OUMAN IN RASUL MITA 23 - Alkitab Singog In Mongondow Masa In Tanaa

¹ Ki Paulus inimindoipa magí mako kon anggota in Mahkama Agama inta kon tua bodongka sia in nosingog, “Utatku mita! Umaaibí in singgai naa rasaanku kon akuoi in diábí kotaḷá kon i Allah. Ginaku in motuḻidbí totok kon tayowon i Allah.”

² Táe Imang Moḷoben ki Ananias tua in noguman kon intau mita inta kon diugmai i Paulus kon tokap in bibignea tua.

³ Dá ki Paulus in noguman kon i imang moḷoben tatua, “Tokaponbí i Allah in iko, sin iko in intau inta momunapik inta ki ubo-uboḷmai motusi! Iko in iḻimitú kon nion sin mohakim kon inakó podudui in hukum i Musa, bokaka iko tontaní in moḷawang kon hukum tatua. Sin iko in nopotabábí kon intau monokap kon inakó!”

⁴ Dá intau mita inta kon tua in noguman nanaa kon i Paulus, “Iko in moningkuḻebí kon imang moḷoben i Allah!”

⁵ Ki Paulus in notubag, “Ei utat mita, diábí kinotaauanku kon sia tua in imangbí moḷoben. Totuu kon nanaabí in pinais, ‘Donaaibí in iko mosingog kon moraat kon tobatú intau inta nobaḻí itoi monimu.’ ”

⁶ Kinotaauan i Paulus kon mosia inta kon tua in nobayongbí in nongkon golongan Saduki bo Parisi. Tuamai sia in noguman kon Mahkama Agama tatua, “Utat mita! Akuoi naa intaubí in Parisi, buí intau in Parisi. Akuoi in sidangon kon naa sin akuoi in mopirisaya kon intau minatoi in mobiagbí bui.”

⁷ Naonda in sia nosingog kon natua, nobaḻídon in bobayowan kon sigad in intau mita in Parisi bo Saduki dá noyosilaidon in intau moantó tatua. (

⁸ Sin aka kon raian intau in Saduki, intau minatoi in diábí mobiag bui bo malaekat in diábí, ná doman tua diábí in roho mita. Táe aka intau in Parisi yo nopirisayabí kon oyúonbí in tua komintan.)

⁹ Dá nobobayowandon totok in mosia. Tongonumai in intau inta mototundú kon agama takin intau mita in Parisi, sinimindog kon muna bo nomayow totok. Mosia in noguman nanaa, “Intau tanaa in topiḻikmai yo diábí kinouḻían nami kon taḷá. Degá totuubí kon oyúon in roho andeka malaekat inta ain nosingog kon inia!”

¹⁰ Nodugangdon noḷoben in bobayowan monia tatua, dá noondokdon itoi in tontara tatua sin dikabo ḻibutan monia in ki Paulus bo patoion. Tuamai binayáneadon pinoki gamá in ki Paulus nongkon yuak monia tatua bo pinoki dia bui kon tampat monia tua.

¹¹ Kon doḷom noiduduimai ki Tuhan Yesus in namangoi sinimindog kon diugneamai bo noguman kon inia, “Koropotdon in ginamu! Sin iko aindon nobarani in nongonguman kon onu inta inontong bo dinongogmu soaḷ Akuoi kon intau mita kon Yerusalem, dá ná doman tuata iko in mayá bo mongonguman kon intau mita in Rum kon onu inta ain inontong bo dinongogmu soaḷ Akuoi.”

Intau mita inta moḻimod kon i Paulus

¹² Doḷo-doḷom nobangon monik, intau mita in Yahudi nomangkoidon nosipun kon intau. Bo mosia in nongibot kon diápabí mopongaa-ngaan andeka moponginu-nginum aka ki Paulus in diápa koḻimodan monia.

¹³ Noiḻiubí kon opat nopuḷú in intau inta noyosipun tatua.

¹⁴ Mosia in minayá kon Imang mita itoi bo itoi mita intau in Yahudi bo noguman, “Kami ain nongibot kon diápabí mopongaa-ngaan bo monginu-nginum aka diápa koḻimodan nami in ki Paulus.

¹⁵ Tuamai in moiko komintan poyotakindon in Mahkama Agama bo mayá moguman kon itoi in tontara tatua sinbá ki Paulus in diaannea bui kon tayowon monimu bo moiko in ki ubo-uboḷmai momirikisa. Sin kami in moḷongasidon moḻimod kon i Paulus wakutu in sia kon daḷanpa, diápa moiyaput in naa.”

¹⁶ Táe ki adí i bobay i utat i Paulus in nokodongog kon tomayá monia tatua. Dá sia in minayá in tampat monia tatua bo noguman kon soaḷ tatua kon i Paulus.

¹⁷ Dá nogoiní in ki Paulus kon porwira tobatú bo noguman kon inia nanaa, “Diápa in adí tanaa kon i itoimu sin oyúon in oumanonnea kon inia.”

