OUMAN IN RASUL MITA 5 - Alkitab Singog In Mongondow Masa In Tanaa

Ki Ananias bo ki Sapira

¹ Táe oyúon in tobatú ḷoḷaki tangoinea in ki Ananias, ki buḷoinea in ki Sapira. Taya dua motonibuḷoi naa in nopotaḷui doman in butá monia totampat.

² Iyosingogdon muna nayadua motonibuḷoi tua, kon boḻinea tobotak tagúon monia sin pakéon tontaní yo tobotak in ogoi kon rasul mita.

³ Dá ki Petrus in noḻibó kon inia, “Ananias nongonu sin pomayámubí mako in Ibilis mongawasa kon ginamu, modapot in iko monguboḷ kon Roho i Allah, takin umuni-uni mako motagú kon boḻi in butá ibanea sin pakéonmu tontaní?

⁴ Butá tatua in butámubí wakutu in diápa pinotaḷuimu. Bo naonda in pinotaḷuimudon, boḻinea in ikobí doman in kitogi. Dá nongonu sin monomayábí in iko kon diá mopia natua? Deemanbí intau in inuboḷanmu, táe ki Allahbí!”

⁵ Naonda in nokodongog kon singog i Petrus natua in ki Ananias baḷú noumpag bo minatoi. Dá totok nongoondok in intau mita inta nokodongog kon onu inta nobaḻí tatua.

⁶ Bo tongonumai in tayowmobiag in namangoi bo nobakut kon mayat i Ananias tatua, bo binuḻigan monia pinoḷuai sin bayáan ḷobongon.

⁷ Degá toḷumai nojam noiduduimai kon tua, noiangoi in ki buḷoi Ananias, táe diábí kinotaauannea onu inta bagu nobaḻí.

⁸ Dá ki Petrus in noguman kon inia, “Pogumanka kon inakó mongo totuu kon tongábí natua in boḻi in butá inta pinotaḷui monimu?” Bobay tatua in notubag, “Totuu, tongábí natua.”

⁹ Dá ki Petrus in noḻibó bui nanaa “Nongonu sin kamunda motonibuḷoi in moibogbí monungkuḷ kon Roho i Tuhan? Indoiaika in intau mita inta bagu noiangoi minayá noḷobong kon i buḷoimu, sinimindogdon mako kon tayowon in ḷoḻingkop sin modia domandon kon inimu poḷuai sin bayáan ḷobongon.”

¹⁰ Bo noumpag domandon kon dodai intuata in bobay tatua kon tayowonmai i Petrus. Dá naonda in tayowmobiag mita tatua sinumuot, kinobayáanmai monia minatoi domandon in bobay tatua.

¹¹ Dá totokdon noondok in bayongan jamaat bo bayongan intau inta nokodongog kon onu inta ain nobaḻí tatua.

Tanda mita mokoherang inta inaidan in rasul mita

¹² Bo nobayong doman in soaḷ mita inta mokoherang in inaidan in rasul mita tatua kon sigad in intau moantó kon tua. Komintan intau inta nopirisayadon in umuran moyosipun kon tampat inta sinangoian serambi Salomo bo umuran doman motobatú kon gina.

¹³ Intau mita ibanea diá in kobaḻí dumugang kon i monia. Bo totok horomaton in intau mita moantó in mosia.

¹⁴ Koonggot-koonggot dá kodugang-kodugang domandon intau inta mopirisaya kon i Tuhan, ḷoḷaki bo bobay.

¹⁵ Intau mita kon tua in umuran mopoḷuai in intau mita inta mongotakit bo pobayá in doḷaag popouḻid kon tosiugan andeka boḷad, sinbá mosia diá bo diá kotugatan in oḻinow i Petrus aka ki Petrus moitaḻib.

¹⁶ Ná doman tua, intau moantó inta nongkon kotá mita inta kon diugmai in Yerusalem diá doman mobonto-bontow in mamangoi kodia-dia in intau mongotakit bo intau mita inta kinotoḷangan in dimukud moraat. Mosia komintan in nodait sinokoundaman dapot in nongopia.

Rasul mita pinogutú

¹⁷ Pangabisannea imang mita moḷoben bo dumodudui mita monia inta intau mita nongkon golongan Saduki in momangkoidon moyaat in gina popisí mointoi.

¹⁸ Dá sinoko domok monia in rasul mita tatua bo binonu kon ponjara kon kotá tatua.

¹⁹ Táe nodoḷom monag, tobatú malaekat i Tuhan nomukat kon ḷoḻingkop mita in ponjara tatua bodongka nodia kon i monia iḷumuai. Malaekat tatua in noguman kon rasul mita tatua,

²⁰ “bayádon sindog kon Baḷoi Tuhan bo popotaaudon kon bayongan intau in soaḷ kobiagan inta mobagu naa.”

²¹ Dá rasul mita tatua in dinumudui kon koyow in malaekat tatua. Modiugpa mobayag in mosia minayá in Baḷoi Tuhan bo mulai notundú kon tua. Kon wakutu intua imang moḷoben bo dumoduduinea mita in namangoi bo nogaid kon sidang takin itoi mita intau in Yahudi. Onda intua binayá monia pinoki gamá in rasul mita tatua kon ponjara sin sidangon potayow kon i monia.

