaian in tonsilai monia inta silaionmai pomuḷoi in singgai.”

² Tuamai in rasul mopuḷú bodoyowá tua nogoiní kon bayongan in dumodudui mita monia noyosipun bodongka noguman, “Diábí mopia in aka kami mogogaipa mopotaau in Habar Mopia, sin popisí in monoinutbí kon soaḷ mita inta kaanon.

³ Dá, maníka ki utat mita in momiḻí kon pitu in intau inta kon sigad monimu, intau mopia bo inta kinawasa in Roho i Allah, mobijaksana bo inta motaau pirisayaanmai monoinut kon soaḷ mita tanaa;

⁴ sinbá motantú in pikiran nami in mopoyaput in pirman i Allah bo mosambayang.”

⁵ Sinarima nopia in bayongan jamaat in onu inta pinoigum in rasul mita tatua. Dá piniḻídon monia in ki Stepanus, intau inta mopirisaya totok kon i Yesus bo inta umuran kinawasa in Roho i Allah. Naa doman tangoi monia inta kinopiḻían: Ki Pilipus, ki Prokhorus, ki Nikanor, ki Timon, ki Parmenas, bo ki Nikolaus inta nongkon Antiokhia; sia in deemanbí intau in Yahudi, táe sinumuotdon kon agama Yahudi.

⁶ Taya pitu tua in dinia kon tayowon in rasul mita bo sinambayangan poḷat nopoigum sinbá barakatan i Tuhan in mosia.

⁷ Natuata inta nobaḻí sahingga pirman i Allah in totokdon noisiar magí mako bo intau mita inta nopirisaya kon i Yesus kon Yerusalem in nodugangdon totok in kobayongnea. Bo noantó domandon in imang in nopirisaya kon i Yesus.

Ki Stepanus dinomok

⁸ Ki Stepanus naa in intaubí inta totok in binarakatan i Allah. Moantó totok in soaḷ inta mokoherang in inaidannea kon sigad in intau moantó.

⁹ Táe oyúon doman in intau in diá mopirisaya kon inia; mosia tua in jamaat nongkon Yahudi inta Tangoionmai Intau mita Nobebas. Mosia tua in intau mita inta nongkon Kirene bo Aleksandria, mosia noyotakin doman in tongonumai intau Yahudi nongkon Kilikia bo Asia. Intau mita inta noginggabatanmai in singog takin i Stepanus.

¹⁰ Tongá mosia in diá mokobayow kon kopopandoi i Stepanus bo Roho inta mosingog kon inia.

¹¹ Dá mosia in nonongganut kon tongonumai intau sinbá moguman kon nanaa, “Kami in nokodongog tontaní kon sia in totok mopoompámai kon i Musa bo kon i Allah!”

¹² Tuata in pinoki guman monia kon intau moantó bo itoi mita in Yahudi takin mototundú mita kon agama. Dá dinomok monia in ki Stepanus bo dinia pinotayow kon sidang Pongadilan Agama.

¹³ Noiyaputmai kon tua inoinídon monia in intau mita inta ain sinokouboḻian monia sinbá mayá kon muna bo mobogoi in katarangan inta diá totuu bo moguman, “Intau tanaa in umuranbí mopoompámai kon Baḷoi Tuhan bo parenta mita i Allah inta pinoyaput i Musa.

¹⁴ Dinongog nami tontaní in sia in nosingog nanaa, Ki Yesus intau in Nazaret tua in mogumpag kon tampat tanaa bo momaḷui kon bayongan in adat inta inogoi i Musa kon i naton!”

¹⁵ Bayongan in intau kon pinosidangan tatua komintan inimindoi kon i Stepanus. Inontongmai monia in pogot i Stepanus nádon pogot in malaekat.