¹⁸ Dá dinia in porwira tatua in adí tatua kon i itoinea bo noguman, “Ki Paulus, intau inta sinahang naton tua, nogoiní kon inakó bo nopoigum sinbá akuoi in nodia kon ede in tayowmobiag tanaa mamangoi kon i Tuang; sin kainia oyúon in paraḷunea poguman kon i Tuang.”

¹⁹ Dá itoi in tontara tatua in nokapit kon ede in tayowmobiag tatua bo minayá sinumontaní kon toḷosimai bo noḻibó, “Onu in paraḷumu poguman kon inakó?”

²⁰ Ede in tayowmobiag tatua in notubag, “Intau mita in Yahudi ain notobatú kon gina, mamangoi mopoigum kon i Tuang sinbá ikoḷom ki Tuang modia kon i Paulus potayow kon Mahkama Agama, sinbá mosia ki ubo-uboḷmai momirikisa kon i Paulus.

²¹ Tongá donaaibí duduian i Tuang onu in poigumon monia tua. Sin oyúonbí in noiḻiumai kon opat nopuḷú in intau nongkon imonia tua in nogadop kon daḷan sin monomayá moḷabot kon i Paulus kon yuak in daḷan. Intau mita tatua ain nongibot poḷat nongutuk kon mosia in diápabí mopongaa-ngaan bo moponginu-nginum aka diápa koḻimodan monia in ki Paulus. Tanaa in mosia aindon nobasadia, dongka bidon mogoḷat kon singog i Tuang.”

²² Bo itoi in tontara tatua nopotabá kon ede in tayowmobiag tatua nobui takin koyow, “Donaaibí pogumanmu kon i ineka kon soaḷ tanaa aindon pinogumanmu kon inakó.”

Ki Paulus Pinobayá kon i Peliks

²³ Onda intua itoi in tontara tatua in nogoiní kon tontara porwira doyowa bo noguman kon i monia nanaa, “Sadiadon in tontara doyowa nogatut bo pitu nopuḷú inta tumakoi kon kabaḷo takin doyowa nogatut in tontara inta mokadai kon totakuḷ sin mayá in Kaisarea doḷom doman naa jam insiownea.

²⁴ Sadiaai domandon in tongonumai in keledai takoian i Paulus bo diadon in sia kon i Gubernur Peliks. Mokopopia in kon daḷan bá moiyaput takin saḷamat.”

²⁵ Itoi in tontara tatua nomais kon surat inta nanaa in tombonunea,

²⁶ “Gubernur Peliks inta mopia. Salam nongkon i Klaudius Lisias!

²⁷ Intau tanaa in dinomok in intau mita in Yahudi bo gogió iḻimod monia, aka akuoi in diá namangoi takin tontara mita bo noposaḷamat kon inia; sin dinongogku kon sia naa intaubí in Rum.

²⁸ Bo popisí in akuoi moibog monotaau mongo onu in taḷá inta pinonapud monia tua kon inia dá diniaku in sia kon Mahkama Agama monia.

²⁹ Tongá nouḻíkumai sia naa in diábí kotaḷá inta patus pohukuman kon inia dapot in matoi andeka bonuon kon ponjara. Onu in pinonapud monia tua in tongábí soaḷ hukum mita in agama monia tontaní.

³⁰ Natua doman akuoi ain nokouḻí kon habar kon oyúon in tomayá moromú nongkon intau mita in Yahudi kon inia. Dá tuamai ḷagiku pinoki dia mangoi kon i Tuang Gubernur in sia. Bo intau inta monomayá kon diá mopia kon inia in pinotabákudon mamangoi kon i Tuang bo mopongadu in taḷá intau tanaa.”

³¹ Dá tontara mita tatua in nodiadon kon i Paulus ná inta ain pinarenta kon i monia. Doḷom doman tua mosia in noiyaput in Antipatris.

³² Nopoikoḷomai kon singgai dongkadon tontara mita inta sinumakoi kon kabaḷo in nodia turus kon i Paulus, bo tontara ibanea in nobuidon kon tampat monia.

³³ Naonda in tontara mita inta sinumakoi kon kabaḷo noidapotdon in Kaisarea, mosia in nobogoidon in surat tatua kon i gubernur, bo poḷat doman pinosarakan monia in ki Paulus kon inia.

³⁴ Bo nopaḷut mako nobaca kon surat tatua in ki Gubernur, sia in noḻibó kon i Paulus mongo nongkon propinsi taonda in sia. Naonda in kinotaauanneadon kon ki Paulus in nongkon Kilikia,

³⁵ sia in noguman nanaa, “Tua in nopia! Pirikisaanku in taḷámu aka intau mita inta mopongadu kon inimu kon naadon.” Bo pinarentaanneadon kon bá tahangon kon komaḻig i Herodes in ki Paulus.