²² Táe naonda intau mita inta pinotabá tatua minayá in ponjara, kinobayáanmai monia rasul mita tatua diádon in kon ponjara, dá nobui in mosia bo nopotaau kon soaḷ tatua kon mahkama.

²³ Kai monia, “Kino bayáanmai nami ponjara in kinunsíanbí notompia bo moḷoḷukad mita kon ponjara in komintanbí kon tua kon tayowonmai in ḷoḻingkop, táe naonda in binukatandon nami in ḷoḻingkop in ponjara, diá bidon tobatúmai in kon bonunea.”

²⁴ Naonda itoi moḷoḷukad kon Baḷoi Tuhan bo imang mita itoi nokodongog kon onu inta pinoguman monia tua, mosia in noondok bo poḷat noḻibó mongo onu in nobaḻí kon rasul mita tatua.

²⁵ Tongá namangoidon in intau tobatú kon sigad monia tua bo noguman nanaa, “Indoiaika dá intau mita inta binonu monimu kon ponjara, tuabí komintan kon bonu in Baḷoi Tuhan koyogot in motundú kon intau moantó!”

²⁶ Dá bui bo binayá ginamá in itoi mita inta moḷoḷukad kon Baḷoi Tuhan bo in intaunea mita in mosia. Táe ki pia-piabímai in mosia in nodia kon i monia, sin moondok kon intau moantó kon tua sin dikabo ara bo monia.

²⁷ Ki Petrus bo ki Yohanes in dinia monia kon tayowon in sidang agama. Bo nomangkoidon nosingog in ki imang moḷoben.

²⁸ Kainia, “Aindon ilarang totok nami in moiko sinbá diádon mayá bo mopotaa-taau mako in tangoi intau tatua. Táe tanaa indoiaika, onu in inaidan monimu! Moiko in minaya-mayábí doman mako bo nopohabar in soaḷ intau tatua kon bayongan butá in Yerusalem bo moguman doman kon kamibí naa in nokopopisí kon kinopatoian-Nea.”

²⁹ Táe ki Petrus bo ki Yohanes in noguman, “Kami in mustibí mokidongog kon i Allah, deemanbí dumudui kon singog in intau nion.

³⁰ Ki Yesus inta aindon iḻimod bo pinopopakú monimu kon kayu pinoyotaḻempang tua in buibí biniag i Allah in mogoguyang naton.

³¹ Ki Yesusbí tua inta ain inogoian ḷoḻitúan bo kawasa moḷantud saḷaku Itoi bo Mopoposaḷamat, sinbá intau in Israel ogoian in wakutu mogogai in mogaid kon dosa, bá ampungan in mosia.

³² Ain bidon inontong nami tontaní in kinobaḻian intua komintan. Kami bo Roho doman i Allah inta inogoi i Allah kon bayongan intau inta umuran dinumudui kon parenta-Nea.”

³³ Nokodongogmai kon tua, totok in mosia sinumorú, dá ibogon monia ḻimodonbí in rasul mita tatua.

³⁴ Táe tobatú intau in Parisi inta nobaḻí anggota in pongadilan agama tatua inta ki Gamaliel in tangoinea, tobatú mototundú kon agama inta totok in kinoinsim in bayongan intau kon tua in sinimindog bo nopoigum sinbá poḷuaipa motoyong in rasul mita tatua.

³⁵ Onda in pinoḷuaidon monia in rasul mita tatua, nosingogdon in sia kon tayowon in sidang tatua, “Ei intau mita in Israel, porai kopira in moporupa-rupamai kon rasul mita tatua.

³⁶ Sin koḻipod in nokoimontan domandon in noiangoi in intau inta tangoinea in ki Teudas. Sia in nongaku kon intaubí moḷoben in sia sahingga degá opatmai nogatut in intau in dinumudui kon inia. Táe sia in iḻimod bo nodait noirangkap in dumoduduinea mita.

³⁷ Noiduduimai kon inia, wakutu in pinogiapan kon umat mita, noitukat doman mangoi in ki Yudas intau in Galilea. Sia in namangoi nodia kon intau moantó bo nomarontak, táe sia in minatoi doman bo nongoirangkap domandon in dumoduduinea mita.

³⁸ Tuamai akuoi in moguman kon i monimu nanaa: Donaaidon rupa-rupaanmai monimu in intau mita tatua. Pomayádon mako in mosia. Sin aka makusud bo oaid monia naa nongkon intau, yo moputúbí doman in mosia.

³⁹ Tongá aka tua bo nongkon i Allah yo diábí mokopongonu in moiko, modapotbí in moniata kon moḷawangbí kon i Allah in moiko.” Tonggina tatua inindongogan monia.

⁴⁰ Dá inoinídon bui monia in rasul mita tatua, sinambok bo dinandi kon diá bidon motaau in mosia bui mopotaau in habar soaḷ ki Yesus kon intau mita kon tua. Onda intua binuḻiandon bui monia.

⁴¹ Rasul mita tatua in nobuidon nongkon sidang agama tatua takin pia in gina, sin kinotaauan bidon monia kon natuabí in mobaḻí dumodudui i Yesus. Patusbí in mosia motarima kon singkuḻe lantaran ki Yesus.

⁴² Bo pomuḷoi in singgai mosia umuran mayá in Baḷoi Tuhan bo mayá doman in baḷo-baḷoiannea mopoyaput in habar kon ki Yesus tua in Datubí Mopoposaḷamat.